Read Te Tusi Tapu I Te Gana Tuvalu Lomiga Lua TEUTELONOME 27 Bible Online

TEUTELONOME 27 - Te Tusi Tapu I Te Gana Tuvalu Lomiga Lua bible

TEUTELONOME 27

¹Ne fanatu a Mose, fakatasi mo takitaki o Isalaelu, kae fai atu ki tino o te fenua penei, “Fakalogo ki fakatonuga konei ka avatu ne au ki a koutou i te aso nei.

² I te aso e sopo atu ei koutou ki te sua feitu o te vaitafe o Iolitana, o ulu ki loto i te fenua tela ne avatu ne te Aliki te otou Atua mo koutou, e tau o fakatu aka ne koutou ne fatu lasi kae fakapa ke maniania,

³kae tusi ki ei a tulafono mo akoakoga katoa konei. Kafai ko ulu atu koutou ki loto i te fenua maumea kae laukele ola tela ne tauto te Aliki te Atua o otou tupuga ke avatu mo koutou,

⁴masaua o fakatu a fatu kona i luga i te Mauga o Epalu, e penei mo taku fakatonuga ki a koutou i te aso nei, kae fakamole ke maniania.

⁵ Faite se fata-fai-taulaga i kona, ki fatu e seki kati ki se mea faigaluega fiti,

⁶me i so se fata-fai-taulaga e faite ne koutou mo te Aliki te otou Atua, e tau o faite ki fatu e seki kati ki se mea faigaluega. I kona e tau ei o ofo ne koutou a taulaga kola e sunu,

⁷i kona foki e tau o ofo ei otou taulaga fakafetai, kae kai foki otou taulaga kona, kae fiafia i mua o te Aliki te otou Atua.

⁸I luga i fatu kona, ke tusi fakalei eiloa i ei a tulafono katoa a te Atua.”

⁹Tena la, kae fai atu a Mose mo faitaulaga sa Levi ki tino Isalaelu penei, “Tino Isalaelu, fakalogo mai ki a au. I te aso nei, ko fai koutou mo fenua tonu o te Aliki te otou Atua;

¹⁰tela la, fakalogo ki a ia kae tausi ki ana tulafono katoa konei ne avatu ne au i te aso nei.”

¹¹Tena kae fai atu a Mose ki tino Isalaelu penei,

¹² “Kafai ko oti koutou ne olo atu ki te sua feitu o te Vaitafe o Iolitana, e tau a matakaiga o Simeona, Levi, Iuta, Isakala, Iosefa mo Peniamina, o tu i luga i te Mauga o Kelisima i te taimi e folafola mai ei a fakamanuiaga ki luga i tino o te fenua.

¹³Kae konei a matakaiga kola e tau o tu i luga i te Mauga o Epalu i te taimi e folafola mai ei te fakamalaiaga: te matakaiga o Leupena, te matakaiga o Kato, te matakaiga o Asela, te matakaiga o Sepulona, te matakaiga o Tanu mo te matakaiga o Nafatali.

¹⁴Ko te kau sa Levi ka faipati ne latou a muna konei i te leo maluga:

¹⁵ “A te fakamalaiaga a te Atua e paku ki luga i so se tino e faite ne ia se tupua ki fatu, lakau, io me ki fiti, kae tapuaki muni ki ei; a te Aliki e se fiafia ki te ifo ki tupua.’ “Ka ko tino katoa ka tali penei, ‘Amene!’

¹⁶ “‘A te fakamalaiaga a te Atua ke paku ki so se tino e fakamasiasi ne ia tena tamana mo tena matua.’ “Ka ko tino katoa ka tali penei, ‘Amene!’

¹⁷ “‘A te fakamalaiaga a te Atua ke paku ki luga i so se tino e siki ne ia a te tuakoi o te tino tela e tuakoi mo ia.’ “Ka ko tino katoa ka tali penei, ‘Amene!’

¹⁸ “‘A te fakamalaiaga a te Atua ke paku ki luga i so se tino tela e takitaki ne ia a tino kivi i te auala 'se.’ “Ka ko tino katoa ka tali penei, ‘Amene!’

¹⁹ “‘A te fakamalaiaga a te Atua ke paku ki luga i so se tino e fakatogafiti ne ia a tino fakaatea, tamaliki seai ne matua, mo fafine ko mate olotou avaga, i saolotoga o latou.’ “Ka ko tino katoa ka tali penei, ‘Amene!’

²⁰ “‘A te fakamalaiaga a te Atua ke paku ki luga i so se tino e fakamasiasi ne ia tena tamana o moe mo se avaga e tokotasi a tena tamana.’ “Ka ko tino katoa ka tali penei, ‘Amene!’

²¹ “‘A te fakamalaiaga a te Atua ke paku ki luga i so se tino e moe mo se manu.’ “Ka ko tino katoa ka tali penei, ‘Amene!’

²² “‘A te fakamalaiaga a te Atua ke paku ki luga i so se tino e moe mo tena tuagaene io me se afā tuagaene o ia.’ “Ka ko tino katoa ka tali penei, ‘Amene!’

²³ “‘A te fakamalaiaga a te Atua ke paku ki luga i so se tino e moe mo te matua o tena avaga.’ “Ka ko tino katoa ka tali penei, ‘Amene!’

²⁴“‘A te fakamalaiaga a te Atua ke paku ki luga i so se tino e tatino funa.’ “Ka ko tino katoa ka tali penei, ‘Amene!’

²⁵“‘A te fakamalaiaga a te Atua ke paku ki luga i so se tino e talia ne ia se togi ke tamate ne ia se tino e seai sena agasala.’ “Ka ko tino katoa ka tali penei, ‘Amene!’

²⁶ “‘A te fakamalaiaga a te Atua ke paku ki luga i te tino tela e se fakalogo ki tulafono mo akoakoga katoa a te Atua.’ “Ka ko tino katoa ka tali penei, ‘Amene!’