Read Te Tusi Tapu I Te Gana Tuvalu Lomiga Lua IOANE 17 Bible Online

IOANE 17 - Te Tusi Tapu I Te Gana Tuvalu Lomiga Lua bible

IOANE 17

¹I te otiga ne faipati ne Iesu a mea konei, saga ake ei ona mata ki te lagi, kae fai ake pela, “Te Tamana, ko oko mai te aso, tuku mai te vikiga ki tau Tama, ko te mea ke tuku atu foki ne tau Tama a te vikiga ki a koe.

²Me ne tuku mai ne koe te pule ki a ia i luga o tino katoa, ko te mea ke avatu ne ia te ola se gata mai ki a latou kola ne tuku mai ne koe ki a ia.

³Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.

⁴Ne fakaasi atu ne au tou 'malu i te lalolagi. Ne fakapalele foki ne au te galuega ne tuku mai ne koe ki a au ke fai.

⁵Te Tamana! Tuku mai nei ki a au a te 'malu i ou mua, ko te 'malu eiloa tela ne ia taua, kae seki faite te lalolagi.

⁶“Ko oti ne fakaasi atu ne au a tou igoa ki a latou kola ne tuku mai ne koe ki a au mai i te lalolagi. Ko ou tino latou, kae ne tuku mai foki ne koe ki a au. Ne tausi foki ne latou tau muna.

⁷Kae nei, ko iloa ne latou a mea katoa ne tuku mai ne koe ki a au, me mai i a koe eiloa.

⁸Ne tuku atu foki ne au te muna tela ne tuku mai ne koe ki a au, kae ne talia ne latou; ko iloa foki ne latou me tonu eiloa ia au ne vau mai i a koe, ko tali'tonu foki latou i a au ne uga mai ne koe.

⁹“Au e 'talo mo latou. Au e se 'talo mō te lalolagi, kae mo latou kola ne tuku mai ne koe ki a au, me ko ou tino eiloa latou.

¹⁰E a koe aku mea katoa, kae e a aku foki au mea katoa. Ko fakaasi atu foki toku 'malu ia latou.

¹¹Au nei ko vau ki a koe; Au ko se toe nofo i te lalolagi, kae ko latou e nofo i te lalolagi. Te Tamana Tapu, ke tausi ne koe latou i te malosi otou igoa, ko te igoa tela ne aumai ne koe ki a au,[29] ko te mea ke tasi latou e pela mo taua e tasi.

¹² I te motou fakatasiga, ne tausi ne au latou i te 'mana o tou igoa, ko te igoa tela ne aumai ne koe ki a au.[30] Ne puipui latou ne au, kae seai se tino o latou ne galo, kae na ko te tama o te malaia, ko te mea ke fakaoko ei te tonuga o muna a te Tusi.

¹³Kae nei, au ka fanatu ki a koe, kae ka taku atu foki ne au a mea konei ki te lalolagi, ko te mea ke fonu katoatoa olotou loto i toku fiafia.

¹⁴Ne taku atu ne au tau muna, kae ne takalialia ki ei te lalolagi, me se ne muna o te lalolagi, i a au e se se tino o te lalolagi.

¹⁵Au e se 'talo atu ke ave ne koe latou keatea mai te lalolagi, ka ko au e 'talo atu ke tausi latou ne koe mai te Tino Masei.

¹⁶E se ne tino o te lalolagi latou, e penei foki mo au e se se tino o te lalolagi.

¹⁷Ke fakatapu ne koe latou ki te munatonu; i tau muna se munatonu.

¹⁸E pela mo te ugamaiga ne koe au ki te lalolagi, ka pena foki o uga atu ne au latou ki te lalolagi.

¹⁹Ko fakataputapu toku foitino mo latou, ko te mea ke fakataputapu foki latou i te munatonu.

²⁰“E se fakapito fua taku 'talo mo latou konei, kae mo latou foki kola e fakatuanaki ki a au ona ko te talaiga a latou.

²¹Ko te mea ke tasi latou katoa, e pela mo koe te Tamana e i loto i a au, mo au foki e i loto i a koe, ke tasi foki latou i loto ia taua; ko te mea ke talitonu te lalolagi me ne uga mai ne koe au.

²²Ko te 'malu foki ko aumai ne koe ki a au, ko oti ne tuku atu ne au ki a latou, ko te mea ke tasi latou, e pela mo taua e tasi:

²³au e i loto i a latou, a koe foki e i loto i a au, ke tasi katoatoa latou; ke iloa foki ne te lalolagi, me ne uga mai ne koe au, kae alofa foki koe ki a latou, e pela mo tou alofa ki a au.

²⁴“Te Tamana, ko toku manako ki a latou kola ne aumai ne koe ki a au, ke iai latou mo au i te koga e nofo ei au, ko te mea ke matea ne latou toku 'malu, ko te 'malu tela ne tuku mai ne koe ki a au i tou alofa, kae seki faite te lalolagi.

²⁵Te Tamana amiotonu, e seki iloa koe ne te lalolagi, ka ko iloa ne au a koe. Ko iloa foki ne latou konei i a au ne uga mai ne koe.

²⁶Ne fakailoa atu foki ne au tou igoa ki a latou, kae ka fakailoa atu faeloa ne au; ko te mea ke i loto ia latou a te alofa ne alofa mai ei koe ki a au, ko au foki ke i loto i a latou.”