Read Te Tusi Tapu I Te Gana Tuvalu Lomiga Lua TEUTELONOME 30 Bible Online

TEUTELONOME 30 - Te Tusi Tapu I Te Gana Tuvalu Lomiga Lua bible

TEUTELONOME 30

¹“Ko oti nei ne tuku atu ne au ke filifili koutou, me e manako koutou ki te fakamanuiaga io me ko te fakamalaiaga. Kafai ko oti katoa ne tupu a mea konei ki a koutou, i te taimi e nofo ei koutou i malo kola ne fakasalalau atu ki ei koutou ne te Aliki, kae ka masaua ei ne koutou me ne avatu ne au te saolotoga ke filifili koutou me ko te manuia me ko te malaia.

²Kafai e toe fuli mai koutou mo tino i otou gafa ki te Aliki, kae tausi ki ana fakatonuga konei ne avatu ne au i te aso nei mo otou loto katoa,

³kae ka alofa atu te Aliki te otou Atua o fakasao koutou. Ka toe aumai ne ia koutou mai i malo kola ne avatu ne ia koutou ki ei, kae ka toe fai ne ia koutou ke maumea.

⁴E ui eiloa ne fakasalalau atu koutou ki feitu e fa o te lalolagi, kae ka toe fakamaopoopo mai koutou ne te Aliki te otou Atua, o toe fakafoki mai ki konei,

⁵ko te mea ke toe puke ne koutou a te fenua ne nofo ei otou tupuga. Ka fakatokouke atu ne ia koutou i otou tupuga, kae fakamaumea atu foki koutou i a latou.

⁶Ka aumai ne te Aliki te otou Atua ki a koutou a te loto fakalogo, ko te mea ke alofa koutou ki a ia mo otou loto katoa. Kae ka tumau eiloa koutou o nofo i te fenua tena.

⁷Ka avatu ne ia a fakamalaiaga katoa kona ki otou fili kola e takalialia i a koutou, kae fakapuapuagatia faeloa ne latou a koutou,

⁸tela la, ka toe fakalogo koutou ki a ia kae tausi ki ana fakatonuga konei ne avatu ne au i te aso nei.

⁹Ka fakamaumea ne te Aliki a koutou i mea katoa a koutou e fai; ka tokouke otou fanau pela foki otou pulumakau, ka ko otou fatoaga ka uke a lakau kaina e ola i ei. Ka fiafia malosi a ia o fakamaumea koutou, e pela eiloa mo ia ne fiafia o fai otou tupuga ke maumea,

¹⁰kae masaua o fakalogo ki a ia kae tausi ki ana tulafono katoa konei e tusi i tena tusi o akoakoga tenei. E tau eiloa koutou o fuli atu ki a ia mo otou loto katoa.

¹¹“A te fakatonuga tenei e avatu ne au i te aso nei e se faigata, e mafai eiloa ne koutou o fai.

¹² E se tuku i luga i te lagi. E se tau o fai se fesili a koutou penei, ‘Ko oi te tino e fanake ki luga o puke mai ki lalo nei ke fakalogo tatou ki ei ko tausi ei ne tatou?’

¹³E se tuku foki i te sua feitu o te moana. E se tau o fai se fesili a koutou penei, ‘Ko oi te tino ka fano ki te sua feitu o te moana o puke mai, ke fakalogo tatou ki ei ko tausi ei ne tatou?’

¹⁴A fakatonuga konei e nofo mo koutou. E iloa ne koutou, e mafai foki o faipati ne koutou, tela la, fakalogo nei ki ei.

¹⁵“I te aso nei, ko tuku atu ne au ke filifili koutou i mea konei, te lei me ko te masei, te ola me ko te mate.

¹⁶Kafai e fakalogo koutou ki fakatonuga a te Aliki te otou Atua konei e avatu ne au i te aso nei; kafai e alofa koutou ki a ia, o fakalogo ki a ia kae tausi ki ana tulafono katoa, kae ka manuia koutou, ka fai foki koutou mo malo e tokouke a tino i ei. Ka fakamanuia koutou ne te Aliki te otou Atua i te fenua tena ka puke ne koutou.

¹⁷Kae kafai e se fia fakalogo koutou, kae olo o tapuaki ki nisi atua,

¹⁸ko koutou ka ta fakapalele — tena taku pati e fai atu ki a koutou i te taimi nei i te koga tenei. Ka se leva te nofoga a koutou i te fenua tena i te sua feitu o te Iolitana, te fenua tena ka puke ne koutou.

¹⁹Ko tuku atu nei ne au ke filifili koutou i mea konei, — te ola me ko te mate, te fakamanuiaga a te Atua me ko tena fakamalaiaga. Au e kalaga ki te lagi mo te lalolagi ke molimau ki te mea ka fili ne koutou. Ko te ola e tau o filifili ne koutou.

²⁰ Alofa ki te Aliki te otou Atua, fakalogo ki a ia kae talitonu ki a ia, kae ka nofo leva koutou mo tino i otou gafa i te fenua tela ne tauto ei a ia ke tuku ki otou tupuga ko Apelaamo, Isaako mo Iakopo.”