Read Te Tusi Tapu I Te Gana Tuvalu Lomiga Lua TEUTELONOME 6 Bible Online

TEUTELONOME 6 - Te Tusi Tapu I Te Gana Tuvalu Lomiga Lua bible

TEUTELONOME 6

¹“Kona a tulafono katoa kola ne fakatonu mai ne te Aliki te otou Atua ke akoako atu ne au ki a koutou. E tau o tausi ne koutou a tulafono katoa kona i te taimi e nofo ei koutou i te fenua tena ka puke ne koutou.

²I aso o otou olaga, e tau mo koutou, mo tino i otou gafa, o fakaaloalo te Aliki te otou Atua, kae tausi ana tulafono katoa konei ka avatu ne au ki a koutou, ko te mea ke nofo leva koutou i te fenua tena ka avatu mo koutou.

³Tino Isalaelu, fakalogo kae tausi ki tulafono kona; kae ka fanofano lei ki mua otou olaga, kae ka fai koutou mo malo takutakua, kae ka nofo tumau koutou i te fenua maumea kae laukele ola tena, e pela eiloa mo te tautoga a te Aliki te Atua o otou tupuga.

⁴ “Isalaelu, ke masaua ne koutou a te mea nei! A te Aliki, ko te Aliki eiloa e tokotasi—a ia ko te tou Atua.[7]

⁵ Alofa ki te Aliki te otou Atua mo otou loto kātoa, mo otou agaga katoa, mo otou malosi katoa.

⁶ Ke mo a eiloa e puli i a koutou a fakatonuga konei ne avatu ne au ki a koutou i te aso nei.

⁷Akoako atu a tulafono kona ki otou tamaliki. Kafai e nofo koutou i otou fale, sa puli o fakamasausau faeloa a tulafono kona, pela foki manafai e olo koutou ki se koga, io me manava koutou, pela foki i taimi e galue ei koutou.

⁸Masaua o tusi a tulafono kona ki ne pepa kae sai ki otou lima io me ki otou lae, ko te mea ke masaua faeloa ne koutou.

⁹Ke tusi foki ne koutou i pou o mataloa o otou fale, pela foki i mataloa o otou fa'kai.

¹⁰ “E pela eiloa mo te tautoga a te Aliki te otou Atua ki otou tupuga ko Apelaamo, Isaako mo Iakopo, e avatu eiloa ne ia te fenua e tu ei a fa'kai lasi kae maumea, ne fa'kai e seki faite ne koutou.

¹¹Ka maua ne koutou a fale e fonu i mea lei kola e se a koutou, mo vaikeli e seki keli ne koutou, mo toga vine mo toga olive kola e seki toki ne koutou. Kafai ko aumai koutou ne te Aliki ki te fenua tenei, tela e uke te meakai i ei,

¹²masaua o sa puli i a koutou a te Aliki tela ne fakasao ne ia koutou mai Aikupito, te koga ne nofo pologa ei koutou.

¹³ Ke mataku koutou ki te Aliki te otou Atua; ko ia fua e tau o tapuaki koutou ki ei; ka ko tena igoa fua ke fakaaoga ne koutou i taimi e fai ei otou tautoga.

¹⁴Sa tapuaki ki ne atua fakaatea, pela mo atua o fenua e pili mai ki a koutou.

¹⁵Kafai e tapuaki koutou ki nisi atua, ko te Aliki ka kaitaua kae ka aumai ne ia te afi e ta fakapalele ei koutou, me i te Aliki te otou Atua, tenei e nofo tasi mo koutou, e se fiafia ke tapuaki koutou ki nisi atua fakaatea.

¹⁶ “Sa tofotofo ne koutou te Aliki te otou Atua, e pela mo te mea ne fai ne koutou i Masa.

¹⁷Masaua o tausi ki tulafono katoa kola ko oti ne tuku atu ne ia ki a koutou.

¹⁸Ke fai ne koutou a mea kola e fai mai te Aliki me e tonu kae 'lei, kae ka solosolo 'lei otou olaga. Ka mafai foki ei ne koutou o puke a te fenua laukele ola tela ne tauto te Aliki ke tuku ki otou tupuga;

¹⁹ka mafai foki ei ne koutou o afuli keatea otou fili mai i te fenua, e pela eiloa mo tena tautoga.

²⁰“I se taimi fakamuli, ka fesili atu otou tamaliki ki a koutou penei, ‘Ai a ne fakatonu mai ei te Aliki te motou Atua ke tausi matou ki tulafono katoa kona?’

²¹Tena, kae ka tali atu koutou penei, ‘A tatou ne fai mo pologa a te tupu o Aikupito, kae ne fakasao tatou ne te Aliki ki tena mana malosi.

²²Ne matea eiloa ne matou ki omotou mata a vavega mo galuega fakamataku ne fai ne ia ki tino Aikupito, pela foki ki te lotou tupu mo ana ofisa.

²³Ne fakasao ne ia tatou mai Aikupito ke aumai ne ia tatou ki konei, ke tuku mai ne ia a te fenua tenei, e pela eiloa mo tena tautoga ki tupuga o tatou.

²⁴Tena, kae fakatonu mai te Aliki te tou Atua ki a tatou ke tausi tatou ki tulafono katoa kona, kae ke mataku atu foki ki a ia. Kafai e fai ne tatou te mea tena, kae ka tausi faeloa ne ia te tou malo kae fakamaumea ne ia.

²⁵Kafai e tausi fakamaoni ne tatou a fakatonuga a te Atua, ne fakatonu mai, ka fiafia a ia.’ [8]