Read Te Tusi Tapu I Te Gana Tuvalu Lomiga Lua LUKA 9 Bible Online

LUKA 9 - Te Tusi Tapu I Te Gana Tuvalu Lomiga Lua bible

LUKA 9

¹Ne 'luku fakatasi ne Iesu ona soko e tinoagafulu mo te tokolua, kae ne tuku atu ki a latou te mana mo te malosi o afuli keatea agaga ma'sei, pela foki mo te faiga ke 'lei a masaki.

²Oti, uga ei latou ne ia ke olo o takutaku atu a te tala i te Malo o te Atua, mo te fai ke 'lei masaki.

³Ana muna ki a latou: “Mo a ma ave ne koutou se mea i te malaga, se tokotoko, se taga, ne meakai, me se tupe. Mo a foki ma takilua ne tilima.

⁴So se koga e talia i ei koutou, 'nofo eiloa i te fale tena, ke oko ki te taimi e tiakina ei ne koutou a te fa'kai tena.

⁵So se koga e se talia i ei koutou ne tino, tiakina te fa'kai tena, kae tuetue keatea a pefu mai i otou vae, pela me se akoakoga ki a latou.”

⁶Ne olo a soko, kae ne afe i fa'kai katoa o talai te Tala 'Lei kae fai ke 'lei a masaki i koga katoa.

⁷ A Helota te pule o Kalilaia, ne logo i mea katoa kola ne 'tupu. Ko oko eiloa i te fi'fi ona mafaufauga, me e isi ne tino ne fai mai penei, “A Ioane te Papatiso ko toe ola mai!”

⁸Ka ko nisi tino ne taofi pela i a Elia ko toe ola mai, ka ko nisi tino ne fai mai me e isi se tino o te kau pelofeta taumua ko toe ola mai.

⁹Muna a Helota, “Ko oti ne kati ne au te ua o Ioane; ka ko oi te tino tenei ko lagona atu ne au a pati a tino e fai ki ei?” Kae ne taumafai eiloa a ia ke lavea ne ia a Iesu.

¹⁰Ne 'foki mai apositolo, kae ne taku mai ki a Iesu a mea katoa ko oti ne fai ne latou. Ne olo fakatasi mo ona soko, oti, tuku atu ei latou ke olo ki te fa'kai e igoa ki a Petesaita.

¹¹I te lagonaga ne tino a tala e uiga ki a Iesu, ne tau'tali latou i a ia. Ne talia ne ia latou, kae ne faipati ki a latou e uiga ki te Malo o te Atua, kae ne fai foki ne ia ke 'lei a masaki o tino kola ne ma'nako ki ei.

¹²Ko pili o to te la, kae o'mai te tinogafulu mo te tokolua soko ki a ia, kae fai mai: “Uga atu a tino ke olo ki fa'kai 'lasi mo fa'kai fo'liki kola e pili mai ki konei, ko te mea ke maua ne meakai mo koga mo 'nofo; me i te koga nei se koga lavaki.”

¹³Ka ko Iesu ne fai atu penei ki a latou, “Avatu ne koutou ne meakai mo olotou 'kai.” Ne tali mai latou, “A motou mea konei, e lima fua falaoa mo ika e luagamata. E manako koe ke olo matou o 'togi ne meakai ma te vaitino katoa konei?”

¹⁴Kāti e tusa mo te lima afe tagata i kona. Muna a Iesu ki ona soko, “Fai atu ki tino ke 'nofo ki lalo i potukau e taki tinolima.”

¹⁵Ne fai pena ne soko, kae ne 'nofo katoa ki lalo a tino.

¹⁶Ne puke ne Iesu a falaoa e lima mo ika e luagamata, ne kilo ake ki te lagi, kae ne fakafetai ki te Atua mo mea kona. Ne tofitofi ne ia a falaoa mo ika, kae tuku atu ki ona soko ke tufatufa atu ki tino.

¹⁷Ne 'kai katoa latou, kae ne ma'kona; kae ne 'fao ne soko a tapola e sefulu lua ki toega meakai.

¹⁸I te sua taimi ne 'talo tokotasi a Iesu; kae ne o'mai ki a ia ona soko. Ne fesili atu a ia ki a latou penei: “Ni a pati a te vaitino me ko oi au?”

¹⁹Ne tali mai latou penei, “Muna a nisi tino i a koe ko Ioane te Papatiso. Nisi tino e taofi i a koe ko Elia, ka ko nisi tino e taofi i a koe se pelofeta ko toe ola mai, mai i pelofeta i aso taumua loa.”

