Read Te Tusi Tapu I Te Gana Tuvalu Lomiga Lua LUKA 8 Bible Online

LUKA 8 - Te Tusi Tapu I Te Gana Tuvalu Lomiga Lua bible

LUKA 8

¹Fakamuli ake, ne malaga Iesu i loto i fa'kai 'lasi mo fa'kai fo'liki, o takutaku atu te Tala 'Lei e uiga ki te Malo o te Atua, kae ne olo mo te tinoagafulu mo te tokolua soko,

²e pela foki mo nisi fafine kola ne 'nofo i ei agaga ma'sei mo masaki. Ko Malia te Makatala, tela ne afuli mai i ei temoni e tokofitu;

³ko Ioana te avaga a Kusa, ko te pule i te fale o Helota; ko Susana foki mo isi fafine e tokouke, kola ne fesoasoani ki a Iesu mo ona soko i te lotou tausiga.

⁴A tino ne o'mai ki a Iesu mai fa'kai kesekese; kae i te tokoukemaiga o tino, ne fai atu ne Iesu a te tala fakatusa tenei:

⁵“E isi se tagata ne fano o 'toki ana fuaga saito. I te luluga ne ia ana fuaga i luga i tena manafa, e isi ne fuaga ne 'to i luga i te alatu, kae ne lakalaka ne tino, kae ne kai foki ne manulele.

⁶A nisi fuaga ne 'to i luga i te laukele fatufatua, kae i te olaakega o lakau, ne toe magemage, i te mea e se 'siu te laukele.

⁷A nisi fuaga ne 'to ki loto i va o lakau makai'kai, ne ola fakatasi ake kae ne ola saitia.

⁸Ka ko nisi fuaga ne 'to ki te laukele e ola 'lei. Ne ola lakau kae ne fua mai taki selau fuaga i te lakau.” Kae ne toe faipati atu a Iesu penei, “Faka'logo mai la manafai e isi ne otou taliga!”

⁹Ne fesili atu soko o Iesu ki a ia, me se a te uiga o te tala fakatusa tenei.

¹⁰Muna a Iesu, “A te iloa o mea 'funa i te Malo o te Atua, ko oti ne tuku atu ki a koutou; kae ki nisi tino, e fakaasi atu i tala fakatusa, ko te mea ke mafai ne latou o 'kilo ki ei kae se lavea, o faka'logo foki kae se maina i ei.”

¹¹“Tenei te uiga o te tala fakatusa: A te fuaga ko te muna a te Atua.

¹²A te fuaga tela ne to i te alatu, e fakasino ki tino kola ne lagona ne latou; kae ne vau te Tiapolo o toe ave te muna keatea mai i olotou loto, ko te mea ke se talitonu latou, kae ke mo a foki ma 'sao latou.

¹³A te fuaga tela ne to i te laukele fatufatua, e fakasino ki tino kola ne lagona ne latou te muna, kae ne talia ne latou mo te fiafia. Ka ko te mea ne seki lagona malosi ki olotou loto; ne talitonu fua latou i ne mo taimi, kae ne to keatea i taimi ne fakaosoosogina ei latou.

¹⁴A te fuaga tela ne to i va o lakau makai'kai, e fakasino ki tino kola ne lagona ne latou; ka ko te uke o mea e mafaufau 'mafa ki ei, pela foki mo koloa mo mea fakafiafia o te olaga nei, ne taomia ei latou; kae ne seki ma'tua foki olotou fua.

¹⁵A te fuaga tela ne to ki loto i te laukele ola 'lei, e fakasino ki tino kola ne lagona ne latou te muna, kae ne tausi ne latou i te loto fiafia mo te fakamaoni, kae ne tumau eiloa ke oko ki te taimi ne fua mai ei.”

¹⁶ “E seai se tino e fa'ka se moli ko fakapulou ei ki se kumete, io me tuku mai lalo o se moega. Kae ke tuku eiloa ki luga i te tugamoli, ko te mea ke lavea ne tino te mainaga i te taimi e o'mai ei ki loto.

¹⁷ So se mea e 'funa ka fakaasi, mo so se mea foki e taotao ke galo, ka maua kae ka fakaasi ke iloa ne tino.

¹⁸“Tela la, ke fakaeteete koutou, kae fakalogo faka'lei; i te mea ko te tino tela e isi sena mea, ka toetuku atu ne mea ki a ia, ka ko te tino tela e seai ne ana mea, ka ave keatea mai i a ia a te mea foliki i tena taofi e i a ia.”

