Read Te Tusi Tapu I Te Gana Tuvalu Lomiga Lua TEUTELONOME 4 Bible Online

TEUTELONOME 4 - Te Tusi Tapu I Te Gana Tuvalu Lomiga Lua bible

TEUTELONOME 4

¹Tena, kae fai atu a Mose ki te fenua penei, “Tausi ki tulafono katoa konei ka akoako atu ne au, kae ka nofo koutou i te fenua tela ne tuku atu ne te Aliki te Atua o otou tupuga mo koutou.

² Sa fakaopoopo se mea ki fakatonuga konei e tuku atu ne au, io me ave keatea se mea mai i ei. Fakalogo ki fakatonuga a te Aliki te otou Atua kola ko oti ne tuku atu ne au.

³ Ne lavea foki eiloa ne koutou ki otou mata a te mea ne fai ne te Aliki i te Mauga o Peolo. Ne ta fakapalele ne ia a tino kola e tapuaki ki a Paala i kona,

⁴ka ko koutou kola ne fakamaoni eiloa ki te Aliki te otou Atua, konei eiloa koi ola mai.

⁵“Ko oti ne akoako atu ne au ki a koutou a tulafono katoa, e pela eiloa mo te fakatonuga a te Aliki toku Atua ki a au. Tausi fakalei ki tulafono kona manafai ko nofo koutou i te fenua tena ka olo koutou o puke.

⁶Tausi ki tulafono kona mo te fakamaoni, kae ka iloa ne tino o nisi fenua i a koutou ne tino poto. Kafai e lagona ne latou a tulafono katoa a koutou kona, kae ka fai olotou muna penei, ‘A te malo tenei se malo e poto kae lasi te malamalama i ei!’

⁷“E seai aka foki eiloa se malo, faitalia me pefea te takutakua o te malo tena, e isi sena atua penei mo te Aliki te 'tou Atua, tela e toka faeloa o fesoasoani mai ki a tatou manafai e kalaga atu tatou ki a ia. E toka faeloa a ia o fesoasoani mai i so se taimi e kalaga atu ei tatou ki a ia mo se fesoasoani.

⁸E seai aka foki eiloa se malo, faitalia me pefea te takutakua o te malo tena, e isi ne ana tulafono e tonu penei mo tulafono konei ne akoako atu ne au ki a koutou i te aso nei.

⁹Ke mataala koutou! Masaua ke mo a e puli i a koutou, i aso o otou olaga, a te mea tenei ne lavea fakalei ne koutou ki otou mata.

¹⁰Fakamatala atu ki otou tamaliki mo otou mokopuna a te taimi ne tu ei koutou i mua o te Aliki te otou Atua i te Mauga o Sinai,[4] i te taimi ne fai mai ei ki a au penei, ‘Fakamaopoopo te fenua. Au e manako o faipati ki a latou, ko te mea ke fakalogo mai latou ki a au i aso o olotou olaga, kae ke mafai foki ne latou o akoako atu olotou tamaliki ke mataku mai ki a au.’

¹¹ “Fakamatala atu ki otou tamaliki te otou ologa o tu i te tafito o te mauga tela e ufi ne te au o te afi, mo te afi e ula i luga i ei.

¹²Fakamatala atu ki a latou a te faipatimaiga a te Aliki ki a koutou mai i te afi, ne lagona ne koutou tena leo kae seki lavea ne koutou tena foitino.

¹³ Ne fai atu ne ia ki a koutou a te mea e tau o fai ne koutou, ko te mea ke mafai ne koutou o tausi a te feagaiga a ia ne fai mo koutou — e 'tau o tausi ne koutou a Tulafono e Sefulu kola ne tusi ne ia i luga i papa fatu kola e lua.

¹⁴ A te Aliki ne fai mai ki a au ke akoako atu ki a koutou a tulafono katoa kola e tau o fakalogo koutou ki ei i te fenua tena ka olo koutou o puke.

¹⁵“I te taimi ne faipati atu ei a te Aliki ki a koutou mai i loto i te afi i te Mauga o Sinai, kae e seki lavea ne koutou ana foliga.

