Read Te Tusi Tapu I Te Gana Tuvalu Lomiga Lua IOANE 19 Bible Online

IOANE 19 - Te Tusi Tapu I Te Gana Tuvalu Lomiga Lua bible

IOANE 19

¹Ne 'kave ne Pilato a Iesu o 'kini.

²Ka ko sotia ne 'fili ne latou te foualiki ki kaula o lakau makai'kai kae tuku atu ki tona ulu, ne fakapei foki ne latou a ia ki te gatu fakatupu e lanu violeta.

³Ne o'mai latou ki a ia kae fai mai, “Ke manuia te Tupu o Tino Iutaia!” Ne laupapa foki ne latou a ia.

⁴Ne toe fanatu foki ki tua Pilato kae fai atu ki a latou, “Kiloke, ko aumai ne au a ia ki tua ki a koutou, ko te mea ke iloa ne koutou me seai eiloa se mea ne maua ne au e ala ei o fakasala a ia.”

⁵Tela, fanatu ei a Iesu ki tua, e fou ki te foualiki makaikai, kae pei ki te gatu fakatupu e lanu violeta. Ne muna atu a Pilato ki a latou, “Kilo mai! Tenei te tagata!”

⁶I te laveaga ne faitaulaga sili mo leoleo, ne paka'laga mai latou, “Fakasataulo a ia! Fakasataulo a ia!” Muna a Pilato ki a latou, “Ave la ne koutou a ia o fakasataulo; kae seai se mea ne maua ne au, e ala ei o fakasala a ia.”

⁷Ne toe tali mai a tino Iutaia, “E isi te motou tulafono tela e fai mai, me e 'tau eiloa a ia o mate, me ne fai mai i a ia ko te Tama a te Atua.”

⁸I te lagonaga ne Pilato a muna kona, ko na mataku ake eiloa a ia;

⁹ne toe ulu atu a ia ki loto i te fale kae fai mai ki a Iesu, “A koe se tino a?” Ka ko Iesu ne seki tali atu ki a ia.

¹⁰Tela, faipati mai ei Pilato ki a ia, “A koe e se faipati mai? E se iloa ne koe me e i a aku te pule o fakasaoloto koe, mo te pule foki o fakasataulo koe?”

¹¹Ne tali atu a Iesu ki a ia, “E iai fua tau pule ki a au, i te mea i tau pule ne aumai mai luga; tela la, a te tino ne 'moli mai au ne ia ki a koe, e tafasili atu te masei o tena agasala.”

¹²I te lagonaga ne Pilato a te muna tenei, ne salasala ne ia se ala e fakasaoloto ei a Iesu; ka ko tino Iutaia ko ka'laga mai eiloa, “Kafai e fakasaoloto ne koe te tagata tena, e se se taugasoa koe o Kaisala; so se tino e fia fai a ia mo tupu, se fili a ia o Kaisala.”

¹³I te lagonaga ne Pilato a muna konei, ne avatu ne ia a Iesu ki tua kae fakanofo ki lalo i te nofoga fakamasino, i te koga e fakaigoa ko te “Pae Fatu.” Kae i te 'gana Epelu ko “Kapata.”

¹⁴Ko tai oko ki te tutonu o te Aso Fakatoka mō te Paseka, ne fai atu Pilato ki tino Iutaia, “Tenei te otou tupu.”

¹⁵Ne paka'laga mai latou, “Ave a ia keatea! Fakasataulo a ia!” Ne muna atu Pilato ki a latou, “Ka fakasataulo ne au te otou Tupu?” Ne tali mai faitaulaga sili, “E seai se motou tupu, ko Kaisala fua!”

¹⁶Tela, tuku atu ei a ia ne Pilato ki a latou ke fakasataulo. Tela la, puke ei ne latou a Iesu.

¹⁷Ne kave ne latou a Iesu ki tua ke amo tena sataulo, ki te koga tela e fakaigoa ki te “Te Koga o Gatiulupoko,” e fakaigoa i te 'gana Epelu ko “Kolokota.”

¹⁸Ne fakasataulo ei ne latou a ia i kona, fakatasi foki mo te sua tokolua, e takitokotasi i feitu, ka ko Iesu e i te kogaloto o laua.

¹⁹Ne tusi foki ne Pilato se muna penei: “Ko Iesu te Nasaleta, ko te Tupu o tino Iutaia,” kae ne tuki fakamau ki luga i te sataulo.

²⁰E tokouke a tino Iutaia ne faitau i te faka'pulaga tena, i te mea e pili fua ki te fa'kai a te koga tela ne fakasataulo ei a Iesu. A te faka'pulaga foki tena ne tusi ki te 'gana Epelu, te 'gana Loma, mo te 'gana Eleni.

²¹Ne fai mai faitaulaga sili o Iutaia ki a Pilato, “Sa tusi pena, ‘Ko te Tupu o Tino Iutaia,’ kae ke tusi penei, ‘Ne fai mai a te tagata tenei, Ko Au ko te Tupu o Tino Iutaia.”’

