Read Te Tusi Tapu I Te Gana Tuvalu Lomiga Lua TEUTELONOME 15 Bible Online

TEUTELONOME 15 - Te Tusi Tapu I Te Gana Tuvalu Lomiga Lua bible

TEUTELONOME 15

¹“I te fakaotiga o te taki fitu o tausaga, e tau mo koutou o fakamagalo a kaitalafu a tino kola ne kaitalafu tupe i a koutou.

²E penei te faiga. A latou katoa kola ne tuku fakakaitalafu olotou tupe ki taina Isalaelu o latou e tau nei o fakamagalo ne latou a kaitalafu kona. E se tau mo latou o taumafai o fai ki tino ke aumai olotou kaitalafu tupe; ko oti ne fakatonu mai te Aliki ke fakamagalo a kaitalafu katoa kona.

³E mafai ne koe o tae mai a kaitalafu a tino fakaatea kola ne kaitalafu i a koe, kae e se tau o tae ne koe a kaitalafu a tino o tou fenua i a koe.

⁴“A te Aliki te otou Atua ka fakamanuia ne ia koutou i te fenua tena ne avatu ne ia mo koutou. E seai eiloa se tino i a koutou e mativa

⁵manafai e fakalogo koutou ki a ia, kae tausi fakalei ki mea katoa konei ne fakatonu atu ne au i te aso nei.

⁶Ka fakamanuia eiloa koutou ne te Aliki, e pela eiloa mo tena tautoga. Ka tuku fakakaitalafu ne koutou a tupe ki malo e uke, ka ko koutou ka se mafai o kaitalafu tupe mai i nisi malo; ka pule ne koutou a malo e uke, kae ka seai se malo e pule ne ia koutou.

⁷ “Kafai e isi ne taina Isalaelu o koutou kola e nofo i so se fa'kai i te fenua ne avatu ne te Aliki te otou Atua mo koutou, e manako ki se fesoasoani, masaua o sa kaiu ki a latou, kae sa ita foki o fesoasoani ki a latou.

⁸Avatu ki a latou so se mea e manako latou ki ei.

⁹Sa manatu pela me ona ko pili mai te tausaga e fakamagalo ei a kaitalafu, ko se tau ei o avatu ne koe se tupe ke kaitalafu ne ia. Ke mo a eiloa e talia ne koutou ne vaega mafaufauga masei pena. Kafai e ita koe ma avatu se tupe kaitalafu ki a ia, ka kalaga a ia ki te Aliki e uiga ki a koe, tena la, ka taia ei koe i te agasala.

¹⁰Avatu ki a ia so se mea e manako a ia ki ei, kae fai mo te lotomalie, kae ka fakamanuia koe ne te Aliki i au mea katoa e fai.

¹¹E isi eiloa ne tino Isalaelu e mativa kae puapuaga, tela la, au e fakatonu atu ke alofa koutou o avatu ne mea ma latou.

¹² “Kafai e isi se tino Isalaelu, me se tagata io me se fafine, ne togi atu a ia ke fai mo au pologa,[11] e tau o fakasaoloto ne koe a ia manafai ko oti ne galue i a koe i tausaga e ono. I te fitu o tausaga, ko tau o fakasaoloto ne koe.

¹³Kafai ko fakasaoloto ne koe a te pologa tena, sa tukugina ke fano seai ne ana mea e fano mo ia.

¹⁴Alofa ki a ia o avatu ne ana mea mai au mea kola ne maua mai i te fakamanuiaga a te Aliki — ko mamoe, saito mo uaina.

¹⁵Masaua i a koutou ne nofo pologa i Aikupito kae ne fakasao koutou ne te Aliki te otou Atua; tena te mea e tuku atu ei ne au a te fakatonuga tenei.

¹⁶“Kafai tau pologa e se fia saoloto me e alofa ki a koe mo tou kaiga, kae ko loto o nofo i a koe,

¹⁷ko ave ei ne koe ki te mataloa o tou fale o fakapu tena taliga; ka fai ei a ia mo pologa a koe i tena olaga katoa. A otou tavini fafine e fai foki pena.

¹⁸Sa fanoanoa manafai ko fakasaoloto ne koutou otou pologa; kola ko oti ne galue mo koe i tausaga e ono, i se togi e tusa mo te afā te togi o te tavini. [12] Ke fai ne koutou a te mea tena, kae ka fakamanuia koutou ne te Aliki te otou Atua i otou mea katoa e fai.

¹⁹ “A uluaki tama tagata katoa a otou pulumakau mo mamoe ke tuku katoa ma te Aliki te otou Atua; sa fakagaluegina a pulumakau konei, sa velegina foki a mamoe konei.

²⁰I tausaga takitasi, e tau koutou mo otou kaiga takitasi o kai a manu kona i mua o te Aliki, i te koga tapuaki tela e tasi eiloa.

²¹Kae kafai e isi ne pona o se manu i manu kona, me e 'pili io me e kivi io me se isi pona aka fakaatea, tena la, ko se tau ei o ofo atu ki te Aliki te otou Atua.

²²E mafai ne koutou o kai a vaega manu pena i otou fale. E lei faeloa manafai e kai katoa koutou ki ei, faitalia me ko koutou e ma io me e lailai i feitu fakatapuakiga, e pela eiloa manafai e kai koutou ki tia io me ne anetelope.

²³ Sa fakaaoga olotou toto mo fai otou meakai; e tau eiloa o ligi ne koutou ki te laukele e pela me ne vai.