Read Te Tusi Tapu I Te Gana Tuvalu Lomiga Lua TEUTELONOME 13 Bible Online

TEUTELONOME 13 - Te Tusi Tapu I Te Gana Tuvalu Lomiga Lua bible

TEUTELONOME 13

¹“Ka isi se pelofeta io me se tino poto i fakamatalaga o moemiti ka valo ne ia a mea ka tupu i aso fakamuli,

²ko te mea ke takitaki ne ia koutou o tavini kae tapuaki ki atua kola e seki tapuaki eiloa koutou ki ei. Kafai foki eiloa e tonu e taunu ana valoaga,

³kae masaua eiloa o sa saga ki ei. Ko te Aliki te otou Atua e fai ne ia te tagata tena ke tofotofo ei koutou, me ko koutou e alofa tonu ki te Aliki mo otou loto katoa io me ikai.

⁴Tautali ki te Aliki kae mataku ki a ia; fakalogo ki a ia kae tausi ana fakatonuga; tapuaki atu ki a ia kae tavini fakamaoni ki a ia.

⁵Masaua o tamate so se pelofeta io me se tino fakamatala moemiti tela e fai atu ke teke koutou ki te Aliki tela ne fakasao ne ia koutou mai Aikupito, te koga ne nofo pologa ei koutou. A vaega tino pena e masei, me e taumafai o taki koutou keatea mai i te olaga tela ne fakatonu mai ne te Aliki ke nofo koutou i ei. E tau eiloa a ia o tamate, ko te mea ke seai se tino masei pena i otou tafa.

⁶“Ka mafai foki eiloa ne tou taina, io me ko tau tama tagata, io me ko tau tama fafine io me ko tau avaga tela e pele i tou loto, io me ko tou taugasoa pili eiloa o taki koe ke tapuaki ki atua fakaatea, ko atua kona e seki tapuaki eiloa koutou io me ko otou tupuga ki ei.

⁷E se taumate ka isi foki se tino i a latou ka fakamalosi ne ia tou loto ke tapuaki koe ki atua o tino konei e nofo i otou tafa io me ko atua o tino kola e nofo mao.

⁸Masaua o sa tautali i te mea tena e fai mai ne ia; sa fakalogo foki ki a ia. Ke moa eiloa koe e alofa ki ei, sa fano foki koe o puipui a ia mai fakalavelave.

⁹Puke atu a ia o tamate! Taumafai ke pei muamua ne koe ki fatu, ko tuku atu ei ke peipei ne te vaitino ki fatu.

¹⁰Peipei atu a ia ki fatu ke mate! Ne taumafai a ia o taki koutou keatea mai i te Aliki te otou Atua, tela ne fakasao ne ia koutou mai Aikupito, te koga ne nofo pologa ei koutou.

¹¹Ka logo a tino katoa o Isalaelu i te mea ne tupu, ka mataku latou, ko seai ei se tino e toe fai ne ia se vaega mea masei pena.

¹²“Kafai ko nofo koutou i fa'kai kola ne avatu ne te Aliki te otou Atua, ka lagona ne koutou se tala,

¹³me e isi ne tino masei o te otou fenua ne taki ne latou a tino i olotou fa'kai ke tapuaki ki atua kola e seki tapuaki eiloa koutou ki ei.

¹⁴Kafai e isi se tala pena ne lagona ne koutou, taumafai o sukesuke fakalei; kafai e tonu e isi se mea pena ne tupu,

¹⁵ke tamate la ne koutou a tino i fa'kai kona, pela foki mo pulumakau katoa a latou. Ofa fakamasei te fa'kai tena, kae ta fakapalele a tino i ei.

¹⁶Puke mai a kope katoa o tino kona i te fa'kai tena. Ka oti ko sunu ei a te fa'kai tena mo mea katoa i ei, ke fai mo taulaga ki te Aliki te otou Atua. A te fa'kai tena e tau eiloa o tiakina pena, kae ke mo a e toe fakafou.

¹⁷Sa tausi ne koutou ne mea taua mai mea o te fa'kai tena, me ko oti katoa ne tuku ke fakamasei. Kafai e fakalogo koutou ki te fakatonuga tena, kae ka se ita atu te Aliki ki a koutou. Ka alofa atu a ia ki a koutou, kae fakatokouke ne ia koutou, e pela eiloa mo tena tautoga ki otou tupuga,

¹⁸manafai e tausi ne koutou ana fakatonuga katoa konei ne avatu ne au i te aso nei, kae fai foki ne koutou te mea e manako a ia ki ei.