Read Te Tusi Tapu I Te Gana Tuvalu Lomiga Lua TEUTELONOME 17 Bible Online

TEUTELONOME 17 - Te Tusi Tapu I Te Gana Tuvalu Lomiga Lua bible

TEUTELONOME 17

¹“E tapu e ofo atu ne koutou ki te Aliki te otou Atua ne pulumakau io me ne mamoe e isi ne olotou pona; a te Aliki e se fiafia ki te mea tena.

²“E isi se taimi ka lagona ne koe se tala i se fafine io me se tagata i otou fa'kai ko agasala ki te Aliki me ne ofa ne ia tena feagaiga

³ o tapuaki kae tavini atu ki nisi atua io me ko te la, te masina me ko fetu.

⁴Kafai e lagona ne koutou se tala pena, taumafai o sukesuke fakalei. Kafai e tonu ne tupu se vaega mea masei pena i Isalaelu,

⁵puke la te tino tena o ave ki tua o te fa'kai o peipei ki fatu ke mate.

⁶ A te tino tena e tamate fua manafai e tokolua tino e molimau ki tena agasala, kae kafai e tokotasi te molimau, e se tau a ia o tamate.

⁷ Ko tino e molimau ki te agasala a te tino tena e mua o pei olotou fatu, ka oti ko peipei ei ne tino katoa; ko te faiga tena e ave keatea ei te masei tena.

⁸“E se taumate e isi ne agasala kola e tai faigata o fai se ikuga ki ei ne famasino o te fenua, e pela mo kinauga ki manafa, fakapakia o te foitino, mo vaega agasala kola e tau o fakakese ei te tino tatino mo te tatino se fakamoemoegina. Kafai e tupu se mea pena, fano ki te koga tapuaki tela ne filifili ne te Aliki te otou Atua,

⁹kae fakailoa atu te mea e mafa i tou loto ki faitaulaga sa Levi, pela foki ki te famasino e tu i te taimi tena ko tuku ei ke fa'kaiku ne latou te mea e fai koe ki ei.

¹⁰Kafai ko tuku mai te ikuga a latou, e tau eiloa mo koutou o fai a mea kola e fakatonu mai ne latou ke fai ne koutou.

¹¹Ke talia ne koutou te lotou ikuga, kae tautali ki olotou fakatonuga katoa.

¹²So se tino e taumafai o teke te famasino io me ko te faitaulaga tena e tu, e tau o tamate; ko te faiga tena e ave keatea ei te masei tena mai Isalaelu.

¹³Ka lagona ne tino katoa te faiga tena, ko mataku ei, ko seai ei se tino e taumafai o amio pena.

¹⁴ “Kafai ko maua ne koutou a te fenua tela ne avatu ne te Aliki te otou Atua, kae ko nofo foki koutou i ei, ka mafaufau koutou ke fai se tupu mo koutou e pela mo malo i tafa o koutou.

¹⁵Masaua me i te tino ka fili ne koutou ke fai mo tupu, ko te tino tena tela ne fili ne te Aliki. E tau a ia se tino tonu o te otou fenua; ke mo a e fai ne koutou se tino fakaatea ke fai mo tupu.

¹⁶ A te tupu e se tau o uke malosi ana solofanua ma tena kautau, e se tau foki o uga ne ia ne tino ke togi mai a solofanua mai Aikupito,[13] me i te Aliki ne fai mai me e seai se tino o tena fenua e tau o toe foki ki Aikupito.

¹⁷ A te tupu e se tau o tokouke ana avaga, i a ia ma fulitua ki te Aliki, kae e se tau foki a ia o fakamaumea i aulo mo siliva.

¹⁸Kafai ko fai a ia mo tupu, e tau o maua sena kopi o te tusi e tusi ei a tulafono mo akoakoga a te Atua, tela ne laga mai i te tusi a faitaulaga sa Levi.

¹⁹E tau o tuku te tusi tenei i ana tafa, kae ke faitau sale a ia ki ei i tena olaga katoa, ko te mea ke iloa ne ia o fakaaloalo te Aliki kae tausi fakamaoni ki mea katoa e fakatonu mai ne ia.

²⁰Ko te faiga tena e fakamao ei a ia mai te manatu pela i a ia e sili atu i tino Isalaelu katoa, e mao foki a ia mai te teke atu ki fakatonuga kona a te Aliki. Ka tupu a ia i tausaga e uke, kae ka pena foki tena gafa o fai mo tupu i luga i Isalaelu i tupulaga e uke.