Read Te Tusi Tapu I Te Gana Tuvalu Lomiga Lua IOANE 16 Bible Online

IOANE 16 - Te Tusi Tapu I Te Gana Tuvalu Lomiga Lua bible

IOANE 16

¹“Ne faipati atu ne au a te mea nei ki a koutou, ko te mea ke se pa'ku koutou.

²Ka tuli koutou ne latou ki tua mai i olotou fale tapuaki, kae e oko mai foki te aso ka tamate ei koutou ne se tino. E taofi te tino tena pela me i te faiga ne ia a te mea nei, ko te taulaga tena ki te Atua.

³Ka fai ne latou a mea konei ki a koutou, i te mea e seki iloa ne latou te Tamana pela foki mo au.

⁴Ka ko oti ne fai atu ne au ki a koutou a te mea nei, ko te mea kafai e oko mai te taimi e fai ei ne latou a mea konei, ka manatua ei ne koutou me ko oti au ne muna atu ki a koutou.” “Ne seki fai atu ne au ki a koutou a mea konei i te kamataga, ia tatou koi 'nofo tasi.

⁵Kae nei, au ka fano ki a ia tela ne uga mai ne ia au; kae e seai se tino o koutou e fesili mai ki a au penei, ‘E fano koe ki fea?’

⁶Nei la, ko oti ne fakaasi atu ne au ki a koutou; tela la, ko 'fonu ei otou loto i te fanoanoa.

⁷Kae fai atu ne au a te tonuga ki a koutou: e 'tau o fano au keatea mō te 'lei o koutou, i te mea kafai e se fano au, ka se vau ki a koutou te Fesoasoani. Kae kafai e fano au keatea, ko uga mai ei a ia ne au ki a koutou.

⁸Kafai e oko mai a ia, ka fakamaonia ne ia ki tino o te lalolagi i a latou e 'se i te agasala, ka fakamaonia foki ne ia te amiotonu mo te fakamasinoga a te Atua.

⁹Ko agasala latou, i te mea e se fakatuanaki mai ki a au;

¹⁰ona ko au ka fano, ka se toe lavea ne koutou au, kae ka fakaasi atu ne te Agaga ki a koutou a te amiotonu.

¹¹E fakaasi foki ne te Agaga a te fakamasinoga a te Atua, i te mea ko oti ne fakamasino a te pule masei o te lalolagi.

¹²“E uke a mea koi fia faipati ne au ki a koutou, kae se mafai nei ne koutou o tauloto i otou mafaufau.

¹³Kae kafai e oko mai te Agaga o te munatonu, ka takitaki ne ia koutou ki munatonu katoa. Ka se faipati a ia i tena pule eiloa, kae ka fai atu ne ia a mea e lagona ne ia, kae ka fakaasi atu foki a mea ka oko mai.

¹⁴Ka 'viki a ia ki a au, i te mea ka puke ne ia aku muna, kae folafola atu foki ki a koutou.

¹⁵A mea katoa a toku Tamana e a aku; tena te pogai ne muna atu ei au i te Agaga ka puke ne ia a mea kola e tuku ne au ki ei, kae taku atu ki a koutou.”

¹⁶“Ko pili nei o se toe lavea ne koutou au; kae se leva foki ka toe lavea ne koutou au.”

¹⁷Muna a ona soko ki isi tino: “Se a te uiga o te mea nei? E muna mai a ia ki a tatou, ‘Ko pili nei o se toe lavea ne koutou au, kae se leva foki, ka toe lavea ne koutou au, ’kae muna mai foki, ‘I te mea i a au ka fano ki te Tamana.”’

¹⁸Olotou muna, “Se a te uiga o te pati tenei, ‘Ko pili nei’? E se iloa ne tatou te mea e faipati a ia ki ei!”

¹⁹Ne iloa ne Iesu me ne ma'nako latou o fesili mai ki a ia, tela muna atu ei a ia ki a latou: “Tena te mea e fakatau fesilisili ei koutou i a koutou eiloa, ona ko aku muna konei ne fai atu, ‘Ko pili nei o se toe lavea ne koutou au, kae se leva foki, ka toe lavea ne koutou au’?

²⁰Au e muna tonu atu ki a koutou: ka 'tagi koutou kae 'tagi mautuutu, kae ka fiafia te lalolagi; kae fanoanoa koutou, ka ko te otou fanoanoa ka fuli ki te fiafia.

²¹Kafai ko pili se fafine o fanau, a ia e fanoanoa, i te mea ko oko mai tona taimi fi'ta; kae kafai ko oti ne fanau te tamaliki, ko puli i a ia te 'mae, i te mea ko fiafia i te tamaliki ko oti ne fanau ki te lalolagi.

²²E pena foki eiloa mo koutou: i te taimi nei a koutou e fanoa'noa, kae ka toe lavea ne au koutou, ko otou loto ka 'fonu i te fiafia, ko te vaega fiafia tela ka seai se tino e mafai ne ia o ave keatea mai i a koutou.

²³“Kafai e oko mai te aso tena, e se fia fakatagi mai koutou ki a au ki se mea. Au e muna tonu atu ki a koutou: ka avatu ne te Tamana ki a koutou so se mea e fakatagi atu ei koutou i toku igoa.[28]

²⁴E oko mai ki te taimi nei, e seki ai eiloa se mea kai fakatagi atu ei koutou ki a ia i toku igoa. Fakatagi atu, kae ka maua ne koutou; ko te mea ke fakakatoatoa te otou fiafia.”

²⁵“Ko oti ne fai atu ne au a mea konei ki a koutou i tala fakatusa. Kae ka oko mai aso ka se toe fakaaoga ne au a tala fakatusa, kae ka faipati tonu atu eiloa au ki muna e uiga ki te Tamana.

²⁶Ka oko mai te aso tela ka fakatagi atu koutou ki a ia i toku igoa; kae se fai atu au me ka fakatagi au ki a ia mō koutou,

²⁷me i te Tamana e alofa eiloa ki a koutou. E alofa a ia ki a koutou, me i a koutou e a'lofa mai ki a au, kae ne talitonu koutou i a au ne vau mai te Atua.

²⁸Au ne vau eiloa mai te Tamana, kae ne vau au ki te lalolagi; kae i te taimi nei, ka tuku ne au te lalolagi o fano ki te Tamana.”

²⁹Muna a ona soko, “Kiloke, a koe nei ko faipati tonu mai eiloa, ka ko se fakaaoga tala fakatusa.

³⁰Ko iloa nei ne matou me iloa ne koe a mea katoa; kae se aoga foki se tino o fai fesili atu ki a koe. Ko talitonu matou i te mea nei, i a koe ne vau mai te Atua.”

³¹Ne tali atu penei a Iesu ki a latou, “E a, ko talitonu nei koutou?

³²Ko oko nei ki te taimi, ka ko oko foki eiloa ki ei; tela la, ka mafuta valevale ei koutou; ka taki fano eiloa te tino ki tona kaiga, kae ka tiakina au tokotasi. Ka ko au ka se nofo tokotasi fua, me i a maua e 'nofo mo te Tamana.

³³E fakaasi atu ne au te mea nei ki a koutou, ko te mea ke maua ne koutou te filemu i otou loto i te fakatuanaki mai ki a au. Ka fetaui koutou mo fakalavelave i te lalolagi. Ke loto ma'losi koutou! Ko oti ne fakatakavale ne au te lalolagi!”