Read Te Tusi Tapu I Te Gana Tuvalu Lomiga Lua TEUTELONOME 2 Bible Online

TEUTELONOME 2 - Te Tusi Tapu I Te Gana Tuvalu Lomiga Lua bible

TEUTELONOME 2

¹ko tatou eiloa ko olo ki loto i te vao, i te auala ki te Mataosoga o Akapa, e tusa mo te fakatonuga a te ALIKI kae ne leva foki eiloa te olo salega a tatou i te fenua maugā o Etoma.

²“Tena kae fai mai teALIKI ki a au

³me ko leva eiloa te taimi ne olo sale ei tatou i mauga kona, kae ko tau nei tatou o olo fakamatu.

⁴ Ne fai mai a ia ki a au ke tuku atu a fakatonuga konei: ‘A koutou nei ko pili o olo i loto i te fenua maugā o Etoma, ko te laukele o otou kaiga kola ko tino i te gafa o Esau. Ka mataku latou i a koutou,

⁵kae sa taua atu ki a latou me e seai eiloa ne laukele o te lotou fenua e tuku atu ne au mo koutou. Ko oti ne tuku ne au a te fenua o Etoma ki tino o te gafa o Esau.

⁶E mafai ne koutou o togi ne otou meakai mo vai mai i a latou.’

⁷“Masaua me ko oti ne fakamanuia ne te ALIKI te otou Atua a koutou i otou mea katoa e fai. Ko oti ne puipui ne ia koutou i te taimi ne olo sale ei koutou i te vao lasi tenei. A ia ne fakatasi atu eiloa ki a koutou i tausaga konei e fasefulu, kae ne aumai eiloa ne ia ki a koutou a mea ne manako koutou ki ei.

⁸“Tena, ne malaga atu eiloa tatou, tiaki ei ne tatou te auala tela e fanatu mai fa'kai o Elata mo Esionikepa ki te Tai Mate, kae ne mafuli atu tatou o olo fakamatu saegala ki Moapi.

⁹ Muna a te ALIKI ki a au penei, ‘Sa fakatupu ne koe se fakalavelave ki tino o Moapi, io me fai taua ki a latou, me i latou ko tino o te gafa o Lota. Ko oti ne tuku ne au mo latou a te fa'kai o Ala, kae ka seai eiloa se laukele o latou e avatu ne au mo koutou.’ ”

¹⁰A tino ne nofo sale i Ala, ko tagata mafi e fakaigoa ki Emima. A te loa o latou e pela eiloa mo te sua itu kaigā a tino mafi kola e fakaigoa ko tino Anaki.

¹¹A latou e fakaigoa foki ne tino Lefaima, e pela foki eiloa mo te kau Anaki; kae e fakaigoa latou ne tino Moapi ki Emima.

¹²A tino Holi e masani o nofo i Etoma, kae ne afuli latou ne tino o te gafa o Esau, ofa foki ne latou te lotou malo, kae nofo ei i te fenua tena, e pela eiloa mo tino Isalaelu fakamuli ifo, i te afuliga ne latou olotou fili mai te fenua tela ne tuku mai ne te ALIKI mo latou.

¹³“Tena, ne ui atu ei tatou i loto i te Vaitafe o Seleta e pela eiloa mo muna a te ALIKI ki a tatou.

¹⁴ Ko tusa nei mo te tolusefulu valu tausaga talu mai te taimi ne tiakina ei ne tatou a te fa'kai o Katesa Paenea. A tagata tau katoa i te kautama tena ko oti ne mate, e pela eiloa mo muna a te ALIKI.

¹⁵Ne teke atu faeloa teALIKI ki a latou, ke oko eiloa ki te taimi ne ta fakapalele ei ne ia a latou.

¹⁶“I te taimi ko oti atu ei ne mate katoa latou,

¹⁷kae fai mai mo te ALIKI ki a tatou penei,

¹⁸‘I te aso nei, e tau mo koutou o ulu atu i loto i te fenua o Moapi i te auala o Ala.

¹⁹ Ka pili atu ei koutou ki te fenua o tino Amoni, ko tino o te gafa o Lota. Sa fakatupu ne koutou se fakalavelave ki a latou io me faitaua ki a latou, me e se taitai eiloa o avatu ne au se laukele o te lotou fenua ki a koutou.”’

²⁰A te kogā laukele tenei e fakaigoa foki ko te fenua o te kau Lefaima, ko te igoa tena o tino kola ne nofo sale i kona; a latou e fakaigoa ne tino Amoni ko Samasumima.