²²Ne tali atu Pilato, “Ko te mea ko oti ne tusi ne au, e tusi eiloa.”

²³I te otiga ne fakasataulo ne sotia a Iesu, ne ave ne latou ona gatu kae vaevae ki vaega e fa, e tofu te sotia e tokotasi mo tena vaega. Ne ave foki ne latou tena gatu loa, tela e seai se sokoga kae 'laga katoa mai luga ke oko ki lalo.

²⁴Ne faipati sotia i a latou eiloa, “Mo a mana saesae ne tatou te gatu, kae ke fai ne tatou se vili me ko oi ka maua ne ia.” Ne fai a te mea nei ke fakataunu ei a muna a te Tusi, “Ko tufa ne latou oku gatu i a latou eiloa, Ko fai foki ne latou a te vili ki toku gatu lasi!” Tena te mea ne fai ei pena ne sotia.

²⁵Ne tu pili atu ki te sataulo o Iesu a tona matua mo te taina o tona matua, e pela foki Malia te avaga a Kalopa, mo Malia te Makatala.

²⁶I te laveaga ne Iesu a tona matua, mo te soko tela e alofa a ia ki ei e 'tu pili atu, faipati atu ei a ia ki tona matua penei, “Te fafine, kiloke, tenei tau tama.”

²⁷Ne faipati atu foki a ia ki te soko tena, “Kiloke, tena tou matua.” Mai te taimi eiloa tena, ne ave ei ne te soko tena a ia ke 'nofo laua i tona fale.

²⁸Mai tua ifo i kona, ko iloa ne Iesu me ko oti a mea katoa, faipati atu ei a ia ko te mea ke fakamaoni te Tusi, “Au ko fia inu.”

²⁹Ne iai i kona a te tanoa e fonu i te vinika; ne faka'siu ei ne latou a te omomi ki te vinika, fakalave ei ki te kaula o te isopo, kae tuku atu ki tona gutu.

³⁰I te otiga ne talia ne Iesu te vinika, ana muna, “Ko oti!” I kona foki eiloa, fakagaugau ifo ei tona ulu kae mate.

³¹Ne fakatagi atu a tino Iutaia ki a Pilato ke fakataga ake latou o fatifati a vae o tino kola ne fakasataulo, kae ke ave foki keatea a foitino mai olotou sataulo, ke se tumau i ei ke oko ki te Sapati, me i te Sapati, se aso 'malu; kae ne fai ne latou a te mea tenei i te Aso Fakatoka.

³²Tela, olo atu ei sotia o fatifati a vae o te tagata muamua, pela foki mo te sua tino. Ko laua kona ne fakasataulo fakatasi mo Iesu.

³³Ka ko te lotou okoatuga ki a Iesu, ne iloa ake ne latou me ko mate a ia, tela ne seki fatifati ei ne latou ona vae.

³⁴Kae se gata i kona, e tokotasi te sotia ne velo ne ia tena tao ki te kaokao o Iesu, ne tafe mai ei te toto mo te vai.

³⁵A ia tela ne lavea tonu ne ia te mea ne tupu ne fakamatala ne ia, ko te mea ko koutou foki ke talitonu;[31] kae e iloa foki ne ia me tonu eiloa tena pati, ko te mea ke tali'tonu koutou.

³⁶Ne fai a mea kona ke fakataunu ei muna a te Tusi, “Ka seai eiloa sona ivi e fati.”

³⁷E fai mai foki te sua Tusi, “Ka kilo'kilo atu latou ki a ia tela ne 'velo ne latou.”

³⁸Fakamuli ifo, a Iosefa te Alimataia ne fanoi atu ki a Pilato, me mafai o ave ne ia te foitino o Iesu. A Iosefa se soko o Iesu, kae fai 'funa ana mea ona ko te mataku i tino Iutaia. Ne fakasaoloto atu ne Pilato a ia ke fai a te mea tena, tela, fanatu ei a ia o ave keatea te foitino o Iesu.

³⁹A Nikotemo foki, ko te tino tela ne fano ki a Iesu i te sua po, ne vau kae aumai foki ne ia te mulo ko oti ne palu tasi mo te aloe, e tusa mo te selau pauna te 'mafa.

⁴⁰Ne ave ne laua te foitino o Iesu, kae pelu ki te sulukafu lino fakatasi mo mea manogi, e pela mo te tu faka Iutaia i te teuteuga o te foitino o te mate mō te tanuga.

⁴¹E isi se togalakau i te koga tena ne fakasataulo ei a Iesu; i te togalakau foki tena, e isi se tanuga fou e seki tanu eiloa i ei se tino.

⁴²Ona ko te aso tena ko te Aso Fakatoka o tino Iutaia ki te Sapati, tuku ei ne laua a te foitino o Iesu i te tanuga tena, me pili mai fua.