¹⁹Ne o'mai te matua mo taina o Iesu ki a ia, kae ne seki mafai o oko ki a ia i te mea e tokouke a tino.

²⁰E isi se tino ne muna atu ki a Iesu, “A tou matua mo ou taina, kola e 'tu i tua e fia fetaui ki a koe.”

²¹Muna a Iesu ki a latou katoa, “A toku matua mo oku taina, ko tino kola e lagona ne latou te muna a te Atua, kae tausi ne latou.”

²²I te aso e tasi, ne 'sopo Iesu mo ona soko i se poti kae ne fai atu ki a latou, “Tou olo ki te isi feitu o te namo.” Tela, fano ei te lotou malaga.

²³I te taimi ne fano ei te lotou poti, ka ko Iesu e moe. Ne agi malosi te matagi i luga o te namo, kae ne kamata o fonu te poti i te vai, tela ka tupu ei se fakalavelave lasi ki a latou.

²⁴Ne o'mai ona soko kae ne 'fagu a ia ke ala, olotou muna: “Te Aliki! A matou ka 'mate!” Ne tu ake ki luga a Iesu kae fakatonu atu ki te afā mo te vai sousou ke gata. Ne gata te afā mo te sou o te namo, ka ko oko eiloa i te malū.

²⁵Tela, faipati atu ei a ia ki ona soko, “Tefea te otou fakatuanaki?” Ka ko latou ko ofo kae ma'taku, kae faipati i a latou eiloa, “Ko oi te tino tenei? E fai atu ne ia fakatonuga ki matagi mo peau, kae ne faka'logo ki a ia!”

²⁶Iesu mo ana soko ne faimalaga i te poti ki te fenua ko Kelasa,[7] tela e tu i te isi feitu o te namo e feagai mo Kalilaia.

²⁷I te taimi ne oko ake ei a Iesu ki uta, ne fakafetaui mai ki a ia a te tagata mai te fa'kai tena, ko te tagata e 'nofo temoni i a ia. Ko leva te taimi ne nofo a ia e seai ne ona gatu, ka ko se nofo foki i se fale, kae nofo faeloa i tanuga.

²⁸I te laveaga ne ia a Iesu, ne kalaga malosi, kae ne fakasiga ki lalo i ona mua, kae ne faipati mo te leo maluga penei: “Iesu te Tama a te Atua Tafasili i te Maluga! Se a te mea e manako koe o fai ki a au? Au e fakamolemole atu ki a koe, sa fakasala mai au!”

²⁹Ne faipati a ia penei, i te mea ko oti ne fai te fakatonuga a Iesu ki te agaga masei, kae tiga eiloa te tausi o ia pela me se pagota, ne saisai ona lima mo vae ki filifili, ne 'motu ne ia filifili kae ne ave a ia ne te temoni ki te vao.

³⁰Ne fesili atu a Iesu ki a ia, “Ko oi tou igoa?” Ne tali mai a ia, “A toku igoa ko ‘Lekeono,”’ i te mea e tokouke temoni ko oti ne ulu ki loto i a ia.

³¹A temoni ne fakamolemole ki a Iesu, ke se uga latou ke olo ki mone.[8]

³²E isi se lafu puaka e pili mai, e kai'kai i te feitu o te mauga. A temoni ne fakamolemole ki a Iesu, ke tuku atu latou ke olo ki puaka.

³³Tela, olo ei temoni ki tua mai te tagata, kae ne ulu ki loto i puaka. Ne 'tele ifo a te lafu puaka ki lalo i tafa o te mauga, 'to ki loto i te vai, ma'lemu 'mate eiloa.

³⁴Ne lavea ne tino tausi puaka a te mea ne tupu, tela 'tele ei latou kae fakasalalau atu a te tala i te fa'kai mo fenua katoa.

³⁵Ne olo atu a tino o onoono i te mea ne tupu. Ne o'mai latou ki a Iesu, kae ne maua ne latou a te tagata tela ne olo keatea mai i a ia temoni e nofo i vae o Iesu, ko iai ona gatu ka ko atamai foki, kae ne ma'taku katoa latou.

³⁶A tino kola ne lavea ne latou, ne tala atu ki tino a te faiga ke 'lei te tagata tena.

