Read Te Tusi Tapu I Te Gana Tuvalu Lomiga Lua LUKA 7 Bible Online

LUKA 7 - Te Tusi Tapu I Te Gana Tuvalu Lomiga Lua bible

LUKA 7

¹I te palelega ne faipati ne Iesu a mea katoa konei ki tino, fano ei ki Kapanaumi.

²E isi se takitaki o te tokoselau o te malo Loma i kona, ne masaki tena tavini fagasele, ka ko tai mate.

³I te itula ne logo ei te takitaki tena i te tala e uiga ki a Iesu, ne uga atu ne ia ne toeaina Iutaia ke olo o fakamolemole ki a ia, ke vau o fai ke 'lei tena tavini.

⁴Ne o'mai latou ki a Iesu, kae ne fakamolemole malosi ki a ia penei: “A te tagata tenei e 'tau eiloa o maua ne ia tou fesoasoani.

⁵A ia e alofa ki tino o tatou, ka ko ia foki eiloa ne faite ne ia te fale tapuaki mo matou.”

⁶Ne olo latou fakatasi mo Iesu. E seki na lo ko 'mao a ia mai te fale, ka ko uga mai ne te takitaki tena ona taugasoa, o fai mai penei ki a ia: “Te Aliki, sa fai te mea nei mo mea e fakalavelave ki a koe, me e seai soku aoga ke ulu mai ei koe ki loto i toku fale,

⁷ko toku manatu foki me se 'tau mo au o fakaoko atu ki a koe. Ke fai mai fua tau fakatonuga, ko toe malosi ei taku tavini.

⁸Au foki, se tagata e nofo mai i lalo i pulega a takitaki ma'luga, kae isi ne sotia mai i lalo i a au. E fai taku fakatonuga ki te tino tenei, ‘Fano!’ ko te mea eiloa ko fano; e fai taku fakatonuga ki te tino tela, ‘Vau!’ ko te mea eiloa ko vau; kae fai atu foki taku fakatonuga ki taku pologa. ‘Fai te mea tenei!’ ko te mea eiloa ko fai.”

⁹Ne ofo a Iesu i te lagonaga ne ia a te mea tenei; ne takapili atu a ia kae ne fai atu ki te vaitino kola ne tau'tali atu i a ia, “Au e muna atu ki a koutou, me ka seki maua eiloa ne au se fakatuanaki penei i Isalaelu!”

¹⁰A tino kola ne o'mai mo te fekau, ne toe 'foki ki te fale o te takitaki tena, kae maua atu ei ne latou tena tavini ko malosi.

¹¹Fakamuli ake,[5] ne fano a Iesu ki te fa'kai e igoa ki a Naina; ka ko ona soko mo tino e tokouke ne olo fakatasi mo ia.

¹²I tena okoga ki te mataloa o te fa'kai, e isi ne tino ne solo mai i kona, e amo ne latou te tino mate, ka ulu mai ki tua. A te tino mate ko te tama tagata eiloa e tokotasi a te fafine ko mate tena avaga, kae tokouke a tino mai i te fa'kai ne o'mai fakatasi mo ia.

¹³I te itula ne lavea ei ne te Aliki te fafine, a tena loto ne fonu i te alofa ki a ia, kae ne faipati atu ki a ia penei, “Sa tagi.”

¹⁴Ne saele atu a Iesu kae ne puke ki te pusa o te tino mate, kae ne 'tu a tino kola e amo ne latou. Ne faipati atu penei a Iesu, “Te tamataene! Au e muna atu ki a koe, tu ki luga!”

¹⁵Ne nofotu ake ki luga a te tino mate kae kamata o faipati, kae ne tuku atu a ia ne Iesu ki tena matua.

¹⁶Ko oko eiloa i te ma'taku o tino katoa, kae 'viki ki te Atua penei: “Ko sae mai nei se pelofeta sili mo tatou, mo te Atua ko oko mai o fakasao ona tino!”

