Read Te Tusi Tapu I Te Gana Tuvalu Lomiga Lua TEUTELONOME 32 Bible Online

TEUTELONOME 32 - Te Tusi Tapu I Te Gana Tuvalu Lomiga Lua bible

TEUTELONOME 32

¹“Te lagi mo te lalolagi, fakalogo mai ki aku muna, Fakalogo fakalei mai ki aku pati konei e fai.

²Aku akoakoga ka to pela me ne motiga vaiua, Kae ka pela me se sau o te vaveao i te lalolagi. Aku pati ka to pela me se afuga vaiua ki luga i lakau foniki, E pela me ne vaiua foniki ki luga i mouku malulu.

³Ka tavae ne au te igoa o te Aliki, Ka ko tena fenua ka takutaku ne latou tena maluga.

⁴“A te Aliki ko te otou puiga malosi, E tonu kae amiotonu i ana auala katoa; A te otou Atua e fakamaoni kae amiotonu; E fai ne ia te mea tonu kae nofogamalie.

⁵Ka ko koutou e se fakamaoni, e se tau koutou o fai mo tino o tena fenua, A koutou se malo agasala kae amio pelo.

⁶Tino valea, tino seai ne mafaufau; Tena te mea e tau o fai ne koutou ki te Aliki? A ia ko te otou tamana, ko ia ne faite ne ia koutou, Ne fai ne ia koutou mo malo.

⁷“Mafaufau ki aso ko teka, ki taimi i aso mua eiloa; Fai ki otou tamana ke fakamatala atu a mea ne tupu, Fai ki toeaina ke fakamatala atu a tala o aso mua.

⁸ A ia tela e Tafasili i te Maluga, ko ia ne tufa ne ia a laukele ki malo kesekese; Ko ia e fakasino ne ia a koga e tau o nofo i ei a tino. Ne fakatofu foki ne ia a malo i atua;

⁹Ka ko te fanauga a Iakopo ne fili ne Ia mō Ia.

¹⁰“Ne maua atu ne ia latou e oloolo sale i te vao, Se koga seai ne tino i ei, kae matagia. Ne puipui ne ia latou kae tausi fakalei, E pela eiloa mo tena tausi ki a ia eiloa.

¹¹Ne tausi fakalei eiloa ne te Aliki a Isalaelu ke se paku, E pela mo te aeto tela e akoako tena tama ke eva,[25] Kae fola sale ona kapakau o sapo ana punua.

¹²Ko te Aliki eiloa tokotasi ne taki ne ia tena fenua, Mo te seai o se fesoasoani o atua fakaatea.

¹³“Ne tuku ne ia ke pule latou i koga maluga, Kae ne kai ki mea e ola i fatoaga. Ne maua ne latou a hani vao i loto i kaupapa; A lakau ko olive e ola lei mai i luga i laukele fatufatua.

¹⁴A olotou pulumakau mo kouti e maua mai i ei a susu e uke Ko toe mamoe gali eiloa, e maua i te lotou fenua, Pela foki kouti mo pulumakau, Mo saito mo uaina.

¹⁵“Ne gasolo o maumea a tino o te Aliki, kae gasolo foki o teke; Ko puta kae fonu i meakai. Ne tiaki ne latou te Atua tela ne faite ne ia latou; Ne teke ne latou a ia tela ne fakaola ne ia latou.

¹⁶Ko ita te Aliki i a latou e tapuaki atu ki nisi atua; Ko uiga masei e fai ne latou, ko ala ei o kaitaua te Atua ki a latou.

¹⁷ E ofo taulaga latou ki atua loi, Atua fou kola e seki tapuaki eiloa ki ei olotou tupuga Ko atua e seki fakalogo eiloa ki ei Isalaelu.

¹⁸Ko puli i a latou te lotou Atua, te Fakaola takutakua o latou, Ko ia ne avatu ne ia te ola ki a latou.

¹⁹“I te laveaga ne te Aliki a te mea tenei, ne kaitaua a ia, Tiaki ei ne ia ana tama tagata mo ana tama fafine.

²⁰Muna a ia penei, ‘Ka se toe fesoasoani au ki a latou,’ ‘Kae ka onoono au me se a te mea ka tupu ki a latou, Tino loto makeke kae se fakamaoni.

²¹ Ne kaitaua au ki a latou mo olotou tupua, kola e fai ne Latou me ko atua o latou, ne atua mate fua. Tela la, ka aumai ne au se malo ke faka'ita ki ei latou Ka fai ne au latou ke lotomasei ki te malo o tino valea.

²²Ka oso mai toku kaitaua e pela me se afi, Ko sunu ei a mea katoa i te lalolagi. Kae oko atu ki te lalolagi mai i lalo ifo [26] Kae sunu foki ne ia a aka o mauga.

²³“‘Ka aumai ne au ki a latou a mala e se mafai o gata, Ka fakaaoga ne au aku matasana katoa o ta latou.

²⁴Ka mate latou i te fiakai mo fiva, Ka mate latou i masaki fakamataku. Ka uga mai ne au a manu fekai ke ta latou, Mo gata poisini ke u latou.

²⁵A te taua ka aumai ne ia te mate valevale i auala o te fa'kai; A mea fakamataku ka oko atu ki fale. A tamataene mo tamafine ka mate; E seai foki ne toeaina io me ne pepe e fakasao.

