Read Te Tusi Tapu I Te Gana Tuvalu Lomiga Lua IOANE 15 Bible Online

IOANE 15 - Te Tusi Tapu I Te Gana Tuvalu Lomiga Lua bible

IOANE 15

¹“Ko au ko te vine tonu, ka ko toku Tamana ko te tino galue i vine.

²A kaula katoa kola e i a au kae e se 'fua, e 'kati ne ia keatea, ka ko kaula takitasi kola e 'fua, e velevele faka'lei ne ia, ko te mea ke gasolo o 'fua malosi.

³Ko oti ne faka'ma koutou ne te muna tela ne faipati atu ne au ki a koutou.

⁴Ke 'nofo tumau koutou i a au, ka ko au i a koutou. E se mafai o fua mai ne fuaga o te kaula i a ia eiloa, seiloga ke 'piki mau ki te vine. E pena foki koutou manafai e se 'piki mau koutou ia au.

⁵“Au ko te vine, ka ko koutou ko kaula. So se tino e nofo mau i a au, mo au i a ia, ka fua malosi mai a ia; me se mafai ne koutou o fai se mea manafai e galo au i a koutou.

⁶So se tino e se nofo mau i a au, ka 'pei keatea e pela mo se kaula ko pakupaku; ko kaula kona ka fakaputu fakatasi, kae 'pei ki loto i te afi o 'sunu i ei.

⁷Kafai e 'nofo mau koutou i a au, kae tumau foki aku muna ia koutou, ko tona uiga, so se mea e ma'nako koutou o fakatagi mai, ka maua eiloa ne koutou.

⁸Tenei te auala e fakaasi atu ei te vikiga o toku Tamana: manafai e fua malosi mai koutou. Ko te auala foki tenei e fai ei koutou mo oku soko.

⁹Au e alofa ki a koutou, e pela eiloa mo te alofa o te Tamana ki a au; ke tumau la koutou i toku alofa.

¹⁰Kafai e tausi ne koutou aku poloakiga, ka tumau koutou i toku alofa, e pela mo au ko oti ne tausi a poloakiga a toku Tamana, kae tumau i tena alofa.

¹¹“E faipati atu ne au a mea nei ki a koutou, ko te mea ke tumau toku fiafia i loto i a koutou, kae ke katoatoa foki te otou fiafia.

¹²Tenei taku poloakiga; ke fakatau a'lofa koutou, e pela eiloa mo au e alofa atu ki a koutou.

¹³A te alofa tafasili e 'tau o fakaasi ne te tino, ko te tuku atu o tona ola e sui ei a ola o ona taugasoa.

¹⁴Ko oku taugasoa koutou, manafai e fai ne koutou aku poloakiga.

¹⁵Ko se toe taku ne au koutou ko tavini, i te mea a te tavini e se iloa ne ia a mea a tona pule e fai. Ka ko taku ne au koutou ko taugasoa, me ko oti ne taku atu ne au a mea katoa ne lagona ne au mai toku Tamana.

¹⁶Ne seki filifili ne koutou au, kae ne filifili koutou ne au; ne tofi atu foki koutou ne au ke olo, ko te mea ke fua mai ne fuaga, kae ke tumau otou fuaga. So se mea e fakatagi koutou ki toku Tamana i toku igoa, ka tuku atu ne ia ki a koutou.

¹⁷Tenei la taku poloakiga ki a koutou: ke fakatau a'lofa koutou.”

¹⁸“Kafai e takalialia a tino o te lalolagi ki a koutou, e 'tau o manatua ne koutou me ne takalia'lia muamua ki a au.

¹⁹Kafai koutou ne tino o te lalolagi, e a'lofa foki a tino o te lalolagi ki a koutou. Ka ko filifili koutou ne au mai tino o te lalolagi tenei, ka ko se kau koutou i ei; tenei te mea e takalia'lia ei a tino o te lalolagi ki a koutou.

²⁰Manatua taku pati ne fai atu ki a koutou penei, ‘E seai se tavini e sili atu i tona pule.’ Kafai ne fakasaua mai latou ki a au, ka fakasaua foki ki a koutou; kafai ne faka'logo latou ki taku muna, ka faka'logo foki latou ki otou muna.

²¹Ka fai ne latou a mea katoa konei ki a koutou, me i a koutou e a aku; me se iloa ne latou a ia tela ne uga mai ne ia au.

²²Moi fai ne seki vau au o faipati ki a latou; penei e se agasala latou; kae nei la, ko seai se lotou fakamasakoga e uiga ki olotou agasala.

²³So se tino e takalialia ki a au, e takalialia foki ki toku Tamana.

²⁴Moi ne se fai ne au ia latou a galuega kola ne seki fai eiloa ne se tino, penei e se agasala latou; kae nei la, ko oti ne lavea ne latou aku mea ne fai, ka ko takalia'lia ki a au mo toku Tamana.

²⁵Ko te mea ke fakataunu ei a muna kola e tusi i te lotou Tulafono, ‘Ne takalia'lia mai latou ki a au mo te seai eiloa o se pogai.’

²⁶“Ka oko mai te Fesoasoani, ko te Agaga o te munatonu tela e vau mai te Tamana. Ka uga mai ne au a ia mai te Tamana, kae ka molimau a ia e uiga ki a au.

²⁷A koutou foki, ka molimau e uiga ki a au, i te mea ko oti ne 'nofo fakatasi tatou mai te kamataga.