Read Te Tusi Tapu I Te Gana Tuvalu Lomiga Lua TEUTELONOME 12 Bible Online

TEUTELONOME 12 - Te Tusi Tapu I Te Gana Tuvalu Lomiga Lua bible

TEUTELONOME 12

¹“Konei a tulafono kola e tau o tausi ne koutou i aso e nofo ei koutou i te fenua tela ne avatu ne te Aliki te Atua o otou tupuga ki a koutou. Fakalogo fakalei ke folafola atu ne au!

²Kafai ko nofo koutou i te fenua tena, masaua o ofa a koga katoa kola e tapuaki sale i ei a tino kona e nofo i te fenua ki olotou atua. Ofa katoa a koga tapuaki o latou kola e tu i luga i mauga maluga, mauga foliki, pela foki a olotou koga tapuaki i lalo i malūga o lakau.

³ Ofa likiliki olotou fata-fai-taulaga, pela foki a pou fatu kola e tapuaki sale latou ki ei. Sunugina a fakatusa o te lotou atua fafine ko Asaila, kae kati ki lalo olotou tupua, ko te mea ke se toe tapuaki ne tino ki ei.

⁴“Sa tapuaki ki te Aliki te otou Atua e pela mo faigā tapuakiga a tino konei ki olotou atua.

⁵Ka filifili ne te Aliki te kogā koga e tasi mai kogā koga katoa e nofo ei a otou matakaiga e sefululua, ke fai mo koga e tapuaki atu ei a tino ki a ia.

⁶Tena te koga ka ofo atu ei otou taulaga sunu mo nisi taulaga a koutou, ke oko foki eiloa ki tasi vae sefulu kola e avatu ne koutou, mo meaalofa kola ne fakameaalofa ne koutou ki te Aliki, mo taulaga o te loto malie, mo uluaki tama a otou pulumakau mo mamoe.

⁷I kona, i mua o te Aliki tela ne fakamanuia ne ia koutou, ka kai kae fiafia koutou i mea 'lei ne galue koutou ki ei.

⁸“Kafai ko oko mai te taimi tena, sa toe tapuaki e pela mo otou faiga mua. A koutou mua ne masani o tapuaki ki te mea e loto koutou ki ei,

⁹me i a koutou e seki oko atu ki te fenua ne tauto mai te Aliki ke avatu mo koutou, te koga ka maua ei ne koutou te filemu.

¹⁰Kafai ko olo atu koutou ki te sua feitu o te Vaitafe o Iolitana, ko te Aliki ka fakanofo ne ia koutou i kona. Ka puipui ne ia koutou mai otou fili, kae ka nofo koutou mo te filemu.

¹¹Ka fili ne te Aliki te koga e tasi e tau o tapuaki atu a tino ki a ia, kae ka avatu ki kona ne koutou a mea kola ne fakatonu atu ne au: ko taulaga sunu a koutou, mo nisi taulaga, ko tasi vae sefulu a koutou mo taulaga saito, mo nisi meaalofa fakapitoa kola ne tauto koutou ke ave ki te Aliki.

¹²Ke fiafia koutou o nofo i mua o te Aliki, fakatasi mo otou tamaliki, otou tavini, mo sa Levi kona e nofo i otou fa'kai; masaua i te kau sa Levi e seai ne laukele totino o latou.

¹³E se tau o ofo ne otou taulaga i so se koga e manako koutou ki ei.

¹⁴E tau eiloa o ofo otou taulaga i te kogā koga e tasi tela ka fili ne te Aliki i se kogā koga o te otou fenua. Tena fua eiloa te koga e tau o ofo i ei otou taulaga sunu mo nisi mea kola ne fakatonu atu ne au ke fai ne koutou.

¹⁵“Kae e mafai faeloa ne koutou o ta otou manu o kai i so se koga e nofo koutou i ei. E mafai ne koutou o kai te aofaki e manako koutou o kai. A koutou katoa, faitalia me ma io me lailai i feitu fakatapuakiga, e taga o kai ki manu kona, e pela eiloa manafai e kai i kano o tia io me ko anitilope.

