Read Te Tusi Tapu I Te Gana Tuvalu Lomiga Lua TEUTELONOME 28 Bible Online

TEUTELONOME 28 - Te Tusi Tapu I Te Gana Tuvalu Lomiga Lua bible

TEUTELONOME 28

¹ “Kafai e fakalogo koutou ki te Aliki te otou Atua kae tausi ki ana fakatonuga katoa konei ne avatu ne au i te aso nei, kae ka fai ne ia koutou ke takutakua atu i so se malo i te lalolagi nei.

²Fakalogo ki te Aliki te otou Atua, kae ka maua katoa ne koutou a fakamanuiaga konei:

³“A te Aliki ka fakamanuia ne ia otou fa'kai mo otou fatoaga.

⁴“A te Aliki ka fakamanuia ne ia koutou o avatu ne fanau e tokouke, mo lakau kaina e uke, mo pulumakau mo mamoe e uke.

⁵“A te Aliki ka fakamanuia ne ia otou saito, mo meakai kola e faite ne koutou mai i saito.

⁶“A te Aliki ka fakamanuia ne ia otou mea katoa e fai.

⁷“A te Aliki ka fakatakavale ne ia otou fili manafai e o'mai o taua ki a koutou. Ka taua mai latou mai i te feitu e tasi, kae ka tele keatea mai i a koutou i feitu katoa.

⁸“A te Aliki te otou Atua ka fakamanuia ne ia otou galuega kae fakafonu otou koga teu saito ki saito. Ka fakamanuia ne ia koutou i te fenua tenei ne avatu ne ia mo koutou.

⁹“Kafai e fakalogo koutou ki te Aliki te otou Atua, o fai a mea katoa ne fakatonu mai ne ia, kae ka fai ne ia koutou mo tino tonu o tena fenua, e pela eiloa mo tena fakatonuga.

¹⁰Tena la, ka lavea ei ne tino katoa i te lalolagi i a koutou ne filifili ne te Aliki ke fai mo tino tonu o tena fenua, ko mataku ei latou i a koutou.

¹¹Ka avatu ne te Aliki ne fanau e tokouke, pulumakau mo lakau kaina e uke, te fenua tela ne tauto ei a ia ki otou tupuga ke avatu mo koutou.

¹²Ka fakato ne ia a vaiua i taimi tau, mai i te lagi, kae ka fakamanuia ne ia otou galuega, ko te mea ke o'mai a malo e uke o kaitalafu i a koutou, ka ko koutou e se mafai eiloa o kaitalafu i nisi malo.

¹³A te Aliki te otou Atua ka fai ne ia koutou ke takitaki i malo, kae ke se tautali i ei; a koutou e maumea faeloa manafai e tumau eiloa te otou fakalogo mo te fakamaoni ki fakatonuga konei ne avatu ne au i te aso nei.

¹⁴Ke mo a eiloa e teke ne koutou aku fakatonuga kona; ke mo a foki e tapuaki koutou ki atua fakaatea.

¹⁵“Kafai se fakalogo koutou ki te Aliki te otou Atua, kae se tausi mo te fakamaoni ki ana fakatonuga mo tulafono konei ne avatu ne au i te aso nei, ko te mea ka oko mai ki a koutou a mea masei katoa konei:

¹⁶“Ka fakamalaia ne te Aliki a otou fa'kai mo fatoaga.

¹⁷“Ka fakamalaia ne te Aliki a otou saito mo meakai e fai ne koutou mai i ei.

¹⁸“Ka fakamalaia koutou ne te Aliki o avatu ne fanau e se tokouke, lakau kaina se lei, mo pulumakau mo mamoe e se uke.

¹⁹“A te Aliki ka fakamalaia ne ia a mea katoa a koutou e fai.

²⁰“Kafai e fai ne koutou a amioga masei kae teke ki te Aliki, kae ka aumai ne ia ki a koutou a puapuaga mo fakalavelave i otou mea katoa e fai, ke oko eiloa ki te taimi e mate katoa atu ei koutou.

²¹Ka aumai ne ia a famai mo masaki ki luga i a koutou ke oko eiloa ki te taimi e seai ei se tino i a koutou e toe mai i luga i te fenua tena ka puke ne koutou.

²²Ka aumai ne te Aliki a famai pisi, mo mea fulafula, mo fiva, ka aumai ne ia te oge vai mo te matagi vela ke fakamasei ei otou lakau kaina. A fakalavelave kona ka nofo tasi mo koutou ke oko ki te taimi e mate ei koutou.

²³Ka seai ne vaiua e to, ka ko te laukele ka makeke pela me se fiti.

²⁴Ka aumai ne te Aliki se ko vaiua, ka ko matagi mo te pefu, ke oko ki te taimi e mate atu ei koutou.

²⁵“A te Aliki ka aumai ne ia ki otou fili a te manumalo i a koutou. Ka taua atu koutou ki a latou mai i se feitu e tasi, kae ka tele koutou mai i a latou i feitu katoa. Ka mataku katoa a tino o te lalolagi manafai ko lavea ne latou a te mea tena e tupu ki a koutou.