²⁰ Ne fesili atu a ia ki a latou, “Ka ko koutou, se a te otou mau me ko oi au?” Ne tali mai Petelu penei, “A koe ko te Keliso a te Atua!”

²¹I te taimi tena, ne fai atu te fakatonuga 'mafa a Iesu ki a latou, ke se fakaasi a te mea tenei ki se tino.

²²Kae ne toe fai atu a ia penei: “Ka ko au te Tama a te Tagata, e 'tau o logo'mae i mea e uke, kae se talia foki ne toeaina, faitaulaga sili mo faiakoga o te Tulafono. Ka tamate au, kae ka toe ola mai i te tolu o aso.”

²³ Ne muna atu a ia ki tino katoa: “Kafai se tino e manako o vau ki a au, e 'tau mo ia o fakapuli tena foitino, amo tena sataulo i aso katoa, kae tautali mai i a au.

²⁴ A te tino e fia fakasao ne ia tena ola mo ia ake eiloa, e se maua ne ia; ka ko te tino e fakamaumau ne ia a tena ola ona ko au, e ola a ia.

²⁵E a, e isi se mea a se tino e maua, manafai e maua ne ia te lalolagi katoa, kae maumau ei a tena ola? E seai lele eiloa!

²⁶Kafai se tino e taema i a au mo aku muna, ka taema foki au te Tama a te Tagata i a ia, manafai ko vau au i toku 'malu mo te 'malu o toku Tamana mo te 'malu o te kau agelu tapu.

²⁷Au e fai tonu atu ki a koutou, e isi ne tino i konei ka se 'mate, ke oko eiloa ki te taimi ka lavea ei ne latou a te Malo o te Atua.”

²⁸ Kāti ko tusa mo se vaiaso e tasi mai tua i te faipatiga ne ia a muna konei, kae ave ne Iesu a Petelu, Ioane mo Iakopo ki luga i se mauga o 'talo.

²⁹I te itula ne 'talo ei a ia, ne mafuli ona foliga e pela foki mo ona gatu, ko kena pakipaki eiloa.

³⁰I te taimi foki eiloa tena, e tokolua tagata ko fai'pati mo ia. A te tokolua kona, ko Mose mo Elia,

³¹kola ne fakaasi mai i te malapulapu mai te lagi, kae ne fai'pati mo Iesu e uiga mo te fakataunuga ne ia a te loto o te Atua, ke mate a ia i Ielusalema.

³²A Petelu mo ona taugasoa ko 'moe pala'pala, i te alaakega, lavea ei ne latou te 'malu o Iesu mo te tokolua tagata e 'tu mo ia.

³³I te taimi ne olo ei keatea a te tokolua kona mai i a Iesu, kae fai atu a Petelu ki a ia: “Te Takitaki, se mea 'lei ke 'nofo tatou i konei. Ka faite ne matou ne fakamalumalu e tolu. E tasi mo koe, e tasi mo Mose kae tasi mo Elia.” A muna kona ne faipati fua ne Petelu, kae ne seki iloa ne ia me ne a ana pati ne fai.

³⁴Ka koi faipati a ia, ne fanake te kaumana, fakapulougina ei latou, kae ne ma'taku a soko i te okoga o te kaumana ki luga o latou.

³⁵ E isi se leo ne vau mai i te kaumana penei: “Ko taku Tama tenei, tela ko oti ne filifili ne au, faka'logo la ki a ia.”

³⁶I te motuga o te leo, ko Iesu fua tokotasi koi 'toe mai. Ne seki faipatigina ne soko a mea katoa konei, kae ne seki fai'pati atu eiloa ki se tino e tokotasi i aso kona, e uiga mo mea ko oti ne lavea ne latou.

³⁷I te taeaoakega ne olo ifo latou ki lalo mai i te mauga, kae ne fakafetaui atu ki a Iesu a te vaitino e tokouke.

³⁸E isi se tagata ne kalaga mai i te vaitino tena penei: “Te Faiakoga! Au e fakamolemole atu ki a koe, ke onoono ake koe ki taku tama tagata; ko taku tama tagata eiloa e tokotasi.

³⁹E isi se agaga masei e puke sale ne ia a ia ke pakalaga kae fakavalevale, kae 'sofi ifo foki mo te takapiaga i ona gutu. E fakafita eiloa a ia pena ne te agaga masei, kae mumea eiloa ko se fano keatea.

⁴⁰Ne fakamolemole au ki ou soko ke afuli keatea te agaga masei, kae ne seki mafai ne latou.”

