Read Te Tusi Tapu I Te Gana Tuvalu Lomiga Lua TEUTELONOME 16 Bible Online

TEUTELONOME 16 - Te Tusi Tapu I Te Gana Tuvalu Lomiga Lua bible

TEUTELONOME 16

¹ “Ke fakamanatu ne koutou te Paseka i te masina o Apipa, e fakaaloalo ei koutou ki te Aliki te otou Atua; ko te po e tasi i te masina tena, ne fakasao ei ne ia koutou mai Aikupito.

²Olo ki te koga tapuaki, ta otou mamoe takitasi, io me ne pulumakau, mo fai te kaiga o te Paseka e fakaaloalogia ei te Aliki te otou Atua.

³Kafai ko kai koutou i te kaiga tena, masaua o sa kai ki falaoa ne palu ki mea fakafete. E fitu aso e se kai ei koutou ki falaoa ne palu ki mea fakafete, e pela eiloa mo te taimi ne tiaki fakavave ei ne koutou Aikupito. Kai koutou i te falaoa tena me ka fakaigoa ko te falaoa o puapuaga, me i tausaga katoa e ola ei koutou, ka masaua faeloa ne koutou a te aso ne o'mai ei koutou keatea mai Aikupito, te koga o puapuaga.

⁴I aso e fitu, e tapu eiloa se tino e teu se mea fakafete i tena fale; a te kano o te manu ne ta i te afiafi o te po muamua, e tau o kai eiloa ke oti i te po tena.

⁵‘‘Tamate a te manu o te Paseka i te koga o te tapuakiga—kae e se fai ake eiloa i sose koga o te fenua tela ne tuku atu ne te Aliki te otou Atua. Fai i te afiafi i tua o te tōga o te la, tela ko te taimi o te aso ne tiakina ei ne koutou a Aikupito.

⁷Saka a kano manu kae ke kai i te koga tapuaki tela ne filifilia ne te Aliki; kae i te tafataeao, ko toe foki atu ei koutou ki otou fale.

⁸I aso e ono konei mai mua, e tau koutou o kai ki falaoa se fakafete, kae i te fitu o aso ke maopoopo koutou o tapuaki atu ki te Aliki te otou Atua, kae ke seai ne otou galuega e fai i te aso tena.

⁹“E fitu vaiaso mai i te taimi ne kamata ei o kati te saito,

¹⁰kae fakamanatu ne koutou te Kaiga o te Katiga o Saito, e fakaaloalo ei te Aliki te otou Atua, kae aumai foki ne koutou se taulaga lotomalie ke fetaui mo te aofaki o te fakamanuiaga ne aumai ne ia ki a koutou.

¹¹Ke fiafia koutou i mua o te Aliki, koutou mo otou fanau, otou tavini, mo te kau sa Levi, mo tino fakaatea, mo tamaliki seai ne matua, mo fafine seai ne avaga kona e nofo i otou fa'kai. Ke fai ne koutou te mea tena i te koga tapuaki tela ko oti ne filifili ne te Aliki.

¹²Masaua o tausi ki fakatonuga kona; sa puli i a koutou ne nofo pologa i Aikupito.

¹³ “Kafai ko oti ne tuki otou saito katoa, mo otou vine ko oti ne 'tau, ko fakamanatu la ei ne koutou te Kaiga o Fale Fakamalumalu i aso e fitu.

¹⁴Ke fai ne koutou mo te fiafia, koutou mo otou fanau, otou tavini, mo te kau sa Levi, tino fakaatea i te otou fenua, tamaliki seai ne matua mo fafine seai ne avaga kona e nofo i otou fa'kai.

¹⁵Fakamanatu te Kaiga fiafia tenei i aso e fitu, i te koga tapuaki ki te Aliki, e fakaaloalo ei koutou ki a ia. Ke fiafia koutou me ne fakamanuia ne te Aliki te katiga o otou lakau kaina pena foki otou galuega.

¹⁶“A tagata katoa i te otou malo e tau o o'mai o tapuaki ki te Aliki e fakatolu taimi i te tausaga, i te koga tapuaki ki te Aliki: ko te taimi o te Paseka, te Kaiga Fiafia o te Katiga o lakau kaina, mo te Kaiga o Fale Fakamalumalu. E tau mo tagata takitokotasi o aumai ne meaalofa

¹⁷e tusa mo te mea e mafai ne ia, ke fetaui mo te aofaki o te fakamanuiaga ne tuku mai ne te Aliki te otou Atua ki a ia.

¹⁸“Filifili aka ne famasino mo ne ofisa i fa'kai katoa kola ne avatu ne te Aliki te otou Atua mo koutou. A latou kona ka fakamasino ne latou a tino mo te se fakapito.

¹⁹ E se tau mo latou o fai amioga fakapikopiko i olotou faka masinoga; e se tau foki o talia ne latou a mea,alofa faka kolekole, me i meaalofa pena e faka kivi ne ia a mata o tino poto mo tino amiotonu, kae fai foki ne ia ke fai ne latou a ikuga se tonu.

²⁰Ke fai faeloa ne koutou te mea tonu mo te fakamasinoga tonu, ko te mea ke nofo faeloa koutou i te fenua tenei ne aumai ne te Aliki te otou Atua mo koutou.

²¹ “Kafai ko fai ne koutou se fata-fai-taulaga mo te Aliki te otou Atua, sa tukugina i ana tafa se fakatusa o te atua fafine ko Asaila.

²² Sa fakatugina foki ne fatu o tapuaki ki ei; a te Aliki e se fiafia ki te mea tena.