¹⁶ Tela la, mo te lei o koutou, masaua ke sa faite ne koutou ne tupua, me se tupua tagata io me se tupua fafine,

¹⁷se manu vae fa io me se manu eva,

¹⁸me se manu 'tolo io me se ika.

¹⁹Sa taumafai o tapuaki kae tavini ki mea e lavea ne koutou i te lagi — pela mo te la, te masina, mo fetu. A te Aliki te otou Atua ne tuku atu ne ia a mea katoa kona ki nisi itu kaiga tino ke tapuaki sale ki ei.

²⁰ Ka ko koutou ko tino ne fakasao ne ia mai Aikupito, te koga o te afi. Ne aumai ne ia koutou mai i kona, ke fai koutou mo tino o tena fenua, e penei mo te tulaga tenei ko nofo nei koutou i ei.

²¹ Mai i otou amioga se lei, tenei ko kaitaua mai ei a te Aliki ki a au kae tauto mai i a au ka se oko atu ki te sua feitu o te Vaitafe o Iolitana ki te fenua laukele ola tenei ko oti ne aumai ne ia mo koutou.

²²Au e mate eiloa i te fenua tenei, se oko atu eiloa au ki te sua feitu o te vaitafe, ka ko koutou ka olo atu ki te sua feitu o nofo i te fenua laukele ola tena.

²³Masaua ke sa puli i a koutou a te Feagaiga a te Aliki te otou Atua ne fai mo koutou. Tausi ki tena fakatonuga ke sa faite ne vaegā tupua o tapuaki ki ei,

²⁴ me i te Aliki te otou Atua e pela me se afi ka ulaula; e se manako a ia ke tavini koutou ki ne atua fakaatea.

²⁵“Ke oko foki eiloa ki te taimi ko leva ei te 'nofoga a koutou i te fenua, ko isi ne tamaliki mo mokopuna o koutou, kae masaua eiloa ke sa faite ne vaega tupua o tapuaki ki ei, i a koutou ma agasala. A te mea tena se amioga masei i mua o te Aliki, kae e kaitaua ki tino e fai ne latou te mea tena.

²⁶Ko kalaga au ki te lagi mo te lalolagi ke fai mo molimau i te aso nei, me kafai e se fakalogo mai koutou ki a au, ko koutou ka ave keatea mai i te fenua tenei. Ka se leva te otou nofoga i te fenua tena i te feitu atu o te Iolitana, kae ka ta fakapalele foki koutou.

²⁷ Ka fakasalalau koutou ne te Aliki ki nisi malo, kae ka mutana fua otou tino ka ola mai i kogā koga kona.

²⁸Ka tavini atu koutou ki atua ne faite ne tino, ko atua lakau, atua fatu, ne atua e se mafai o lavea io me lagona se mea, se mafai o kai io me sogi se mea.

²⁹ Ka taumafai koutou o sala te Aliki te otou Atua i fenua kona, kae kafai e tonu e sala koutou ki a ia mo otou loto katoa, kae ka maua eiloa ne koutou.

³⁰Kafai ko maua koutou ne fakalavelave kae ko tupu katoa a mea kona ki a koutou, ko tena uiga, ko koutou ka saga atu ki te Aliki o fakalogo ki a ia.

³¹A te Aliki se Atua alofa, e se mafai o tiaki ne ia koutou io me ta fakamasei koutou, kae ka se mafai o puli i a ia a te feagaiga a ia ne fai mo otou tupuga.

³²“Mafaufau fakalei ki mea ne tupu i aso mua, i aso ne seki fanau ei koutou, ke oko atu eiloa ki te taimi ne faite ei ne te Atua a te tagata i luga i te lalolagi. Mafaufau fakalei ki mea katoa ne tupu i luga i te lalolagi kātoa. Kai isi eiloa se mea tafasili penei kai tupu i aso mua? Kai lagona eiloa ne se tino i a koutou se mea penei ne tupu i aso mua?

³³Kai iloa eiloa ne koutou ne tino ke ola mai manafai ko oti ne lagona ne latou se atua e faipati atu ki a latou mai te afi, e penei mo te mea ko oti ne lagona ne koutou?