¹⁷A te tala tenei ki a Iesu, ne oko atu ki koga katoa o Iutaia mo fenua i ona tafa.

¹⁸A mea katoa konei, ne tala atu ne taugasoa o Ioane ki a ia. Ne kalaga atu a Ioane ki se tokolua o latou ke o'mai ki a ia,

¹⁹kae ne uga ke olo ki te Aliki o fesili ki a ia penei, “Ko koe te tino tela ne muna mai a Ioane me ka vau, io me e 'tau mo matou o fakatalitali ki se isi tino?”

²⁰I te taimi ne oko mai ei a laua ki a Iesu, a la muna, “A maua ne uga mai ne Ioane te Papatiso o fesili atu, ‘Ko koe te tino tela ne fai mai ei a ia me ka vau, io me e 'tau mo matou o fakatalitali ki se isi tino?’ ”

²¹I te taimi eiloa tena, ko tokouke a tino ne fai ne Iesu ke 'lei olotou masaki; ko masaki ma'sei, mo agaga ma'sei, kae ne faka'pula foki ne ia a mata o tino 'kivi e tokouke.

²² Ne tali atu a ia penei ki avefekau a Ioane: “'Foki kae tala atu ki a Ioane a mea ko oti ne lavea ne koulua, mo mea foki ko oti ne lagona ne koulua: a tino 'kivi ko 'pula olotou mata, a tino 'pili ko mafai o sasale, a lepela ko 'lei olotou masaki,[6] a tino 'tuli ko 'logo olotou taliga, a tino 'mate ko toe ola, mo te Tala 'Lei ko folafola atu ki tino ma'tiva.

²³Ke manuia a ia tela e seai sona loto fakalotoloto lua ki a au!”

²⁴I te ologa o avefekau a Ioane, ne kamata a Iesu o faipati e uiga mo Ioane ki te vaitino penei: “I te ologa a koutou ki a Ioane i te vao, se a te mea ne fakamoemoe koutou o 'kilo ki ei? Se lau mouku e gaofe i te agi o te matagi?

²⁵Se a te mea ne olo koutou o 'kilo ki ei? Se tagata e pei ki gatu fakagaligali? Kiloke, a tino e pei ki gatu pena kae ola i se olaga 'lei, e maua i fale o tupu!

²⁶Fai mai ki a au, se a te mea ne fakamoemoe koutou o 'kilo ki ei? Se pelofeta? Ao, au e muna atu ki a koutou, ne lavea ne koutou a te tino e sili atu eiloa i se pelofeta.

²⁷ Me i a Ioane, ko te tino tela ne fai mai ei te Tusi penei, ‘Kiloke, tenei taku avefekau, ka uga atu ne au a ia ke mua i a koe o fakatoka te ala mo koe.”’

²⁸Muna a Iesu, “Au e muna atu ki a koutou, me e sili atu a Ioane i tino katoa ko oti ne fanau mai; ka ko ia tela e tafa foliki i te Malo o te Atua, e sili atu i a ia.”

²⁹A tino katoa mo tagata ao lafoga, ne lagona ne latou ana muna; a latou ko tino kola ne faka'logo ki fakatonuga tonu a te Atua, ka ko oti foki ne papatiso ne Ioane.

³⁰Ka ko Falesaio mo faiakoga o te Tulafono, ne seki talia ne latou faiga a te Atua mō latou; kae ne se loto latou ke papatiso ne Ioane.

³¹Muna a Iesu, “Nei, se a te mea ka mafai ne au o fakatusa ki ei kautama i aso nei? E 'pau latou me ne a?

³²E 'pau latou mo ne tamaliki e saga'saga i te malae. Ne ka'laga atu te potu kau e tasi ki te sua potu kau penei: ‘Ne fakatagi atu ne matou a pese o fakaipoipoga mo koutou, ka ko koutou e se 'saka! Ne usu ne matou pese o tanuga o tino 'mate, ka ko koutou e se 'tagi! ’

³³Ne vau a Ioane te Papatiso, ne fakalikiliki mō tapuakiga, ne seki inu foki ki uaina, kae ne muna mai koutou pela, ‘A ia se tagata e fakavalevale!’

