Read Te Tusi Tapu I Te Gana Tuvalu Lomiga Lua TEUTELONOME 23 Bible Online

TEUTELONOME 23 - Te Tusi Tapu I Te Gana Tuvalu Lomiga Lua bible

TEUTELONOME 23

¹“So se tagata ne pena ona masaki, io me se tino ne kati keatea tena koga mimi e se tau o kau i tino o te Atua.

²“A tama sala, mo tino i olotou gafa, e se tau o kau i tino o te Atua, ke oko eiloa ki te sefulu o tupulaga.

³ “E tapu se tino Amoni io me se tino Moapi, io me ko tino i olotou gafa, e kau i tino o te Atua, ke oko eiloa ki te sefulu o tupulaga.

⁴ Ne ita latou ma avatu ne meakai mo vai ma koutou i te taimi ne o'mai ei koutou keatea mai Aikupito, kae ne aumai foki ne latou a Palaamo te tama tagata a Peolo, mai i te fa'kai o Petolo i Mesopotamia, ke fakamalaia ne ia koutou.

⁵ Ka ko te Aliki te otou Atua ne seki fakalogo ki a Palaamo; ne fuli ne ia te fakamalaiaga ki te fakamanuiaga, me i a ia e alofa ki a koutou.

⁶Ke mo a eiloa e fesoasoani koutou ki malo konei ke maumea, manafai koi tumau eiloa te otou malo.

⁷“Sa fai fili ki tino Etoma, a koutou e kaiga mo latou. Sa fai fili foki ki tino Aikupito; masaua i a koutou ne nofo i te lotou fenua.

⁸Mai i te tolu o tupulaga o fano ki mua, ko mafai ei a tino i olotou gafa o kau i tino o te Aliki.

⁹“Kafai koutou ko nofo i te koga e nofo ei te kautau i te taimi o te taua, masaua ke mo a e fai ne koutou se mea e lailai ei koutou i feitu fakatapuakiga.

¹⁰Kafai se tagata ne moemiti masei i te po, kae fano tena sua, ko lailai a ia, tela la, e tau a ia o fano ki tua mo te koga e nofo ei a tino, o nofo i ei.

¹¹Kafai ko pili o po, ko fano a ia o koukou, ko vau ei a ia ki loto i te fa'kai manafai ko to te la.

¹²“E tau o isi se koga i tua o te koga e nofo ei koutou, ke olo sale ei koutou ki otou tinae.

¹³Masaua o pukepuke sale se lakau, me kafai e fano koe ki ou tinae, e tau o keli ne koe se lua ki te lakau tena mo tanu ou fekau.

¹⁴Tausi te koga e nofo ei te otou kautau ke ma i feitu fakatapuakiga, me i te Aliki te otou Atua e nofo fakatasi mo koutou, o puipui koutou, kae avatu te manumalo i otou fili. Sa fai ne koutou se mea masei, i te Aliki ma fulitua atu ki a koutou.

¹⁵“Kafai se pologa ne tele mai i tena matai, ke fesoasoani atu koe o puipui aka a ia, sa ugagina a ia ke foki ki tena matai.

¹⁶E mafai a ia o nofo i so se fa'kai tela e fia nofo a ia i ei, kae ke mo a e fai fakamasei ne koutou a ia.

¹⁷ “E tapu se tino Isalaelu, se tagata io me se fafine, e tali tagata io me e tali fafine i se faletapu.

¹⁸E tapu se vaega tupe e maua i galuega pena e ave ki loto i te fale o te Aliki te otou Atua, mo fakataunu se feagaiga a se tino ne fai. A te Aliki e se fiafia ki fafine tali tagata mo tagata tali fafine o faletapu.

¹⁹ “Kafai e ave ne koe ne tupe kaitalafu io me ne meakai ki se taina Isalaelu, sa fakaopoopo se pasene ki te kaitalafu.

²⁰E mafai ne koe o fakaopoopo se pasene ki mea e ave fakakaitalafu ne koe ki se tino o fenua fakaatea, kae ke mo a e fakaopoopo ne koe se pasene ki so se mea e ave fakakaitalafu ne koe ki sou taina Isalaelu. Tausi ki te fakatonuga tena, kae ka fakamanuia koutou ne te Aliki te otou Atua i otou mea katoa e fai i loto i te fenua tena ka puke ne koutou.

²¹ “Kafai ne fai se tautoga a koe ki te Aliki tou Atua, masaua ke fai eiloa te mea ne tauto koe o fai; a te Aliki ka masaua eiloa ne ia tau tautoga, kae agasala koe manafai e se fai ne koe te mea ne tauto koe o fai.

²²Kafai se tauto koe, e seai se mea e tupu i ei,

²³kae kafai ko tauto koe, masaua eiloa o fai te mea ne tauto ei koe ke fai.

²⁴“Kafai koe e fano i loto i se togavine a se tino, e mafai ne koe o kai a vine ki te mea e mafai ne koe, kae ke mo a eiloa e ave ne koe ne vine i se kete io me se isi mea aka.

²⁵Kafai koe e fano i loto i se fatoaga saito a se tino, e mafai koe o kai a saito kola e unu ki ou lima, kae e mo a eiloa e kati ne koe ne saito ki te mea kati saito.