Read Te Tusi Tapu I Te Gana Tuvalu Lomiga Lua TEUTELONOME 33 Bible Online

TEUTELONOME 33 - Te Tusi Tapu I Te Gana Tuvalu Lomiga Lua bible

TEUTELONOME 33

¹Konei a fakamanuiaga kola ne tuku atu ne Mose, te tagata o te Atua, ki tino Isalaelu koi tuai ei a ia o mate.

²A te Aliki ne vau mai i te Mauga o Sinai; Ne fanake a ia e pela me se la i luga i Etoma Kae maina mai ki tena fenua mai i te Mauga o Palana. E sefulu afe agelu e o'mai mo ia, Kae e isi se afi e ka i tena lima fakaatamai.

³A te Aliki e alofa ki tena fenua kae puipui ne Ia a tino o tena fenua.[27] Tena la, ke ifo atu tatou ki a ia, Kae fakalogo ki ana fakatonuga.

⁴A tatou e fakalogo ki Tulafono kola ne aumai ne Mose ki a tatou, Ko te koloa taua tena a te tou malo.

⁵A te Aliki ne fai mo tupu o tena fenua ko Isalaelu, I te taimi ne maopoopo a matakaiga mo takitaki o te fenua.

⁶Konei a muna a Mose e uiga mo te matakaiga o Leupena: “A Leupena, Kae ka se galo atu eiloa.”

⁷Konei ana muna e uiga ki te matakaiga o Iuta: “Te Aliki, fakalogo mai ki te olotou tagi mo se fesoasoani; Toe fai aka ke fealofani latou mo nisi matakaiga. Te Aliki, taua mo latou, Kae fesoasoani atu ki a latou i taimi e taua ei latou mo olotou fili.” [28]

⁸ Konei ana muna e uiga ki te matakaiga o Levi: “Te Aliki, fakaasi mai tou loto i te Ulima mo te Tumema[29] E auala i au tavini fakamaoni konei ko te kau sa Levi; Ne tofotofo ne koe a latou i Masa, Kae fakatalitonu ne koe te lotou amiotonu i vai o Melipa.

⁹E sili atu te lotou fakamaoni ki a koe I lo te lotou fakamaoni ki olotou matua, taina mo tamaliki. Ne tausi ne latou au fakatonuga Kae fakamaoni ki tau feagaiga.

¹⁰Ka akoako ne latou tau fanau ke fakalogo ki au Tulafono; Ka ofo olotou taulaga i luga i tou fata-fai-taulaga.

¹¹Te Aliki, fesoasoani atu ki te lotou matakaiga ke gasolo ake o malosi; Fiafia ki mea e fai ne latou. Tukipala atu olotou fili; Kae sa toe fakatugina latou ki luga.”

¹²Konei ana muna e uiga ki te matakaiga o Peniamina: “Tenei te matakaiga e alofa ki ei te Aliki, kae e puipui foki ne ia; E puipui ne ia latou i aso katoa, Kae e nofo foki i a latou.”[30]

¹³Konei ana muna e uiga ki te matakaiga o Iosefa: “A te Aliki ke fakamanuia ne ia te lotou fenua ki vaiua Mo vai mai i lalo o te laukele.

¹⁴Ke fakamanuia te lotou fenua ki fuagā lakau ko sulu gali faka eiloa, Ke maumea te lotou fenua i fuagā lakau tafasili i te gali i tau takitasi o te tausaga.

¹⁵A mauga taumua o te lotou fenua ke fonu i fuaga lakau gali;

¹⁶Ke fakafonu aka te lotou fenua ki mea lei katoa, E pela mo te fakamanuiaga a te Aliki, Tela ne faipati mai i loto i te vao ne ka. A fakamanuiaga kona ke maua ne te matakaiga o Iosefa, me i a ia e takitaki i ana taina.

¹⁷A Iosefa e malosi pela me se pulumakau tagata, pela mo sau o te pulumakau vao. A ona sau ko afe o Manase mo sefulu afe o Efalaima. E fakaaoga ne ia ana sau kona o sua a malo, Kae afuli atu ne ia ki te gataga o te lalolagi.”

¹⁸Konei ana muna e uiga ki matakaiga o Sepulona mo Isakala: “Ke maumea Sepulona i ana faigā mea togi i te tai, Ka ko Isakala ke lasi tena koloa i tena fa'kai.

¹⁹Ne kami mai ne laua a tino fakaatea ki lotou mauga. Kae ofo atu a taulaga tau i kona. E maua te lotou maumea mai i te tai, pela foki mai i te one i te matafaga.”

²⁰Konei ana muna e uiga ki te matakaiga o Kato: “Viki atu ki te Atua tela ne fakalasi ne ia te lotou fenua A Kato e fakatalitali pela me se leona, Ke sae keatea ne ia se lima io me se ulu.

²¹Ne puke ne latou a mea tafasili i te lei o te laukele ma latou; Ko te vaega e tau ki se takitaki, ne avatu ma latou. Ne fakalogo latou ki fakatonuga mo tulafono a te Atua, I te taimi e maopoopo ei a takitaki o Isalaelu.”

²²Konei ana muna e uiga ki te matakaiga o Tanu: “A Tanu se tama leona: Ne puna mai a ia mai i Pasana.”

²³Konei ana muna e uiga ki te matakaiga o Nafatali: “A Nafatali e fakamanuia ne te Aliki ke maumea; A te lotou laukele e fanatu eiloa mai i te Vai o Kalilaia ke oko eiloa ki saute.”

²⁴Konei ana muna e uiga ki te matakaiga o Asela: “E silia atu te fakamanuiaga o Asela i lo nisi matakaiga: Ke fai a ia mo fagasele i ana taina, Kae ke uke a olive e ola i tena laukele.

²⁵A ona fa'kai ke pui ki mataloa fiti, Kae ke ola faeloa a ia i te saogalemu.”

²⁶Isalaelu, e seai se atua e pau mo te otou Atua, E vau a ia mai i te lagi, i loto i kaumana, I tena mana katoatoa, o fesoasoani ki a koutou.

²⁷A te Atua ko te otou pui mai mua eiloa; A ona lima e tokai ki ei koutou, Ne afuli keatea ne ia otou fili i te taimi ne o'mai ei koutou, Kae ne fai atu ke ta fakapalele ne koutou.

²⁸Tena la, a te fanauga a Iakopo ko ola i se olaga filemu, Kae ola lei i te fenua e fonu i saito mo uaina, Te fenua e fakasusu ne te sau mai i te lagi.

²⁹Isalaelu, ko oko eiloa i tou fiafia! E seai se fenua e pau mo koe, A koe se malo ne fakasao ne te Aliki. A te Aliki ko tau talita mo tau pelu, E puipui ne ia koe, kae avatu te manumalo; A ou fili ka o'mai o fakamolemole mai ke alofa atu koe ki a latou, Kae ka lakalaka fua ne koe ki lalo.