²¹E pela eiloa latou mo tino Anaki i te loa. E tokouke foki te itu kaiga tena, kae ne tino mafi. Ko te ALIKI ne ta fakapalele ne ia latou, ko te mea ke puke ne tino Amoni a te fenua tena mo latou.

²²E pena foki te mea ne fai ne te ALIKI mo te kau Etoma, ko tino o te gafa o Esau, kola e nofo i te fenua maugā o Etoma. Ne ta fakapalele ne ia a te kau Holi, ko te mea ke nofo te kau Etoma i te lotou fenua, konei ko nofo mai eiloa i ei.

²³A te fenua tela e tu pili ki te Tai Metitilani ne nofogia ne tino mai te fenua o Keleta. Ne ta fakapalele ne latou a te kau Avima, ko tino muamua eiloa o te fenua tena, puke katoa eiloa ne latou te lotou fenua ke oko atu eiloa ki Kasa i saute.

²⁴“I te otiga ne ulu atu tatou i loto i Moapi, kae fai mai mo te ALIKI ki a tatou penei, ‘Na olo nei o ui atu i loto i te Vaitafe o Alinona. Ko tuku atu nei ne au ki otou lima a Sekono, te tupu o Amoli i Hesepono, pela foki tena fenua. Taua atu ki a ia, kae na kamata o nofo i tena fenua.

²⁵Mai i te taimi tenei, ka fai ne au a tino i koga katoa ke mataku i a koutou. A tino katoa ka polepole i te mataku manafai e lagona ne latou a te igoa o Isalaelu.’

²⁶“Ne uga ne au a avefekau mai te vao o Katemota ki te Tupu ko Sekono o Hesepono, mo te fekau tenei:

²⁷‘Talia mai matou ke ui atu i loto i tou fenua. Ka olo tonu atu eiloa matou i te auala se fakapiko ki se koga.

²⁸Ka togi atu foki eiloa ne matou a meakai e kai ei matou mo vai e inu ei matou. A te mea e manako matou ki ei, ko matou fua ke ui atu i loto i tou fenua,

²⁹ke olo atu matou ki te sua feitu o te Vaitafe o Iolitana, ki te fenua tela ne aumai ne te ALIKI te motou Atua mo matou. A tino i te gafa o Esau kola e nofo i Etoma, mo tino Moapi kola e nofo i Ala, ne talia ne latou ke ui mai matou i loto i te lotou fenua.’

³⁰“Ka ko te Tupu ko Sekono ne seki talia ne ia ke ulu atu tatou i loto i tena fenua. A te ALIKI te tou Atua ne fai ne ia Sekono ke loto makeke kae ke teke mai ki a tatou, ko te mea ke fakatakavale ne tatou kae puke tena fenua, tenei e nofo nei mo tatou.

³¹“Tena, kae fai mai mo te ALIKI ki a au penei, ‘Kiloke, ko oti ne fai ne au a te Tupu ko Sekono ke vaivai, tela la, ka mafai fua ne koutou o puke tena fenua o nofo koutou i ei.’

³²Ne vau Sekono mo tena kautau o taua mai ki a tatou i tafa o te fa'kai o Iasa,

³³ka ko te ALIKI te tou Atua ne tuku mai ne ia latou ke fakatakavale ne tatou, tena ne tamate ei ne tatou a ia mo ana tama tagata mo tena kau katoa.

³⁴I te taimi foki eiloa tena, ne fakatakavale kae ofa valevale ne tatou a fa'kai foliki katoa, kae tamate a tino katoa, tagata, fafine mo tamaliki. E seai eiloa se tino ne fakasao ne tatou.

³⁵Ne puke ne tatou a pulumakau kae fao a mea taua i fa'kai kona.

³⁶Ko te ALIKI te tou Atua ne tuku mai ne ia a fa'kai katoa kona ke fakatakavale ne tatou, e kamata mai i Aloela i kautafa o te Vanu o Alinona, mo te fa'kai i te kogaloto o te Vanu tena, ke oko atu eiloa ki Kileata. E seai eiloa se fa'kai e tai malosi ona pui ki a tatou.

³⁷Ka ko tatou e seki fakapilipili ki te fenua o tino Amoni, io me ki kautafa o te Vaitafe o Iapoka, io me ki fa'kai i te fenua mauga, io me ki so se koga ne fakatonu mai te ALIKI te tou Atua ke se olo tatou ki ei.