Read Te Tusi Tapu I Te Gana Tuvalu Lomiga Lua TEUTELONOME 7 Bible Online

TEUTELONOME 7 - Te Tusi Tapu I Te Gana Tuvalu Lomiga Lua bible

TEUTELONOME 7

¹ “A te Aliki te otou Atua ka aumai ne ia koutou ki te fenua tenei ka nofo koutou i ei, kae ka afuli keatea ne ia mai i kona a tino o fenua fakaatea. I te taimi e olo atu ei koutou ki te fenua tena, kae ka afuli keatea ne ia mai i kona e fitu malo, e lasi kae malosi atu i a koutou: ko te malo o tino Heti, te malo o tino Kilikase, te malo o tino Amoli, te malo o tino Kanana, te malo o tino Pelise, te malo o tino Hivi, mo te malo o tino lepuse.

²Kafai ko takavale a tino o fenua kona i a koutou mai i te fesoasoani o te Aliki te otou Atua, masaua me e tau o tamate katoa ne koutou a tino o fenua kona. Sa fai se va fakataugasoa mo latou, io me alofa koutou ki a latou.

³Ke mo a eiloa e avaga koutou ki tino kona, io me talia otou tamaliki ke avaga ki a latou,

⁴i te mea ma taki keatea ne latou otou tamaliki mai i te Aliki, o fai ke tapuaki atu ki nisi atua fakaatea. Kafai e tupu te mea tena, ko te Aliki ka kaitaua ki a koutou, kae 'ta fakapalele koutou.

⁵ Tela la, olo o ofa olotou fata-fai-taulaga mo pou fatu e tapuaki sale latou ki ei, ofa foki ki lalo a fakatusa o te olotou atua fafine ko Asaila, kae sunu olotou tupua.

⁶ Fai ne koutou te mea tena i a koutou ne tino o te fenua o te Aliki te otou Atua. Ne filifili ne ia koutou mai i tino katoa o te lalolagi ke fai mo ona tino tonu.

⁷“A te Aliki ne alofa kae filifili ne ia koutou, e se fai pela ona ko koutou e tokouke atu i nisi malo; a koutou ko te toe fenua foliki eiloa i te lalolagi.

⁸A te Aliki ne alofa ki a koutou kae manako o tausi te feagaiga ne fai ne ia ki otou tupuga. Tena te mea ne fakasao ei ne ia koutou i tena mana malosi, kae aumai ne ia koutou keatea mai i te nofo pologa i Aikupito.

⁹ Masaua i te Aliki te otou Atua ko ia eiloa tokotasi ko te Atua, kae ko ia foki eiloa ko fakamaoni. Ka tausi eiloa ne ia tena feagaiga kae fakaasi tena alofa ki tino e alofa ki a ia, kae tausi ki ana fakatonuga i tupulaga e afe,

¹⁰kae e fakasala eiloa ne ia a tino e se fiafia ki a ia.

¹¹Tela la, i te taimi nei, e tau koutou o tausi ki mea ko oti ne akoako atu ki a koutou; tausi ki tulafono katoa konei ne tuku atu ne au ki a koutou i te aso nei.

¹² “Kafai e tausi koutou ki fakatonuga kona mo te fakamaoni, kae ka tausi foki te Aliki te otou Atua ki tena feagaiga ne fai mo koutou, kae ka fakaasi foki tena alofa ki a koutou, e pela mo tena tautoga ki otou tupuga.

¹³Ka alofa a ia ki a koutou, kae fakamanuia ne ia koutou, ko te mea ke tokouke koutou pela foki mo otou fanau; ka fakamanuia foki ne ia otou fatoaga ko te mea ke maua ne koutou ne saito, uaina, mo sinu olive; kae ka avatu foki ne ia ne pulumakau mo mamoe e uke. Ka avatu ne ia a fakamanuiaga katoa kona i te fenua tela ne tauto a ia ki otou tupuga me ka avatu mo koutou.

¹⁴Ka seai eiloa se fenua i te lalolagi e pau mo koutou i te manuia. E seai eiloa se tino i a koutou io me ko otou pulumakau ka se fanafanau.

¹⁵Ka puipui ne te Aliki a koutou mai masaki valevale; ka se toe aumai ne ia a masaki masei kola ne maua sale ne koutou i Aikupito, kae e ave fua ne ia ki otou fili.

¹⁶Ke 'ta kae ofa fakapalele ne koutou a malo kola e tuku mai ne te Aliki te otou Atua ke fakatakavale ne koutou, kae ke mo a eiloa koutou e alofa ki a latou. Sa tapuaki ki olotou atua i a koutou ma malaia.

¹⁷“Sa manatu pela i tino kona e tokouke atu i a koutou, kae e se maua ne koutou o afuli keatea.

¹⁸Sa mataku i a latou; masaua te mea ne fai ne te Aliki te otou Atua ki te tupu o Aikupito mo tino o tena fenua.

¹⁹Masaua a mala kola ne lavea fakalei ne koutou, vavega mo mea fakaofoofogia, mo te mana o te Aliki te otou Atua tela ne fakasao ei koutou. A tino konei e mataku koutou i ei ka ta fakapalele foki ne ia, e pela mo te 'ta fakamaseiga ne ia a te kau Aikupito.

²⁰Ka fai ne ia latou ke mataku valevale,[9] ka 'ta ne ia a tino kola e tele o muni.

²¹Tela la, sa mataku i tino konei. A te Aliki te otou Atua e fakatasi atu ki a koutou; a ia se Atua e takutakua, kae e tau koutou o mataku ki a ia.

²²Ka afuli fakasolosolo eiloa ne ia a malo konei i te taimi e olo atu ei koutou ki loto i te fenua. Ka se mafai o 'ta fakapalele ne koutou i te taimi e tasi, me kafai e fai ne koutou pena, ko tena uiga, ka gasolo o uke a manu fekai i kona, kae ka fai mo fakalavelave ki a koutou.

²³A te Aliki ka tuku mai ne ia otou fili ke fakatakavale ne koutou; ka fai ne ia ke takasese i te mataku, ke oko ki te taimi e 'ta fakapalele ei ne koutou.

²⁴Ka tuku mai foki ne ia olotou tupu ke i lalo o te otou malosi. Ka tamate ne koutou kae ka se toe manatua atu eiloa latou. Ka seai se tino e mafai o taofi ne ia koutou; ka 'ta fakapalele ne koutou a tino katoa.

²⁵Masaua o sunu olotou tupua. Sa fiafai ki siliva mo aulo kona i luga i tupua kona; sa puke foki ne koutou ma koutou. Kafai e puke ne koutou, ko te Aliki ka kaitaua me e se fiafia ki tupua.

²⁶Sa aumai ne tupua pena ki loto i otou fale, i te mea ma oko atu ki a koutou a te fakamalaiaga tela ne ave ki mea kona. E tau mo koutou o takalialia i tupua kona, me ne mea ko oti ne fakamalaia ne te Aliki.