³⁷Tela, fakamolemole atu ei tino katoa o te fenua ko Kelasa ki a Iesu ke fano keatea, i te mea ko oko eiloa i te ma'taku latou katoa. Tela, sopo ei a Iesu ki te poti o fano keatea.

³⁸A te tagata tela ne olo keatea mai i a ia a temoni, ne fakamolemole penei ki a Iesu, “Talia mai au ke fanatu i a koe.” Kae ne uga ne Iesu a ia ke fano, kae ne faipati atu penei:

³⁹“Foki ki tou kaiga, kae fakamatala atu a mea ko oti ne fai ne te Atua mo koe.” A te tagata ne fano i te fa'kai katoa, kae ne fakamatala ne ia a mea ko oti ne fai ne Iesu mō ia.

⁴⁰I te taimi ne toe foki mai ei a Iesu ki te isi feitu o te namo, e tokouke ne fakafetaui ki a ia, i te mea ne fakatalitali latou katoa ki a ia.

⁴¹I kona foki eiloa, kae oko mai te tagata e igoa ki a Iailo. Ko ia te pule o te fale tapuaki i te koga tena. Ne totuli i mua o Iesu, kae fakamolemole ki a ia ke fanatu ki tena fale,

⁴²me i tena tama fafine, ko tena fuatasi, ko sefulu lua ona tausaga, ko tai mate. I te taimi ne fanatu ei a Iesu, ko i takitaki tino i ona feitu katoa.

⁴³E isi se fafine i te koga tena, ne tafe tena sua i tausaga e sefulu lua, ko palele eiloa ana tupe ne 'togi ki tokita,[9] kae e seai eiloa se tino ne mafai o fai ke 'lei tena masaki.

⁴⁴Ne vau a ia i tino kola ne o'mai i tua o Iesu, kae ne fakapatele ki te kapakapa o tena gatu, kae ne gata fakavave te tafe o tena sua.

⁴⁵Ne fesili atu a Iesu, “Ko oi te tino ne fakapatele mai ki a au?” A tino katoa ne faka'fiti, kae ne muna mai Petelu, “Te Aliki, a koe ko mumu ne tino kae fakatauteke atu ki a koe.”

⁴⁶Kae ne tali atu a Iesu, “E isi eiloa se tino ne fakapatele mai ki a au, me ne iloa ne au te tekaga keatea o te mana mai i a au.”

⁴⁷Ne lavea ne te fafine i a ia ko iloa, tela, vau ei a ia, ko polepole i te mataku, kae ne totuli i mua o Iesu. I kona foki eiloa, fakaasi atu ne ia ki a Iesu mo tino katoa a te ala ne fakapatele atu ei a ia ki a ia, mo te 'lei fakavave o tena masaki.

⁴⁸Muna a Iesu ki a ia, “Taku tama fafine, ko ola koe i tou fakatuanaki. Fano mo te manuia.”

⁴⁹I te taimi ne fai ei muna konei a Iesu, kae oko mai te avefekau mai te fale o te pule o te fale tapuaki. Ana muna ki a Iailo, “A tau tama fafine ko mate, sa toe fakalavelave ki te Faiakoga.”

⁵⁰Ne lagona ne Iesu kae fai atu ki a Iailo, “Sa mataku; talitonu fua, ko te mea eiloa ko 'lei a ia.”

⁵¹I tena okoga ki te fale, ne seki talia ne ia se tino ke olo laua ki loto, kae na ko Petelu, Ioane mo Iakopo, mo matua ei o te tamaliki.

⁵²A tino katoa i te koga tena, e 'tagi kae fanoa'noa ona ko te tamaliki. Muna a Iesu, “Sa 'tagi, a te tamaliki e seki mate e moe fua!”

⁵³Ne fakatauemu latou katoa ki a ia, i te mea ne iloa ne latou i te tamaliki ko mate.

⁵⁴Ka ko Iesu ne puke ki te lima o te tamaliki kae kalaga ki luga, “Nofo mai ki luga!”

⁵⁵Ne toe ola, kae ne nofo ake fakavave; kae ne fai atu te fakatonuga a Iesu ki a latou ke fagai.

⁵⁶Ko oko eiloa i te ofo ona matua, kae ne fakatonu atu a Iesu ki a laua, ke sa tala atu ki so se tino a te mea ne tupu.