Read Te Tusi Tapu I Te Gana Tuvalu Lomiga Lua IOANE 18 Bible Online

IOANE 18 - Te Tusi Tapu I Te Gana Tuvalu Lomiga Lua bible

IOANE 18

¹I te otiga ne fai te 'talo a Iesu, ne olo atu a ia mo ona soko ki te sua feitu o te tamā vaitafe ko Ketalono, tela e isi te togalakau i ei, ulu atu ei ki ei a ia mo ona soko ki loto.

²E iloa foki te koga tena ne Iuta te fakalata; i te mea e masani saale o maopoopo i kona a Iesu mo ona soko.

³Tela, fanatu ei a Iuta ki te togalakau, kae ne olo atu mo sotia mo nisi ofisa ne tuku mai ne faitaulaga sili mo Falesaio; ne olo atu eiloa latou ki kona mo lama, moli mo meatau.

⁴Ne iloa foki ne Iesu a mea katoa ka 'tupu ki a ia, tela, fanatu ei a ia ki mua, kae fai atu ki a latou, “Ko oi tena e 'sala ne koutou?”

⁵Ne tali mai latou, “Ko Iesu te Nasaleta.” Ne fai atu a Iesu ki a latou, “Ko au tenei.” Ka ko Iuta te fakalata, e 'tu fakatasi mai mo latou.

⁶I te faiatuga a Iesu ki a latou, “Ko au tenei,” ne mo mea atu latou ki tua kae 'siga ki lalo i te laukele.

⁷Ne toe fesili atu a Iesu ki a latou, “Ko oi tena e 'sala ne koutou?” Kae ne fai mai latou, “Ko Iesu te Nasaleta.”

⁸Muna a Iesu, “Ko oti au ne fai atu ki a koutou me ko au tenei; tela la, kafai e 'sala mai koutou ki a au, tuku atu tino konei ke olo.”

⁹Ne fai atu a ia pena, ko te mea ke fakataunu ei te muna tela ko oti ne faipati atu ne ia, “Te Tamana, e seai eiloa se tino e tokotasi ne malaia, i a latou katoa konei ne tuku mai ne koe ki a au.”

¹⁰A Simona Petelu foki, e isi sena pelu; ne tata ake kae 'kati ne ia te taliga fakaatamai o te tavini a te Faitaulaga Pule, motu ei keatea. A te igoa o te tavini tena ko Maliko.

¹¹Ne fai atu a Iesu ki a Petelu, “Tuku tau pelu ki tena tukuga! E manatu koe i a au ka se inu ki te ipu o te puapuaga, tela ko oti ne tuku mai ne toku Tamana ki a au?”

¹²A sotia mo te lotou takitaki, pela foki mo leoleo Iutaia, ne puke fakapagota ne latou a Iesu kae saisai.

¹³Ne avatu muamua ne latou a ia ki a Anasa me ko ia ko te tamana o te avaga a Kaiafa, tela ko te Faitaulaga Pule i te tausaga tena.

¹⁴Ko Kaiafa foki tela ne fakatonu atu ki tino Iutaia, me sili ke mate se tino e tokotasi e sui ei tino katoa.

¹⁵Ne tautali atu Simona Petelu ia Iesu, e pela foki mo te sua soko. Ne iloa 'lei eiloa ne te Faitaulaga Pule a te sua soko tena, ko te soko la tena ne olo fakatasi ei a ia mo Iesu ki loto i te fale o te Faitaulaga Pule;

¹⁶ka ko Petelu ne tu i tua i te mataloa. A te isi soko tela e iloa 'lei ne te Faitaulaga Pule, ne toe foki atu ki tua, kae faipati atu ki te tamafine leoleo mataloa; aumai ei ne ia Petelu ki loto i te fale.

¹⁷Ne faipati mai te tamafine leoleo mataloa ki a Petelu, “E se ko koe foki te sua soko o te tagata tena?” Ne fai atu a ia, “Ikai, e se ko au.”

¹⁸I te taimi tena, ne fa'ka ne tavini mo leoleo a te afi, i te mea ko 'moko te po, kae ne 'tu fakapukupuku i te afi o fakavelavela latou; ne i kona foki Petelu fakatasi mo latou, e 'tu foki o fakavelavela tona foitino.

¹⁹Ne fesili mai te Faitaulaga Pule ki a Iesu, e uiga ki ona soko mo tena akoakoga.

²⁰Ne tali atu a Iesu ki a ia, “Ko oti au ne faipati atu fakaasiasi ki tino katoa; ko oti foki ne akoako sale atu au i fale tapuaki mo te Fale Tapu, i te koga tela e fakapotopoto sale i ei a tino Iutaia katoa; e seki faipati lele eiloa au fakafuna ki se mea e tasi.