²⁶Kafai ko mate koutou, kae ka o'mai a manu eva mo manu o te vao o kai otou foitino, kae ka seai eiloa se tino e afuli keatea ne ia a manu kona.

²⁷Ka aumai ne te Aliki a fakafoa ki a koutou e pela mo te aumaiga ne ia ki tino Aikupito. Ka fai ne ia otou foitino ke fonu i mea pala. Ka fonu otou foitino i mea magiso, kae ka magiso valevale koutou kae ka seai se lei e maua ne koutou.

²⁸Ka fai ne te Aliki a koutou ke fakavalevale; ka fakakivi ne ia koutou kae fakanumi otou mafaufau.

²⁹Ka tekateka koutou i te ao malamalama e pela me ne tino kivi, kae ka se iloa eiloa ne koutou a koga e olo koutou ki ei. E seai eiloa se mea e fai ne koutou ke lei koutou i ei. A koutou e fakapuapuagatia faeloa kae fao otou mea, kae ka seai eiloa se tino ke fesoasoani atu ki a koutou.

³⁰“Ka fai feagaiga koe ki se tamafine, kae ka avaga eiloa mo se tino fakaatea. Ka faite ne koe se fale, kae se nofo eiloa koe i ei. Ka toki ne koe se togavine, kae se kai eiloa koe ki ana fuaga.

³¹Au pulumakau ka ta mai eiloa i ou mua, kae ka se kai eiloa koe i se kano. Au asini ka toso keatea kae kilokilo atu eiloa koe ki ei, kae ka se toe fakafoki mai ki a koe. A mamoe a koe ka ave ki ou fili, kae ka seai eiloa se tino ke fesoasoani atu ki a koe.

³²Au tamaliki tagata mo tamaliki fafine ka avatu ke fai mo pologa a tino fakaatea, kae kilokilo atu eiloa koe ki a latou. Ka mae otou mata i aso katoa, i te kilokiloga ki otou tamaliki ke toe foki mai.

³³A lakau kaina kola ne galue fita koutou o toki ka puke katoa ne se malo fakaatea, kae ka seai ne otou mea e maua, na ko te puapuaga fua, mo te fai fakamasei ne nisi malo.

³⁴A te otou puapuaga ka fai ne ia koutou ke masei otou mafaufau.

³⁵Ka ufi ne te Aliki otou vae ki matakili e se mafai o mafu, kae mae foki; otou foitino ka fonu i fakafoa.

³⁶“Ka ave koutou ne te Aliki, fakatasi mo te otou tupu, ki se fenua fakaatea tela e seki nofo eiloa koutou i ei, pena foki otou tupuga; i kona ka tapuaki ei koutou ki atua e faite ki lakau mo fatu.

³⁷A tino i fenua kola ne ave fakapagota ki ei koutou ne te Aliki, ka poi i te mea ne tupu ki a koutou; ka fakalili ne latou a koutou kae muna masei ki a koutou.

³⁸“Ka toki ne koutou a fuaga e uke, kae ka foniki fua te taukai e kati ne koutou, me ka kai katoa ne se akelise.

³⁹Ka toki otou vine kae tausi fakalei, kae ka seai ne vine e maua ne koutou io me ne uaina ke inu koutou i ei, me i vine e kai fua ne anufe.

⁴⁰A lakau ko olive ka ola valevale fua i te otou fenua, kae ka seai ne sinu olive a koutou e maua, me i fuaga olive e tatela fua ki lalo.

⁴¹Ka isi ne otou tama tagata mo tama fafine, kae ka galo atu latou mai i a koutou, me ka ave fakapagota ki nisi fenua.

⁴²A lakau lasi mo lakau kaina katoa i te otou fenua ka kai katoa ne manu foniki.

⁴³“A tino fakaatea kona e nofo i te otou fenua ka gasolo o malosi kae uke olotou mea, ka ko koutou ka gasolo eiloa o se aoga.

⁴⁴Ka uke olotou tupe o tuku fakakaitalafu sale atu ki a koutou, ka ko koutou ka seai eiloa ne otou tupe o tuku fakakaitalafu atu ki a latou. Fakamuli ko fai ei latou mo takitaki o koutou.

⁴⁵“A puapuaga katoa kona ka oko mai ki a koutou, kae ka nofo eiloa mo koutou ke oko ki te taimi e ta fakapalele ei koutou, me i a koutou ne seki fakalogo ki te Aliki te otou Atua o tausi a tulafono katoa kola ne tuku mai ne ia ki a koutou.

⁴⁶Ka fai a mea kona mo mea e fakamaonia ei te fakamasinoga a te Atua ki a koutou mo otou tupuga ki te se gata mai.

⁴⁷Ne fakamanuia ne te Aliki a koutou i feitu katoa, ka ko koutou e se fia saga o tavini ki a ia mo te loto fiafia.