³⁴Kai isi se atua ne iloa ne koutou ke fano o puke mai se itu kaiga tino mai se isi malo aka kae fai ne ia mo fai ona tino, e penei mo te mea ne fai ne te Aliki te otou Atua mo koutou i Aikupito? Ne fakaaoga ne ia tena mana mo tena malosi i otou mua eiloa, i te aumaiga ne ia o mala mo taua, mo te faiga ne ia o vavega mo mea fakaofoofogia, kae fai ne ia a mea fakamataku ke tupu.

³⁵ Ne fakaasi atu ne te Aliki a mea kona ki a koutou, ke talitonu koutou me ko ia fua ko te Atua kae seai aka foki.

³⁶Ne talia ne ia ke lagona ne koutou tena leo mai i te lagi, ko te mea ke fai mai ana fakatonuga ki a koutou; kae i lalo i konei, ne lavea ne koutou te afi fakamataku, kae ne faipati mai a ia ki a koutou mai i ei.

³⁷Mai i tena alofa ki otou tupuga, tena ne fili ei ne ia koutou, kae ne aumai ne ia koutou keatea mai Aikupito i tena mana malosi.

³⁸I te taimi ne malaga atu ei koutou, ne afuli ne ia a malo e takutakua atu kae malosi atu i a koutou mai otou mua, ko te mea ke ulu atu koutou ki te lotou fenua, tenei e nofo nei koutou i ei.

³⁹Tela la, masaua te aso nei kae sa toe puli: a te Aliki ko te Atua i te lagi mo te lalolagi. E seai aka foki se isi atua aka.

⁴⁰Tausi ki ana tulafono katoa konei ne avatu ne au ki a koutou i te aso nei, kae ka fanofano lei te olaga o koutou mo tino i otou gafa. Ka tumau eiloa koutou i te fenua tenei ne aumai ne te Aliki te otou Atua ke fai mo tofi o koutou ki te se gata mai.”

⁴¹ Ne tuku fakaatea ne Mose a fa'kai e tolu i te feitu ki te saegala o te Iolitana,

⁴²ko fa'kai kona e mafai o tele ki ei se tino ke sao a ia manafai ne tamate ne ia se tino e se fai fili mo ia i se mea pasala. E mafai ne ia o tele o muni i fa'kai kona ko se tamate ei a ia.

⁴³A te fa'kai fakalafi o te matakaiga o Leupena ko te fa'kai o Pesela i te kogā koga laugatasi i te vao; ko te fa'kai fakalafi o te matakaiga o Kato ko te fa'kai o Lamota i te koga laukele o Kileata; ka ko te fa'kai fakalafi o te matakaiga o Manase ko te fa'kai o Kolana i te koga laukele o Pasana.

⁴⁴Ne tuku atu ne Mose a tulafono mo akoakoga a te Atua ki te fanauga a Isalaelu.

⁴⁵Konei a tulafono mo fakanofonofoga kola ne faipati atu ne Mose ki tino Isalaelu i te taimi ko oti ne teka mai ei latou keatea mai Aikupito,

⁴⁶i tua atu o te vaitafe ko te Iolitana i te vanu e tu fakafesagai ki te fa'kai o Petepeolo. A te koga tenei e tu i te koga laukele tela ne nofo muamua mo Sekono, te Tupu o tino Amoli, tela ne tupu i te fa'kai o Hesepono. A te tupu tena ne fakatakavale ne Mose mo te kau Isalaelu i te taimi ne teka mai ei latou keatea mai Aikupito.

⁴⁷Ne puke ne latou tena fenua mo te fenua o Oko, te Tupu o Pasana, ko ia ko te sua tupu o tino Amoli tela e nofo i te feitu ki te saegala o te Iolitana.

⁴⁸A te koga laukele tenei e fanatu mai te fa'kai o Aloela, i kaugutu o te Vaitafe o Alinona, ke oko atu eiloa ki te Mauga o Siliona[5] i matu, ko te Mauga o Helemoni tena.

⁴⁹E aofia foki i kona a te koga fenua katoa i te feitu ki te saegala o te Vaitafe o Iolitana, ke oko atu eiloa ki te Tai Mate i saute, pela foki ki te tafito o te Mauga o Peseka i te saegala.