²¹Kae se a te mea e fesili mai ei koe ki a au? Fesili ki tino kola ne fakalogologo ki aku muna, me ne a aku muna ne fai atu ki a latou; e iloa ne latou a mea kola ne faipati atu ei au.”

²²I te faiatuga ne Iesu a muna kona, laupapa ei a ia ne te ofisa e tokotasi ne tu pili mai, kae fai mai ki a ia, “E pefea eiloa o tali atu koe pena ki te Faitaulaga Pule?”

²³Ne tali atu a Iesu ki a ia, “Kafai ko 'se taku faipatiga, fakamaoni ake la ne koe te 'se tena. Kae kafai e tonu taku faipatiga, ai a la ne laupapa ei au ne koe?”

²⁴Tela, uga atu ei a ia ne Anasa ki a Kaiafa te Faitaulaga Pule, ka ko ona lima koi 'mau eiloa saisaiga i ei.

²⁵A Petelu koi tu eiloa i kona o fakavelavela a tena foitino, fai atu ei nisi tino ki a ia, “E se ko koe foki tena te sua soko o te tagata tena?” Kae ne fakafiti Petelu penei, “Ikai, e se ko au.”

²⁶A te tavini e tokotasi a te Faitaulaga Pule, se kāiga o te tagata tela ne 'kati ne Petelu tona taliga, ne faipati mai a ia, “E se ko koe tela ne matea ne au ne fakatasi mo Iesu i te togalakau?”

²⁷Ne toe fakafiti atu Petelu; kae i te taimi eiloa tena ne tagi ei te moa.

²⁸Ne ave ne latou a Iesu mai te fale o Kaiafa ki te fale o te kovana, i te taeao pogipogi eiloa. A tino Iutaia ne seki ulu latou ki loto i te fale o te kovana, i te mea ne ma'nako latou o tausi ke 'ma latou e tusa mo te lotou tu, ko te mea ke mafai latou o 'kai i te 'Kaiga o te Paseka.

²⁹Tela, fanatu ei ki tua Pilato o fakafetaui ki a latou kae fai atu, “Se a te mea ko 'moli mai ei ne koutou a te tagata tenei ke fakasala”

³⁰Ne tali mai latou, “Moi seki fai ne ia se agasala, penei e se aumai ne matou a ia ki a koe.”

³¹Ne fai atu a Pilato ki a latou, “Ave a ia ne koutou, kae fakamasino eiloa ne koutou e tusa mo te otou tulafono.” Ne tali mai a tino Iutaia, “E tapu i a matou o tamate se tino.”

³²Ne tupu te mea tenei ke fakataunu ei te muna tela ne faipati ki ei a Iesu, e fakailoa atu ei te mate ka mate ei a ia.

³³Ne toe foki atu Pilato ki loto i te fale, kae kalaga mai ki a Iesu penei: “A koe ko te tupu o tino Iutaia?”

³⁴Ne tali atu a Iesu ki a ia, “A te fesili tenei e vau eiloa mai ia koe, io me ne taku atu ne nisi tino ki a koe e uiga ki a au?”

³⁵Ne tali mai Pilato, “Au nei se tino Iutaia i tou manatu? Ko tino eiloa o tou fenua mo faitaulaga sili ne tuku mai ne latou a koe ki a au. Se a tau mea ne fai?”

³⁶Muna a Iesu, “E se mai te lalolagi nei a toku malo; moi fai pela ne maua mai te lalolagi nei, penei ko taua atu aku tavini ia au mana tuku atu ki tino Iutaia; tela la, a toku malo e se mai te lalolagi nei.”

³⁷Ne fai atu ei Pilato ki a ia, “Ka ko koe la se tupu?” Ne tali atu a Iesu ki a ia, “E pena eiloa mo au muna i a au se tupu. Tena te mea ne fanau mai ei au, kae ne vau foki ei au ki te lalolagi nei, ke molimau au ki te munatonu. So se tino e i a ia te munatonu, e fakalogo mai a ia ki a au.”

³⁸Ne fai mai Pilato ki a ia, “Se a te munatonu?” I te otiatuga o muna a Pilato, fanatu ei a ia ki tua ki tino Iutaia, kae muna atu ki a latou, “E se maua ne au se pogai e ala ei o fakasala a ia nei.

³⁹Kae pela mo te tu a koutou, e 'tau mo au o tala atu ki a koutou se pagota ke saoloto i te taimi o te Paseka. E ma'nako la koutou ke 'tala atu nei ki a koutou a te tupu o tino Iutaia, ke saoloto?”

⁴⁰Ne ka'laga mai latou, “Ikai, e se ko ia! A matou e ma'nako ki a Palapa!” A Palapa se tino amio masei.