Read Te Tusi Tapu I Te Gana Tuvalu Lomiga Lua TEUTELONOME 26 Bible Online

TEUTELONOME 26 - Te Tusi Tapu I Te Gana Tuvalu Lomiga Lua bible

TEUTELONOME 26

¹“Kafai ko nofo koutou i te fenua tenei ne avatu ne te Aliki te otou Atua mo koutou,

² e tau mo koutou taki tokotasi o tuku ki se kete te vaega muamua o fuaga o lakau kesekese a koutou kola ne kati, ko olo ei mo koutou ki te koga tapuaki o te Aliki tela e tasi eiloa.

³Olo ki te faitaulaga tela e pule i te taimi tena, kae fai ki ei penei, ‘Ko fakaasi nei ne au toku fiafia ki te Aliki toku Atua i a au ko nofo nei i loto i te fenua tela ne tauto a ia ki omotou tupuga ke tuku mai mo matou.’

⁴“Ka puke ne te faitaulaga a te kete mai i a koe o tuku i mua o te fata-fai-taulaga a te Aliki te otou Atua.

⁵Tena la, ka taku ne koe a muna konei, i mua o te Aliki: ‘A te motou tupuga se tino Alamea kae maumausolo, se tino seai sena nofoga tumau, tela ne puke ne ia tena kaiga o olo o nofo i Aikupito. I te taimi ne olo ei latou ki kona, e se tokouke latou, kae fakamuli ifo ko fai latou mo malo lasi kae takutakua.

⁶Ne fai fakamasei matou ne tino Aikupito, kae fai malo ne latou a matou ke galue pela me ne pologa.

⁷Tena ne kalaga ei matou mo se fesoasoani mai i te Aliki, te Atua o omotou tupuga. Ne lagona ne ia te motou kalaga, kae ne lavea ne ia te olaga puapuaga o matou.

⁸Tena ne fakasao ei ne ia matou mai Aikupito i tena mana malosi. Ne fai ne ia a vavega mo mea fakaofoofogia, kae fai foki ne ia a mea fakamataku ke tupu.

⁹Ne aumai ne ia matou ki konei, kae aumai ne ia a te laukele maumea tenei.

¹⁰Tela la, ko aumai nei ne au ki te Aliki a te vaega muamua o te taukai tela ne aumai ne ia ki a au.’ “Tena la, ko tuku ei ne koe te kete ki lalo i mua o te Aliki kae fai tau tapuakiga i kona.

¹¹Ke fiafia koutou i mea lei kola ko oti ne avatu ne te Aliki te otou Atua ma koutou mo otou kaiga; kae kami mai a te kau sa Levi mo tino fakaatea kona e nofo tasi koutou ke fiafia fakatasi koutou.

¹² “Masaua o ave e tasi vae sefulu a koutou i te taki tolu o tausaga ki te kau sa Levi, tino fakaatea kona e nofo tasi koutou, tamaliki seai ne matua mo fafine seai ne avaga, ko te mea ke lava mea e tausi ei olotou ola i so se fakatasiga e nofo latou i ei. Kafai ko oti ne fai ne koe a te mea tena,

¹³ko fai ei koe ki te Aliki penei, ‘Ko seai se tasi vae sefulu e toe i toku fale; ko oti ne avatu ne au ki te kau sa Levi, tino fakaatea konei e nofo tasi matou, tamaliki seai ne matua mo fafine ko mate olotou avaga, e pela eiloa mo tau fakatonuga ki a au. Ne fakalogo eiloa au o fai au fakatonuga katoa e uiga ki tasi vae sefulu.

¹⁴E seki ai ne mea ne kai ne au i te taimi ne tagi fanoanoa ei au; e seki ai foki ne mea ne ave keatea ne au mai i toku fale i te taimi ne lailai ei au i feitu fakatapuakiga; ne seki ave foki ne au ne mea ke fai mo taulaga ki tino mate.[21] Te Aliki, au ne fakalogo eiloa ki a koe; ko oti ne fai katoa ne au a mea ne fakatonu mai ne koe e uiga ki tasi vae sefulu.

¹⁵Kilo ifo mai i tou nofoaga tapu i te lagi, kae fakamanuia mai tou fenua ko Isalaelu; fakamanuia mai foki te fenua maumea kae laukele ola tenei ne aumai ne koe mo matou, e pela eiloa mo tau tautoga ki omotou tupuga.

¹⁶“I te aso nei, a te Aliki te otou Atua ko fakatonu mai ki a koutou ke tausi katoa ne koutou ana tulafono katoa; tela la, ke tausi fakamaoni koutou ki tulafono kona mo otou loto katoa.

¹⁷I te aso nei, ko oti ne talia ne koutou i te Aliki ko te otou Atua; ko oti koutou ne tauto ke fakalogo koutou ki a ia, o tausi ana tulafono, kae fai a mea katoa kola e fakatonu mai ne ia.

¹⁸ I te aso nei, ko talia ne te Aliki ke fai koutou mo tino tonu o tena fenua, e pela mo tena tautoga ki a koutou; kae fakatonu mai ke tausi katoa koutou ki ana tulafono.

¹⁹Ka fai ne ia koutou ke takutakua atu i malo katoa kola ne faite ne ia, kae ka aumai ne koutou a vikiga mo tavaega o tena igoa.[22] Ka fai eiloa koutou mo tino tonu o tena fenua, e pela eiloa mo tena tautoga.”