³⁴Ne vau foki au ko te Tama a te Tagata, ne kai kae inu, kae muna mai foki koutou pela, ‘Kilo mai ki te tagata tenei! A ia se tino gafula kae inu uaina, se taugasoa o tino ao lafoga mo tino ma'sei!’

³⁵A te poto o te Atua, e fakaasi tonu mai i ana galuega.”

³⁶A Iesu ne ami ne te Falesaio e igoa ki a Simona ke 'kai laua, tela fanatu ei a Iesu ki tena fale, fakapale ifo ei tena tulilima o kai.

³⁷ E isi se fafine i te fa'kai tena, ne ola i se ola fina lalolagi. Ne logo a ia i a Iesu e kai i te fale o te Falesaio, tela aumai ei ne ia se fagu alapasa e fonu i sausau,

³⁸kae ne tu mai tua i vae o Iesu, e tagi kae faka'sofi ifo ona loimata ki vae o Iesu. Ne fakamalo ne ia a vae o Iesu ki ona laulu, ne sogi ki vae, kae ne 'ligi te sausau ki luga i ona vae.

³⁹I te laveaga ne te Falesaio tela ne ami ne ia a Iesu a te mea tenei, ana muna i tena loto eiloa, “Kafai a te tagata tenei se pelofeta eiloa, e 'tau o iloa ne ia me ko oi te fafine tenei e puke atu ki a ia, me i a ia se fafine agasala.”

⁴⁰Ne faipati mo te leo lasi a Iesu ki a Simona, ana muna, “Simona, e isi ne aku mo muna e fia fai atu ki a koe.” Ne tali mai a Simona, “Ko 'lei e te Faiakoga fai mai la au muna.”

⁴¹Muna a Iesu, “E tokolua tagata ne kaitalafu tupe i se tagata. A te sua tino e selau tala tena kaitalafu, ka ko te sua tino e sefulu tala.

⁴²E seai se tino o laua ne mafai o toe 'togi atu tena kaitalafu, tela fakamagalo ei ne te tagata tena a la kaitalafu. Ko oi la te tino o laua e sili tena alofa ki a ia?”

⁴³Ne tali mai Simona penei, “A toku taofi, ko te tino tela ne uke tena kaitalafu ne fakamagalo.” Muna a Iesu, “E tonu tau tali.”

⁴⁴Ne mafuli atu a Iesu ki te fafine kae ne muna atu ki a Simona: “E lavea ne koe a te fafine tenei? Au ne vau ki loto i tou fale, kae ne seki tuku mai ne koe ki a au ne vai mo 'fulu oku vae, ka ko te fafine tenei, ko oti ne 'fulu ne ia oku vae ki ona loimata, kae ne fakamalo ki ona laulu.

⁴⁵Ne seki fakafetaui mai koe ki a au ki se sogi, ka ko ia nei e seki gata tena sogi ki oku vae talu tena oko mai.

⁴⁶Ne seai sau sinu ne aumai mō 'mili toku ulu, ka ko ia nei ko oti ne milimili ne ia oku vae ki te sausau.

⁴⁷Tenei la, au e fai atu ki a koe, i te lasi o te alofa ne fakaasi mai ne te fafine, e fakapatonu ei a te uke o ana agasala ko oti ne fakamagalo. Ko te tino tela e foliki te mea ne fakamagalogina, ko te mea foki eiloa e foliki tena alofa e fakaasi.”

⁴⁸Muna a Iesu ki te fafine, “Ko magalo au agasala.”

⁴⁹A nisi tino kola ne 'kai fakatasi latou, ne kamata o faipati i olotou loto penei, “Ko oi te tino tenei, tela e mafai ne ia o fakamagalo agasala?”

⁵⁰Ka ko Iesu ne muna atu ki te fafine, “Ko ola koe i tou fakatuanaki; fano la mo te manuia.”