⁴⁸Tena la, ka tavini fua ei koutou ki otou fili kola ka uga mai ne te Aliki o ta koutou. Ka fiakai koutou kae fiainu, kae seai foki ne gatu o koutou — ka manako koutou ki ne mea, kae ka se maua lele eiloa ne koutou. Ka fakapuapuaga eiloa koutou ne te Aliki[23] ke oko ki te taimi e ta fakapalele ei koutou.

⁴⁹Ka aumai ne te Aliki se malo mai i kapakapalagi ke ta koutou, se malo e se iloa ne koutou te lotou gana. Ka vau a ia o ta koutou e pela me se aeto ko eva ifo o ta sena manu.

⁵⁰A tino o te malo tena e seai se alofa i a latou, e pau katoa tino matua mo tamaliki foliki.

⁵¹Ka kai ne latou otou pulumakau mo otou lakau kaina, kae ka mate koutou i te fiakai. Ka se faka tōe mai eiloa ne latou ne saito, uaina, sinu olive, pulumakau io me ne mamoe ma koutou; tena la, a koutou e mate eiloa.

⁵²Ka taua mai latou ki fa'kai katoa i te fenua tenei ne avatu ne te Aliki te otou Atua mo koutou; a olo maluga kae malosi kola ne fakalagolago koutou ki ei ka siga katoa.

⁵³“Kafai ko nikoi ne otou fili a otou fa'kai, ka mate koutou i te fiakai, kae ka iku eiloa ki te kai ne koutou o tamaliki a koutou kola ne avatu ne te Aliki te otou Atua.

⁵⁴Ke oko foki eiloa ki te toe tagata amiotonu eiloa, tela ne fanau mai i se kaiga maluga, ka oko atu foki ki a ia te mate fiakai i te taimi e nikoi ei te fa'kai, kae ka kai foki ne ia a nisi tamaliki a ia, me ko seai eiloa ne meakai.

⁵⁵E seai foki eiloa ne mea e ave ne ia ki a latou mai vaega o te foitino o tena tama tela e kai ne ia ona ko tena fia kai, aua ko nikoi katoa ne olotou fili a olotou fa'kai.

⁵⁶Ke oko foki eiloa ki te fafine amiotonu tela ne fanau mai i se kaiga maluga, kae maumea e se ti sasale ki se koga e manako o fano ki ei. Kafai ko nikoi tena fa'kai, ka oko ki a ia te fiakai, kae ka kai muni ne ia tena pepe ne fatoā fanau mai, mo ana tamaliki kola ne fanau.Ka seai ne mea e avatu ne ia ki tena avaga tela e pele i tona loto, io me ko ana tamaliki.

⁵⁷

⁵⁸“Kafai e se fakamaoni koutou o tausi ki akoakoga katoa a te Atua konei e tusi i te tusi tenei, kae kafai foki e se fakaaloalo ne koutou te igoa malu o te Aliki te otou Atua,

⁵⁹kae ka aumai ne ia ki a koutou mo tino i otou gafa a masaki e se mafai o lei, mo famai e se mafai o fakagata.

⁶⁰Ka toe aumai ne ia a vaega masaki masei katoa kola ne poko koutou i ei i Aikupito, kae ka se toe lei koutou.

⁶¹Ka aumai foki ne ia ki a koutou a masaki mo famai kola e se tusi i loto i te tusi tenei o tulafono mo akoakoga a te Atua, tena ko mate atu ei koutou.

⁶²E ui eiloa ne tokouke koutou e pela mo fetu i te lagi, kae ne nai tino fua i a koutou ka sao, me i a koutou e seki fakalogo ki te Aliki te otou Atua.

⁶³Ne fiafia te Aliki o avatu te maumea ki a koutou, kae fakatokouke foki koutou, ka fiafia foki a ia o ta fakapalele koutou kae fakamasei valevale koutou. A koutou ka unu keatea e pela me ne lakau, mai i te fenua tena ka puke ne koutou.

⁶⁴“Ka fakasalalau koutou ne te Aliki ki malo katoa, mai i te mata o te lalolagi ki te sua mata; i koga kona ka tavini atu ei koutou ki atua ne faite ki lakau mo fatu, ko atua e seki tapuaki eiloa koutou io me ko otou tupuga ki ei.

⁶⁵Ka seai se filemu e toe maua ne koutou i so se koga, seai se koga tonu o koutou; ka aumai ne te Aliki ki a koutou te manavase, te lotovaivai mo te fiamate.

⁶⁶A koutou ka nofo mataku faeloa i taimi katoa. I ao mo po, a koutou ka mataku faeloa, kae ka mataku faeloa koutou i te mate.

⁶⁷A koutou ka polepole faeloa i te mataku i mea e lavea ne koutou. I taeao katoa, a koutou e manako faeloa ke na po; i po katoa, a koutou e manako faeloa ke na ao.

⁶⁸A koutou ka fakafoki ne te Aliki ki Aikupito i vakamutu, e ui eiloa ne fai tena pati a koutou e se toe foki ki Aikupito.[24] I kona ka togi atu ei otou foitino ke fai mo pologa a otou fili, kae ka seai ne tino e fia togi ki a koutou.”