Read Te Tusi Tapu I Te Gana Tuvalu Lomiga Lua IOANE 21 Bible Online

IOANE 21 - Te Tusi Tapu I Te Gana Tuvalu Lomiga Lua bible

IOANE 21

¹Fakamuli ifo, ne toe fakaasi atu a Iesu ki ona soko i te namo o Tipelio; kae ne fakaasi atu penei:

²ki a Simona Petelu, Toma te Masaga, Natanielu mai Kana i Kalilaia, fanau a Sepetaio, mo isi soko ei e tokolua.

³Muna a Simona Petelu ki a latou, “Au ka fano o Fai-ika.” Kae ne tali mai latou ki a ia, “Tatou e olo.” Ne olo latou i te poti; kae ne se poa latou i te po tena.

⁴Kae i te tafataeao, ne tu mai a Iesu i te tafatai; kae ne se iloa ne soko me ko Iesu tena.

⁵Ne fai atu a Iesu ki a latou, “Te fanau, e isi ne otou ika?” Ne tali mai latou, “E seai.”

⁶Ne fai atu a Iesu ki a latou, “Pei ifo te tili ki te feitu ki katea o te poti, kae ka maua ei ne otou ika.” Ne pei ifo te tili ka ko se mafai ne latou o 'futi ake te tili, i te uke o ika.

⁷Ka ko te soko tela e alofa ki ei a Iesu, ne fai mai ki a Petelu, “Ko te Aliki!” I te lagonaga ne Simona Petelu me ko te Aliki, ne sulu a ia ki tena kapa-sulu tela kooti ne tala ne ia; kae eva ki te tai.

⁸Kae ne o'mai a isi soko ki te poti o 'futi ake ki uta te tili ko fonu i ika, me se na 'mao foki latou mai te fenua, kaati ko te selau iata te va.

⁹I te lotou okoga ki uta, ne lavea ne latou te afi malala i kona, e tunu i ei a ika mo falaoa.

¹⁰Ne fai atu a Iesu ki a latou, “Aumai ne mo ika mai otou ika kola fatoa maua.”

¹¹Ka ko Simona Petelu ne fano ki luga i te poti o 'futi ake te tili ki uta, me ko fonu eiloa i ika 'lasi, e matelau, matalima mo te tolugamata; kae ui eiloa i te uke, kae ne se masae eiloa te tili.

¹²Kae ne fai atu a Iesu ki a latou, “O'mai o tapa ake oulua alo.” E seai eiloa se soko ne fia fesili ki a ia, “Ko oi koe?” I te mea ko iloa 'lei ne latou me ko te Aliki.

¹³Ne fanatu a Iesu, puke ki te falaoa kae tufa atu ki a latou; e pena foki tena faiga ki te ika.

¹⁴Kae tenei te fakatolu o Iesu o fakaasi atu ki soko mai i tena toetuakega mai tino 'mate.

¹⁵I te otiga o te lotou 'kaiga i te taeao, ne fai atu ei a Iesu ki a Simona Petelu, “Simona te tama a Ioane, e sili atu a tou alofa ki a au i lo latou konei?” Ne tali mai ki a ia, “Ao, e te Aliki; e iloa ne koe ia au e alofa ki a koe.” Kae ne fai atu a Iesu ki a ia, “Fagai aku tama mamoe.”

¹⁶Ne toe fai atu a Iesu i te fakalua ki a ia, “Simona te tama a Ioane, e alofa mai koe ki a au?” Ne tali mai a Simona, “Ao, e te Aliki, e iloa ne koe i a au e alofa ki a koe.” Ne fai atu a Iesu ki a ia, “Tausi aku mamoe.”

¹⁷Ne toe fai atu a Iesu ki a ia i te fakatolu, “Simona te tama a Ioane, e alofa mai koe ki a au?” Ko se fiafia Petelu i te mea ko fai atu fakatolu ne Iesu ki a ia a te pati tenei, “E alofa mai koe ki a au?” Kae ne tali mai a Simona ki a ia, “Te Aliki, e iloa ne koe a mea katoa, e iloa foki ne koe i a au e alofa ki a koe.” Ne fai atu a Iesu ki a ia, “Fagai aku mamoe.

¹⁸Au e muna tonu atu ki a koe, ka koi tamataene koe, e fakapei eiloa ne koe ou gatu, kae kafai ko toeaina koe, e fakapei ou gatu ne te sua tino, ko takitaki ei koe ki te koga e se fia fano koe ki ei.”

¹⁹Ne fai atu ne Iesu a muna konei, e fakaasi atu ei ki a Petelu me vikia te Atua i tona mate. I te otiga o ana muna kona, fai atu ei a Iesu ki a Petelu, “Tautali mai i a au.”

²⁰Ne mafuli a Petelu ki ona tua, kae ne lavea ne ia te soko tela e alofa ki ei a Iesu, ko ia tela ne takato pili ki te fatafata o Iesu i te 'kaiga, ne fai ake penei ana pati: “Te Aliki, ko oi ka fakalata ne ia koe?”

²¹I te laveaga ne Petelu a ia kae fai mai ki a Iesu, “Te Aliki, e pefea a ia nei?”

²²Ne tali atu a Iesu ki a ia, “Kafai ko toku loto eiloa ke ola a ia pena ke oko ki toku toe foki mai, se a la te uiga o te mea tena ki a koe? Tautali mai i a au.”

²³Ne salalau atu te tala tenei ki ona soko katoa, me ka se mate a te soko tena; ka ko Iesu e seki fai atu ki a ia me ka se mate a ia, kae ne fai atu, “Kafai ko toku loto eiloa ke ola a ia pena ke oko ki toku toe foki mai, se a la te aoga o te mea tena ki a koe?”

²⁴Tenei te soko tela ne molimau ki mea konei, kae ne tusi foki ne ia a mea konei; ka ko iloa 'lei foki ne tatou me tonu eiloa tena molimau.

²⁵Kae uke ake foki a nisi mea ne fai ne Iesu; kae moi ne tusi katoa ana mea ne fai, i toku taofi ka se mafai o ofi i te lalolagi a tusi konei, manafai ne tusi.