⁴¹Ne tali atu a Iesu penei: “Ko seai la se kautama se talitonu kae fai mea piko'piko e pela mo koutou! Ka nofo au i a koutou ke afea? Ka kufaki au ki a koutou ke afea?” Tela, muna atu ei a ia ki te tagata, “Aumai tau tama tagata ki konei.”

⁴²I te vauga o te tamaliki, ne fakasiga a ia ne te temoni ki lalo i te laukele, kae ne fai ne ia ke fakavalevale. Ne fai atu te fakatonuga a Iesu ki te agaga masei, 'lei ei mo te tamaliki, fakafoki atu ei ki tena tamana.

⁴³A tino katoa ne ofo i te malosi o te mana o te Atua. A tino koi ofo eiloa i mea katoa ne fai ne Iesu, i tena faipatiatuga ki ona soko penei:

⁴⁴“Sa puli a pati konei ka fai atu ne au ki a koutou! Ka ko au te Tama a te Tagata ka tuku atu ki te pulega a tagata.”

⁴⁵Kae ne seki iloa ne latou me se a te uiga o te muna tenei. Ko oti ne 'funa mai i a latou, ko te mea ke se lotou iloagina; kae ne ma'taku latou o fesili ki a ia e uiga mo te mea tena.

⁴⁶ Ko tupu se kinauga i soko me ko oi te tino i a latou e sili.

⁴⁷Ne iloa ne Iesu olotou mafaufauga, tela ne puke ei ne ia te tamaliki, kae ne fakatu ne ia i ona tafa,

⁴⁸ kae ne fai atu ki a latou penei: “Ko te tino tela e talia ne ia a te tamaliki tenei i toku igoa, e talia foki ne ia au; ka ko te tino tela e talia ne ia au, e talia foki ne ia a te tino tela ne uga mai ne ia au. Me ko te tino tela e se taulia i a koutou katoa, ko te tino tena e sili i te maluga.”

⁴⁹Ko faipati mai a Ioane penei: “Te Takitaki, ne lavea ne matou se tagata e afuli ne ia keatea a temoni i tou igoa, kae ne muna atu matou ki ei ke fakagata, me i a ia e se kau i a tatou.”

⁵⁰Muna a Iesu ki a ia mo isi soko, “Sa taumafai o taofi a ia, so se tino e se 'teke mai ki a koutou, e kau koutou.”

⁵¹Ko pili mai aso ka ave ei a Iesu ki te lagi, ne fatuaki tena loto kae ne kamata tena malaga o fano ki Ielusalema.

⁵²Ne uga ne ia avefekau ke 'mua i a ia, kola ne olo ki loto i se fa'kai o Samalia o fakatoka a mea katoa mo ia.

⁵³Ka ko tino i te fa'kai tena, ne se talia ne latou a ia; i te mea ne iloa tonu ne latou i a ia e fano ki Ielusalema.

⁵⁴ I te iloaga ne ona soko ko Iakopo mo Ioane a te mea tenei, a la muna, “Te Aliki, e manako koe ke ka'laga maua ki te afi mai te lagi, ke 'sunu latou ke palele?”[10]

⁵⁵Ne mafuli atu a Iesu kae ne 'liko atu ki a laua;[11]

⁵⁶kae ne olo atu eiloa latou ki te sua fa'kai.

⁵⁷I te lotou ologa i te auala, e isi se tagata ne muna mai ki a Iesu penei: “Au ka tautali atu ki a koe ki so se koga e fano koe ki ei.”

⁵⁸Muna a Iesu ki a ia, “E isi ne lua o alope, mo manueva e isi foki ne olotou ofaga, ka ko au te Tama a te Tagata, e seai se koga mo oku fakatapū.”

⁵⁹Ne fai atu ki te isi tagata, “Tautali mai i a au.” Kae ne tali mai a ia, “Te Aliki, tuku mua mai au ke fano o tanu toku tamana.”

⁶⁰Ne tali atu penei a Iesu, “Tuku i ei a tino 'mate ke tanu olotou tino 'mate. Fano koe o takutaku atu te tala i te Malo o te Atua.”

⁶¹ Muna a te sua tagata, “Te Aliki, ka tautali au i a koe, kae tuku mua mai au ke fano o fakamavae ki toku kaiga.”

⁶²Muna a Iesu ki a ia, “So se tino e kamata o fakamalu te laukele, kae kilokilo 'soko ki ona tua e se aoga mo te Malo o te Atua.”