Read Te Tusi Tapu I Te Gana Tuvalu Lomiga Lua IOANE 20 Bible Online

IOANE 20 - Te Tusi Tapu I Te Gana Tuvalu Lomiga Lua bible

IOANE 20

¹I te taeao pogipogi o te Aso Tapu, ka koi tai pouli foki eiloa, ne alausu atu ei a Malia te Makatala ki te tanuga, kae ne lavea ne ia te fatu ko oti ne ave keatea mai te gutu o te tanuga.

²Tela, tele ei a ia ki a Simona Petelu mo te isi soko tela e alofa ki ei a Iesu, kae fai atu ki a laua, “Ko oti ne ave ne latou keatea te Aliki mai te tanuga, kae se iloa nei ne tatou me tefea te koga ne tuku ne latou a ia ki ei!”

³Tela, ulu ei ki tua Petelu mo te soko tena, kae olo atu ki te tanuga.

⁴Ne fakatau 'tele laua, ka ko te sua soko tela ne olo laua e tai makini atu ia Petelu, tela ne oko muamua ei a ia ki te tanuga.

⁵Ne fatio atu a ia o kilokilo atu ki loto, lavea atu ei ne ia me ko sulukafu lino fua e tuku mai, kae ne seki ulu atu a ia ki loto.

⁶Fakamuli ifo, ko oko atu a Petelu, tela ne tautali atu, kae ne ulu atu a ia ki te tanuga, lavea ei ne ia a sulukafu lino e tuku mai,

⁷e pela foki mo te solosolo ne 'sai i te ulu o Iesu, e se tuku fakatasi mai mo sulukafu lino, kae tuku eiloa fakaatea; ko oti foki ne pelupelu faka'lei.

⁸Ne ulu atu foki ki loto a te soko tela ne oko muamua ki te tanuga, ne lavea atu ne ia, talitonu foki eiloa ki ei.

⁹I te mea e seki maina eiloa ia latou te Tusi, tela e fai mai me e 'tau a ia o toetu mai tino 'mate.

¹⁰I kona foki eiloa, toe foki atu ei a soko kona ki o la kaiga.

¹¹A Malia ne tu kae tagi faeloa i tafa o te tanuga; ka koi tagi eiloa a ia pena, ne punou ifo foki a ia o fatio atu ki loto i te tanuga;

¹²ne lavea atu ne ia agelu e tokolua e pei ki gatu 'kena, e saga'saga mai i te koga ne tuku i ei te foitino o Iesu, e tokotasi i fogaulu kae tokotasi i mulivae.

¹³Ne fai mai laua ki a ia, “Te fafine, se a te mea e tagi ei koe?” Ne tali atu a ia ki a laua, “I te mea ko oti ne ave keatea ne latou a toku Aliki, kae se iloa foki ne au a te koga ko oti ne tuku ne latou ki ei.”

¹⁴I te otiga ne fai atu ana muna kona, mafuli ake ei a ia kae lavea atu ne ia a Iesu e tu mai; kae se iloa 'lei ne ia me ko Iesu tena.

¹⁵Muna a Iesu ki a ia, “Te fafine, ai a e tagi ei koe? Ko oi tena e 'sala ne koe?” Ne leake eiloa Malia me ko te tino e o ia te togālakau, tela faipati atu ei a ia ki a ia, “Te Aliki, kafai ne ave ne koe a ia keatea, taku mai la me tefea te koga ne tuku ne koe a ia ki ei, ke ave ne au a ia keatea.”

¹⁶Ne fai atu a Iesu ki a ia, “Malia!” Ne mafuli mai Malia kae faipati mai ki a ia i te 'gana Epelu “Laponi!” ko tona uiga, “Te Faiakoga.”

¹⁷Ne muna atu a Iesu ki a ia, “Sa taofigina au, me i a au nei e seki fanake ki toku Tamana; kae fano ki oku taina kae fai atu penei ki a latou, ‘Au e fanake ki a ia tela ko toku Tamana, ko te otou Tamana foki, ko toku Atua, ko te otou Atua foki.”’

¹⁸Tela, fano ei Malia te Makatala, kae taku atu ki soko me ko oti ne lavea ne ia te Aliki; ne fai atu foki a ia ki a latou me ko te Aliki eiloa ne faipati mai ne ia a mea konei ki a ia.

¹⁹I te afiafi po o te Aso Tapu, ne fakapotopoto fakatasi a soko i te fale e 'pono katoa ona mataloa, ona ko te ma'taku o latou i tino Iutaia. Ne fanatu a Iesu kae tu i loto i a latou, faipati atu ei a ia ki a latou, “Ke i a koutou te filemu.”

²⁰I te otiga ne faipati atu ne ia a muna kona, ne fakaasi atu ei ne ia ona lima mo tona kaokao. Ne fiafia soko i te laveaga ne latou te Aliki.

²¹Ne toe fai atu a Iesu ki a latou, “Ke i a koutou te filemu. E pela mo te Tamana ko oti ne uga mai ne ia a au, e pena foki mo au e uga atu ne au koutou.”

²²Ne oti atu ana muna kona, manava atu ei ne ia ki a latou tona Agaga Tapu, kae fai atu penei: “Ke talia ne koutou te Agaga Tapu!

²³ Kafai e fakamagalo ne koutou agasala a tino, e magalo eiloa; kafai foki e se fakamagalo ne koutou agasala a tino, e se magalo eiloa.”

²⁴A te soko e tokotasi ko Toma, tela e fakaigoa ki te Masaga, e seki fakatasi mo latou i te okoatuga a Iesu.

²⁵Tela, taku atu ei ne nisi soko ki a ia, “Ko oti ne lavea ne matou te Aliki!” Muna a Toma ki a latou, “Kafai e se matea ne au a tuga fao i ona lima, io me tuku atu toku maikao ki koga kola ne tuki ei a fao, io me tuku atu foki a toku lima ki tona kaokao, e se talitonu eiloa au.”

²⁶Ko teka atu aso e valu, toe fakapotopoto ona soko i te fale, ne fakatasi atu ei a Toma ki a latou. A mataloa foki e 'pono, kae ne fanatu a Iesu, tu i loto i a latou kae fai atu, “Ke ia koutou te filemu.”

²⁷Ne fai atu a ia ki a Toma, “Tuku mai tou maikao ki konei, kae kilokilo mai ki oku lima; 'fola mai foki tou lima kae tuku mai ki toku kaokao. Mo a ma se fakatuanaki koe, kae fakatuanaki!”

²⁸Ne tali mai a Toma ki a ia, “Toku Aliki mo toku Atua!”

²⁹Muna a Iesu ki a ia, “E a, ko talitonu koe i te mea ko lavea mai ne koe au? Amutia latou kola e se lavea mai ne latou au, kae talitonu mai eiloa!”

³⁰E uke ake foki a fakailoga ne fai ne Iesu i mua o ona soko, kola e seki tusi ki lalo i te tusi tenei;

³¹Ka ko tusi a mea konei, ko te mea ke tali'tonu ei koutou,[32] ia Iesu ko te Keliso eiloa, ko te Tama a te Atua; kae i te fakatuanaki la tena, e maua ei ne koutou a te ola i tona igoa.