Read Te Tusi Tapu I Te Gana Tuvalu Lomiga Lua TEUTELONOME 21 Bible Online

TEUTELONOME 21 - Te Tusi Tapu I Te Gana Tuvalu Lomiga Lua bible

TEUTELONOME 21

¹“Kafai e isi se tino ne maua atu e mate i se fatoaga i te fenua ne avatu ne te Aliki te otou Atua mo koutou, kae e se iloa ne koutou me ne tamate ne ai,

²ko takitaki mo famasino o koutou e tau o olo o fua a te mao mai i te foitino o te tino mate ki fa'kai pili ki ei.

³Ko takitaki o te fa'kai pili eiloa ki te foitino o te tino mate ka fili ne latou se tama pulumakau tela e seki fakaaoga eiloa i galuega.

⁴Ka ave ne latou a te tama pulumakau tena ki se koga i tafa o se vaitafe foliki tela e seki masa eiloa, te koga tena e seki fakamalu foki eiloa, seki toki foki ki ne lakau; i kona ka fati ei ne latou te ua o te pulumakau.

⁵A faitaulaga i te matakaiga o Levi e olo foki ki kona, me ko latou e fa'kaiku ne latou a agasala, ko te lima oko mo te fakasaua. A latou ne filifili ne te Aliki te otou Atua ke tavini atu ki a ia kae avatu a fakamanuiaga i tena igoa.

⁶Tena la, a takitaki katoa i te fa'kai pili eiloa ki te foitino o te tino mate, e tau o fulu olotou lima i luga o te pulumakau kae fai olotou muna penei,

⁷‘E seki tamate ne matou a te tagata tena, kae e se iloa foki ne matou me ko oi ne fai ne ia a te mea tena.

⁸Te Aliki, fakamagalo mai a tino o tou fenua ko Isalaelu kola ne fakasao ne koe mai Aikupito. Fakamagalo mai matou kae sa faigina matou ke agasala i te tamatega o te tagata tena.’

⁹Tena la, kafai e fai ne koutou te mea tena e manako ki ei te Aliki, ko se 'ti atu ei ki a koutou a te tamatega o te Tagata tena ne mate.

¹⁰“Kafai ko avatu ne te Aliki te otou Atua a te manumalo i te taua, kae e isi ne pagota a koutou ne puke,

¹¹kae kafai e lavea ne koe se tamafine tinogali tela e fia avaga koe ki ei.

¹²Ke ave la ne koe a te fafine tena ki tou fale, kae fai ki ei ke vele tena ulu,[18] kati ana mania,

¹³kae sui ona gatu. E tasi te masina e nofo ei a ia i tou fale o tagi fanoanoa i te mate o ana matua; ka oti ko avaga ei koe ki ei.

¹⁴Fakamuli ifo, kafai ko se manako koe ki ei, ko fakasaoloto ei ne koe ke fano. E se mafai ne koe o fai a ia e pela me se pologa o fakatau atu, me ne fai malo ne koe a ia ke moe koulua.

¹⁵“Kafai e isi se tagata e tokolua ana avaga kae fanau mai ana avaga ne tamaliki tagata katoa, ka ko te tama tagata matua eiloa e a te fafine tela e se fiafia malosi a ia ki ei.

¹⁶Kafai ko vaevae a mea a te tagata tena, e se tau mo ia o fakaasi tena fapito ki te tama tagata a te fafine tela e fiafia malosi a ia ki ei, o ave ki ei te tusaga o te toekimua.

¹⁷E tau eiloa o avatu ne ia te vaega o te toekimua ki tena tama tagata matua eiloa, faitalia manafai e se ko te tama a tena avaga tela e fiafia malosi a ia ki ei. E tau eiloa mo te tagata o talia ne ia tena toekimua, kae avatu ki ei te vaega e tau ki a ia e pela mo te tulafono.

¹⁸“Kafai e isi se tagata e isi sena tama tagata, kae ko ia eiloa ko se fakalogo kae teke ki ana matua, kae e fakasala sale eiloa ne ana matua;

¹⁹a te tamaliki tena e tau o ave ne ana matua ki takitaki o te fa'kai tena e nofo a ia i ei, ke fakamasino.

²⁰Konei a muna a matua ki takitaki, ‘A te ma tama tagata tena e se fakalogo ki a maua, kae e teke foki ki fakatonuga a maua. E fakamaumau ne ia a tupe, kae e inu kava.’

²¹Tena la, ko tau a ia o peipei ki fatu ke mate ne tino o te fa'kai tena, ko seai ei se agasala masei pena. A tino katoa i Isalaelu kola e logo i te mea tena ne tupu ka mataku.

²²“Kafai se tino ne tamate i se agasala a ia ne fai, kae ne fakatautau tena foitino i se pou,

²³ e se tau o tuku i kona i te po tena. E tau eiloa o tanu i te aso foki eiloa tena, me i te foitino mate e tautau i luga i se pou e aumai ne ia te fakamalaiaga a te Atua ki te fenua. Tanu te foitino o te tino tena ne mate, ko te mea ke mo a e lailai te fenua tenei ne avatu ne te Aliki te otou Atua mo koutou.