²⁶Ne tau eiloa o ta fakapalele ne au a latou Ko te mea ke se manatua latou.

²⁷Kae e se manako au ke fakamatamata A olotou fili o fai pela me ne Fakatakavale ne latou oku tino, Kae tela la, ko au eiloa ne ta ne au latou.’

²⁸“A Isalaelu se malo seai se mafaufau; E seai eiloa se poto i a latou.

²⁹E se lavea ne latou te pogai ne takavale ei latou; E se malamalama foki latou i te mea ne tupu.

³⁰Ai a e takavale ei te toko afe i te toko tasi, Ka ko te sefulu afe i te toko lua? A te Aliki te lotou Atua ko se fakatasi ki a latou; Te Atua malosi o latou ko tiaki ne ia latou.

³¹E iloa lei eiloa ne olotou fili i olotou atua e vaivai, E se malosi pela mo te Atua o Isalaelu.

³²A olotou fili ko se aoga valevale e pela mo Sotoma mo Komolo, Ko pela me ne vine e fua mai ki fuataga kona kae poisini,

³³Pela me ne uaina ne faite mai i mea poisini o gata.

³⁴“E masaua eiloa ne te Aliki a te mea ne fai ne olotou fili; E fakatali eiloa a ia ki te taimi tonu, ko fakasala ei ne ia latou.

³⁵ A te Aliki ka taui ne ia te lotou mea ne fai, o fakasala latou; Ka oko mai te taimi e takavale ei latou; Te aso e malaia ei latou ko pili mai.

³⁶Ka fakasao ne te Aliki tena fenua, Manafai ko lavea atu ne ia me ko seai se lotou malosi. Ka alofa a ia ki a latou kola e tavini ki a ia, Manafai ko lavea ne ia me ko seai se lotou mea e mafai o fai.

³⁷Tena, kae ka fesili te Aliki ki tena fenua penei, ‘Ko fea a atua kola ne fakalagolago koutou ki ei?

³⁸Ne fagai ne koutou ki otou taulaga, Kae tuku atu foki ne koutou a uaina ke inu latou i ei. Ke o'mai aka la o fesoasoani ki a koutou; Ke tele mai o fakasao koutou.

³⁹“‘Ko au ko te Atua e tokotasi; E seai aka foki se atua e ola penei mo au. E tamate ne au a tino, e ave foki ne au te ola ki a latou; E fakapakia ne au a tino, E fakalei foki ne au olotou pakiaga. E seai se tino e mafai o teke ki aku mea e fai.

⁴⁰Au ko te Atua e ola; ko sisi aka nei toku lima o tauto

⁴¹Me ka fakamata fakalei taku pelu malapulapu, Kae ka onoono fakalei au ko te fai mea tonu ke fai. Ka taui ne au te mea se lei a oku fili ne fai, Kae fakasala a latou kola e se fiafia ki a au.

⁴²Aku matasana ka salisali mai i ei a olotou toto Ka ko taku pelu ka tamate katoa ne ia a tino kola e teke mai ki a au. Ka se fakasao eiloa ne au so se tino e taua mai ki a au; Ke oko foki eiloa ki tino pakia mo pagota ka mate katoa.’

⁴³ “Koutou malo o te lalolagi, e tau o tavae ne koutou a tino o te fenua o te Aliki; E fakasala ne ia a tino kola e tamate ne latou a tino o tena fenua. E taui ne ia a amioga masei a ona fili ki fakasalaga, Kae fakamagalo ne ia a agasala a tena fenua.”

⁴⁴Ne faitau fakafokifoki mai ne Mose mo Iosua a te pese tena, ko te mea ke lagona ne tino Isalaelu.

⁴⁵I te otiga ne tuku atu ne Mose a akoakoga a te Atua ki tino,

⁴⁶ne fai atu ei a ia penei, “Masaua ke tausi fakalei ne koutou a fakatonuga konei ne avatu ne au i te aso nei. Toe taku atu ne koutou ki otou tamaliki, ko te mea ke fakalogo latou ki akoakoga katoa a te Atua mo te fakamaoni.

⁴⁷A muna akoako kona, e se fai pela ne muna e seai ne aoga; a muna kona ko te ola o koutou. Ka tausi koutou ki ei, kae ka ola leva koutou i loto i te fenua tena i te sua feitu o te Iolitana, tena ka puke ne koutou.”

⁴⁸ I te aso foki eiloa tena, ne faipati atu te Aliki ki a Mose, ana muna,

⁴⁹“Fano ki te Atu Mauga o Apalima i te fenua o tino Moapi, tela e 'luta tonu mo te fa'kai o Ieliko; kake ki luga i te Mauga o Nepo kae kilo ki te fenua o Kanana tenei ka avatu ne au mo tino Isalaelu.

⁵⁰A koe e mate i luga i te mauga tena, e pela mo tou taina ko Alona tela ne mate i luga i te Mauga o Holo,

⁵¹me i a koulua ne seki fakalogo mai ki a au i mua o tino Isalaelu. I te taimi ne oko ei koutou ki Vai o Melipa, i tafa o te fa'kai o Katesa i te Vao o Sina, ne fakaseaoga ne koe au i mua o te fenua.

⁵²Ka kilo ou mata ki te fenua tena, mai i te koga mao tenei, kae ka se oko koe ki ei, ko te fenua ne avatu ne au mo tino Isalaelu.”