Read Te Tusi Tapu I Te Gana Tuvalu Lomiga Lua TEUTELONOME 8 Bible Online

TEUTELONOME 8 - Te Tusi Tapu I Te Gana Tuvalu Lomiga Lua bible

TEUTELONOME 8

¹“Tausi fakalei ki tulafono katoa konei ko oti ne avatu ne au ki a koutou i te aso nei, ko te mea ke ola koutou, ke tokouke otou fanau, kae ke maua foki ne koutou a te fenua tela ne tuku ne te Atua ki otou tupuga.

²Masaua te takiga a koutou ne te Aliki te otou Atua i te malaga loa a koutou i loto i te vao i tausaga e fasefulu konei ko teka; masaua foki a mea faigata ne aumai ne ia ki a koutou ke tofotofo ei koutou, ko te mea ke iloa tonu ne ia a mea e mafaufau koutou o fai, ke iloa foki ne ia me ko koutou e tausi ki ana fakatonuga me ikai.

³ Ne fai ne ia koutou ke fiakai, kae oti aka, aumai foki ei ne ia te manai ke kai koutou i ei, te meakai tena e seki kai eiloa koutou io me ko otou tupuga ki ei. Ne fai ne ia te mea tena ke akoako ei koutou, ke iloa ne koutou me i te tagata e se tau o fakalagolago fua ki meakai ke ola a ia, kae ke fakalagolago foki ki muna katoa e fai mai ne te Aliki.

⁴I tausaga konei e fasefulu, a otou gatu e seki masei eiloa, mo otou vae foki e seki pala eiloa.

⁵Masaua i te Aliki te otou Atua e fakatonu kae fakasala ne ia koutou e pela mo te mea e fai ne te tamana ki ana tamaliki.

⁶Tela la, ke fai ne koutou te mea ne fakatonu atu ne te Aliki ki a koutou, kae tautali i ana tulafono, kae mataku ki a ia.

⁷Ko aumai nei koutou ne te Aliki te otou Atua ki te fenua laukele ola — se fenua e isi ne vaitafe mo vaipuna i ei, mo vai i lalo o te laukele kola e tafe ki loto i vanu mo mauga foliki;

⁸se laukele e fua mai i ei a saito mo kalite mo vine mo mati mo pomekalanite, mo olive mo hani.

⁹Ka seai se tino e fiakai io me e manako ki se mea i te fenua tena. A kaupapa i te fenua tena e maua i ei te fiti; mo te palasi e maua foki i mauga o te fenua tena.

¹⁰E maua katoa a mea katoa e fiakai koutou ki ei i te fenua tena, tela la, ka viki kae fakafetai koutou ki te Aliki te otou Atua e tusa eiloa mo te fenua laukele ola tena ne avatu ne ia mo koutou.

¹¹ “Masaua ke sa puli i a koutou a te Aliki te otou Atua; masaua o tausi ana tulafono katoa konei ka avatu ne au ki a koutou i te aso nei.

¹²Kafai ko malie koutou i meakai e maua ne koutou, kae ko toka foki otou fale gali ne faite,

¹³kae ko uke foki otou pulumakau mo mamoe mo siliva mo aulo, mo nisi mea a koutou ko gasolo o uke,

¹⁴masaua la, ke mo a e maua ne koutou te loto fakamatamata kae fakapuli i otou loto a te Aliki te otou Atua tela ne fakasao ne ia koutou mai Aikupito, te fenua ne nofo pologa ei koutou.

¹⁵Ne takitaki ne ia koutou i te vao lasi kae fakamataku, tela e uke i ei a gata mo akalava poisini. Ne fai ne ia ke tafe mai te vai mai i loto i kaupapa ke inu ei koutou, me i te koga tena ne olo ei koutou se koga e seai ne vai i ei.

¹⁶Ne avatu ne ia te manai i kona ke kai koutou i ei, ko te meakai tena e seki kai eiloa ki ei otou tupuga. Ne fakaoko atu ne ia a mea faigata e uke ke tofotofo ei te otou fakatuanaki, ko te mea kafai e tumau koutou i te fakatuanaki kae ka fakamanuia ne ia koutou o avatu a mea gali e uke ma koutou.

¹⁷Tela la, ke mo a eiloa e manatu koutou pela i a koutou ko maumea ne fai eiloa ne koutou.

¹⁸Masaua me ko te Aliki te otou Atua ne fai ne ia koutou ke maumea. Ne fai ne ia te mea tena, me koi tumau eiloa tena fakamaoni i aso nei ki te feagaiga tela ne fai ne ia mo otou tupuga.

¹⁹Sa puli lele eiloa i a koutou a te Aliki te otou Atua, sa fulitua atu foki ki a ia o tapuaki kae tavini atu ki nisi atua. Kafai e se fakalogo mai koutou ki aku muna kona ne fai atu, ko koutou ka 'ta fakapalele.

²⁰Kafai e se fakalogo koutou ki te Aliki, ko koutou ka 'ta fakapalele e pela eiloa mo malo kola e 'ta sale ne ia i te taimi e olo atu ei koutou ki mua.