Read Te Tusi Tapu I Te Gana Tuvalu Lomiga Lua TEUTELONOME 5 Bible Online

TEUTELONOME 5 - Te Tusi Tapu I Te Gana Tuvalu Lomiga Lua bible

TEUTELONOME 5

¹Ne fakamaopoopo ne Mose a tino Isalaelu katoa kae fai atu ki a latou penei, “Tino Isalaelu fakalogo mai ki tulafono katoa konei ka tuku atu ne au ki a koutou i te aso nei. Masaua o tauloto fakalei ne koutou kae tausi ki ei.

²E isi se feagaiga ne fai ne te Aliki te tou Atua i te Mauga o Sinai ki otou tupuga,

³pela foki ki a tatou konei e ola nei.

⁴A te Aliki ne faipati atu ki a koutou i luga i te mauga mai i te afi.

⁵I te taimi tena, au ne tu i te va o koutou mo te Aliki o fakaasi atu ana muna e fai, me i a koutou ne mataku i te afi, tela la, seki manako ei koutou o olo aka ki luga i te mauga.

⁶“Muna a te Aliki, ‘Au ko te Aliki te otou Atua, ne fakasao ne au koutou mai Aikupito, te fenua ne fakapologa ei koutou.

⁷“‘Sa tapuaki koutou ki se isi atua, na ko au eiloa.

⁸ “‘Sa faite ne koutou se fakatusa o so se mea i te lagi io me i te lalolagi, io me i vai i lalo ifo o te laukele.

⁹ Sa ifo foki koutou ki so se tupua me tapuaki ki ei, me ko au ko te Aliki te otou Atua, e se mafai o fakasaoloto ne au koutou ke ifo ki so se mea. E fakasala ne au a latou kola e ita ki a au, ke oko eiloa ki mokopuna o latou i te tolu mo te fa o kautama.

¹⁰Kae e alofa eiloa au ki a latou kola e alofa mai ki a au kae fakalogo ki aku tulafono, ke oko eiloa ki te afe o kautama.[6]

¹¹ “‘Sa fakaaoga ne koutou toku igoa ki mea masei, me i a Au, te Aliki te otou Atua, ka fakasala ne au so se tino e fakaaoga 'se ne ia toku igoa.

¹² “‘Ke tausi kae fakamalu ne koutou te Sapati, e pela eiloa mo taku fakatonuga ki a koutou.

¹³ E ono aso e fai ei otou galuega,

¹⁴ka ko te fitu o aso se aso malolo, ne fakatapu ne au. I te aso tena, e seai eiloa se tino i a koutou e 'tau o fai sena galuega, e pena foki otou tamaliki, mo otou pologa, mo otou manu, ke oko eiloa ki tino fakaatea kola e nofo i te otou fenua. A otou pologa e tau o malolo pena mo koutou.

¹⁵Masaua i a koutou ne nofo pologa i te fenua o Aikupito, kae ne fakasao ne au koutou i toku mana mo toku malosi. Tena te mea ne fakatonu ei ne au koutou ke tausi te Sapati.

¹⁶ “‘Ke ava koutou ki otou tamana mo otou matua, ko te mea ke ola leva koutou i te fenua tela ne tuku atu ne au ki a koutou.

¹⁷ “‘Sa tatino.

¹⁸ “Sa mulilua.

¹⁹ “‘Sa kaisoa.

²⁰ “‘Sa molimau fakaloiloi ne koutou a nisi tino.

²¹ “‘Sa manako ki avaga a nisi tino; sa manako ki olotou fale, me ki olotou manafa, me ko olotou tavini, me ko olotou manu, me ko so se mea ake foki eiloa a tino kona.’

²² “Kona a fakatonuga ne tuku mai ne te Aliki ki a koutou i te taimi ne maopoopo ei koutou i te mauga. Ne tuku atu ne ia a fakatonuga kona i te taimi ne faipati mai ei a ia mo te leo lasi mai i te afi mo te kaumana matolu. Ne tusi ne ia ki papa fatu e lua, tuku mai ei ne ia ki a au.

²³“I te taimi ne ka ei te mauga i te afi, kae lagona ne koutou a te leo mai i te pouliga, kae ne o'mai otou takitaki mo pule o matakaiga o fai mai ki a au penei,

²⁴‘A te Aliki te tou Atua ne fakaasi mai tena 'mana mo tena malosi i te taimi ne lagona ei ne matou tena leo mai i loto i te afi.’ Ko iloa nei ne matou i te aso nei, me kafai ne faipati te Atua ki te tino, e se mate te tino tena kae e ola eiloa.

²⁵Ai a ka fai fua ei tatou ke mate? A tatou e mate eiloa i te afi tena. A tatou e mate eiloa manafai e toe lagona ne tatou te Aliki te tou Atua e toe faipati mai ki a tatou.

²⁶Kai isi eiloa se tino ola ne ola eiloa manafai ko oti ne lagona ne ia te leo o te Atua ola e faipati mai mai te afi?

²⁷Mose, foki o fakalogologo fakalei ki mea katoa e fai mai ne te Aliki te 'tou Atua. Ka oti, ko foki mai ei koe o fakailoa mai ana muna ne fai atu ki a koe, kae ka fakalogo eiloa matou ki muna kona.’

²⁸“I te lagonaga ne te Aliki a muna kona, muna a ia ki a au, ‘Ko oti ne lagona ne au a muna a tino kona ne fai, ne muna tonu eiloa.

²⁹Moi ne tumau la olotou manatu pena! Moi ne tumau la te fakaaloalo mai o latou ki a au, mo te fakalogo ki aku fakatonuga, ko te mea ke fanofano lei ki mua te olaga o latou mo tino i olotou gafa ki te se gata mai.

³⁰Fano o fai ki ei ke foki atu ki olotou faleie.

³¹Ka ko koe e Mose, nofo mai ke tuku atu ne au aku tulafono mo fakatonuga katoa. Akoako atu a tulafono kona ki tino, ko te mea ke fakalogo kae tausi ki ei manafai ko nofo i te fenua tenei ka tuku atu ne au mo latou.’

³²“Te fanauga a Isalaelu, masaua o fai a mea katoa ne fakatonu atu ne te Aliki te otou Atua ke fai ne koutou. Ke mo a e ofa ne koutou se tulafono e tasi i tulafono ne tuku atu ne ia.

³³Ke tausi ne koutou a tulafono katoa kona, ko te mea ke fanofano lei ki mua te otou olaga, kae ke nofo tumau foki koutou i te fenua tena ka puke ne koutou.