¹⁶ Kae e tapu koutou e kai ki olotou toto; e tau o ligi ne koutou ki luga i te laukele e pela me se vai.

¹⁷A mea kola ne ofo ne koutou ki te Aliki e tapu ma kai i koga e nofo ei koutou; me ko tasi vae sefulu o otou saito, uaina mo sinu olive, me ko uluaki tama a otou pulumakau mo mamoe, me ko meaalofa ne avatu ne koutou ki te Aliki, me ko taulaga lotomalie a koutou, ke oko foki eiloa ki nisi taulaga aka.

¹⁸A koutou mo otou tamaliki mo otou tavini mo sa Levi kola e nofo i te otou fa'kai, e tau koutou o kai a taulaga konei i mua o te Aliki te otou Atua, i te koga tapuaki e tasi tela ne fili ne te Aliki te otou Atua. Kae e tau mo koutou o fiafia i kona i mea katoa a koutou ne fai.

¹⁹Masaua o sa puli a te kau sa Levi i taimi katoa e nofo ei koutou i te otou fenua.

²⁰“Kafai ko fakalasi ne te Aliki a te otou fenua, e pela mo tena tautoga, ko mafai ei ne koutou o kai ki kano o manu i so se taimi e manako koutou ki ei.

²¹Kafai ko to mao a te koga tapuaki tela e tasi, tela ne fakatonu atu ne au ke tapuaki katoa koutou i ei, tena la, e mafai fua ne koutou o ta se pulumakau io me se mamoe, kae kai i otou fale, e pela eiloa mo aku muna ki a koutou.

²²So se tino i a koutou, faitalia me e ma i feitu fakatapuakiga me ikai, e mafai faeloa o kai ki kano manu kona, e pela eiloa manafai e kai koutou ki kano o tia io me ko anitilope.

²³ Kae masaua fua o sa kai ki kano o manu kae koi isi ne toto i ei, me i te toto ko te ola tena, tela la, e se tau o kai ne koutou a te ola fakatasi mo te kano manu.

²⁴Sa fakaaogagina te toto o kai ki ei, kae ave o ligi ki te laukele e pela me se vai.

²⁵Kafai e fakalogo koutou ki te fakatonuga tenei, ko te Aliki ka fiafia ki a koutou, kae ka fanofano lei otou olaga e pela foki a tino e tupu mai i a koutou.

²⁶Ave ki te koga tapuaki tela e tasi, a otou taulaga mo meaalofa kola ko oti ne avatu ne koutou mo te Aliki.

²⁷Ke ofo atu ne koutou i kona a taulaga kola e tau o sunu katoa i luga i te fata-fai-taulaga a te Aliki. Ofo atu foki a taulaga kola i kano manu kola e kai ne koutou ka ko te toto e ligi ki te fata-fai-taulaga.

²⁸Tausi fakalei ki mea katoa kola ne fakatonu atu ne au, kae ka fanofano lei otou olaga pela foki a tino i otou gafa, ki te se gata mai, me ka fai ne koutou a mea tonu mo mea e fiafia ki ei te Aliki te otou Atua.

²⁹“Ka ta fakapalele ne te Aliki te otou Atua a malo kona e nofo i te fenua tena ka puke ne koutou mo koutou.

³⁰Kafai ko oti ne ta fakapalele ne te Aliki a malo kona, masaua o sa tautali ki olotou tu mo amioga i olotou tapuakiga, i a koutou ma fakasala 'mafa. Sa taumafai o sukesuke ki faifaiga o tapuakiga a latou, ko te mea ke tautali koutou i olotou faifaiga.

³¹Sa tapuaki ki te Aliki te otou Atua e pela mo olotou tapuakiga ki olotou atua, me kafai e tapuaki latou ki olotou atua, e fai ne latou a amioga fakatakalialia katoa kola e se fiafia ki ei te Aliki. E sunu foki ne latou olotou tamaliki i luga i fata-fai-taulaga mo fai olotou taulaga.

³² “Ke fai ne koutou a mea katoa kola ne fakatonu atu ne au ki a koutou; sa fakaopoopogina ne mea ki ei, io me ave keatea ne mea mai i ei.