Read Te Tusi Tapu I Te Gana Tuvalu Lomiga Lua TEUTELONOME 11 Bible Online

TEUTELONOME 11 - Te Tusi Tapu I Te Gana Tuvalu Lomiga Lua bible

TEUTELONOME 11

¹“Ke alofa koutou ki te Aliki te otou Atua, kae tausi faeloa ki ana tulafono.

²Masaua i te aso nei a mea ne tauloto ne koutou e uiga ki te Aliki, e pela eiloa mo mea ne lavea ne koutou e fai sale ne ia. Ko koutou ne lavea ne koutou a mea kona, kae se ko otou tamaliki.

³ Ne lavea ne koutou te 'mana o te Atua i ana mea fakaofoofogia ne fai. Ne lavea ne koutou a mea ne fai ne ia ki te tupu o Aikupito ke oko eiloa ki tena fenua katoa.

⁴ Ne lavea ne koutou te 'tamatega ne te Aliki a te kautau a Aikupito, fakatasi mo olotou solofanua mo kaliota, i te taimi ne o'mai ei o afuli koutou i loto i te Tai Kula.

⁵E iloa ne koutou a te mea ne fai ne te Aliki mo koutou i te vao, kae koi tuai o oko mai koutou ki konei.

⁶ E masaua ne koutou te mea ne fai ne ia ki a Tatano mo Apilamo, tamaliki tagata a Eliapo mai i te matakaiga o Leupena. Ne lavea katoa eiloa ne tino a te vaeluaga o te laukele kae to a laua kona ki loto i ei, fakatasi mo o la kaiga, olotou faleie, olotou tavini mo olotou manu.

⁷E tonu eiloa me ko koutou konei kola ko oti ne lavea ne koutou a mea fakaofoofogia kola ne fai ne te Aliki.

⁸“Tausi ki tulafono katoa kola ko oti ne avatu ne au ki a koutou i te aso nei, kae ka talia ne au koutou ke olo atu ki te sua feitu o te vaitafe, ki te fenua tela ka olo koutou ki ei.

⁹Ka mafai foki koutou o 'nofo leva i te fenua maumea kae laukele ola tena, te fenua ne tauto te Aliki ke tuku ki otou tupuga mo tino i olotou gafa.

¹⁰A te fenua tena ka 'nofo koutou i ei, e se 'pau mo te fenua o Aikupito, tela ne nofo koutou i ei. I te otou nofoga i Aikupito, kafai e toki otou lakau, a koutou e galue malosi o fakasusu a fatoaga.

¹¹Ka ko te fenua tena ka olo koutou ki ei, se fenua e uke mauga mo vanu i ei, se fenua e fakasusu ne vaiua.

¹²A te Aliki te otou Atua e tausi fakalei ne ia a te fenua tenei, kae e onoono fakalei ki ei i te tausaga katoa.

¹³ “Tela la, tausi ki tulafono konei ne avatu ne au i te aso nei; alofa ki te Aliki te otou Atua kae tavini atu ki a ia mo otou loto katoa.

¹⁴Kafai e tausi ne koutou a tulafono kona, kae ka aumai ne ia a vaiua ki te otou fenua i te taimi 'tau, i te tau o te uaga muamua, pela foki i te tau o te muakiga, ko te mea ke isi ne saito ma koutou, pela foki uaina mo sinu olive,

¹⁵mo mouku mo kaikai otou pulumakau. Ka maua ne koutou a vaega meakai katoa e manako koutou ki ei.

¹⁶Sa fulitua ki te Aliki o tapuaki atu ki nisi atua fakaatea.

¹⁷Kafai e fai koutou pena, ko te Aliki ka kaitaua ki a koutou. Ka taofi ne ia ke seai ne vaiua e to, tena la, ka malo te laukele, ko seai ne lakau e mafai o ola i ei. Tena la, ka mate vave koutou i kona, ka ko te laukele tena ne avatu ne ia mo koutou se laukele gali faeloa.

¹⁸ “Ke manatua ne koutou a fakatonuga konei, kae tausi fakalei. Tusi ki se pepa kae sai ki otou lima pela foki ki otou lae ko te mea ke masaua faeloa ne koutou.

¹⁹Akoako atu foki a fakatonuga kona ki otou tamaliki. Ke faipati faeloa koutou e uiga ki fakatonuga kona i loto i otou kaiga, pela foki manafai e nofo mao koutou, pela foki manafai e malolo io me galue koutou.

²⁰Ke tusi foki ne koutou ki pou o mataloa o otou fale, pela foki ki mataloa o otou 'pui.

²¹Tena la, ka nofo leva ei koutou i te fenua tenei ne tauto te Aliki te otou Atua ke ave ki otou tupuga. Ka nofo koutou i kona ke oko eiloa ki te se gata mai.

²²“Tausi fakamaoni ki tulafono katoa konei ne avatu ne au ki a koutou: Ke alofa koutou ki te Aliki te otou Atua, fai a mea katoa kola e fakatonu mai ne ia kae ke tumau te otou fakamaoni ki a ia.

²³Tena la, ka afuli keatea ne ia a malo kona i te taimi e olo atu ei koutou, kae ka nofo koutou i te fenua ne nofo ei a malo kola e lasi kae malosi atu i a koutou.

²⁴ A te laukele tena ka olo atu koutou i ei e o koutou katoa. A te otou fenua ka fanatu mai i te koga lavaki i saute ke oko ki Mauga o Lepanona i matu, kae mai i te saegala, e kamata atu mai i te Vaitafe o Eufilate ke oko ki te Tai Metitilani i te togala.

²⁵I so se koga e olo koutou i ei i te fenua tena, ka fai ne te Aliki a tino o koga kona ke mataku i a koutou, e pela eiloa mo tena tautoga, kae ka seai se tino e mafai o pono ne ia koutou.

²⁶“Ko tuku atu nei ne au i te aso nei ke filifili koutou i mea konei e lua, te fakamanuiaga me ko te fakamalaiaga.

²⁷Ka maua ne koutou te fakamanuiaga, manafai e tausi fakalei koutou ki fakatonuga a te Aliki te otou Atua konei ne avatu ne au i te aso nei.

²⁸Ka maua ne koutou te fakamalaiaga manafai e se tausi ne koutou a fakatonuga konei, kae fulitua koutou ki te Aliki o tapuaki atu ki nisi atua fakaatea kola e seki tapuaki eiloa koutou ki ei i aso mua.

²⁹ Kafai ko aumai koutou ne te Aliki ki te fenua tela ka nofo koutou i ei, e tau mo koutou o folafola a muna fakamanuia mai i te Mauga o Kelisima ka ko muna fakamalaia ke folafola mai i te Mauga o Epalu.

³⁰A mauga konei e lua e tu i te feitu ki te togala o te Vaitafe o Iolitana i te fenua o tino Kanana, kola e nofo i te Vanu o te Iolitana. A mauga kona e tu ki te togala, e se mao mai i Mole, te koga e tu ei a lakau tapu, tela e pili ki te fa'kai o Kilikala.

³¹A koutou nei ka olo atu ki te sua feitu ne tuku atu ne te Atua mo koutou. Kafai ko maua ne koutou te fenua tena, kae ko nofo foki koutou i ei,

³²masaua o tausi ki tulafono katoa konei ne avatu ne au i te aso nei.