Read Te Tusi Tapu I Te Gana Tuvalu Lomiga Lua IOANE 3 Bible Online

IOANE 3 - Te Tusi Tapu I Te Gana Tuvalu Lomiga Lua bible

IOANE 3

¹E isi se Falesaio e igoa ki a Nikotemo, se takitaki foki o tino Iutaia.

²Ne vau a ia ki a Iesu i te po, kae ne fai mai ki a ia, “Te Faiakoga, e iloa ne matou i a koe ko te faiakoga ne vau mai i te Atua, i te mea e seai se tino e mafai ne ia o fai fakailoga konei ne fai ne koe, seiloga ko i a ia te Atua.”

³Ne tali atu a Iesu, “Au e fai tonu atu ki a koe: kafai e se toe fanau mai se tino, e se mafai eiloa o matea ne ia a te Malo o te Atua.”[4]

⁴Ne fai mai Nikotemo ki a ia, “E mafai pefea ne se tino ke toe fanau mai, manafai ko matua? E mafai o toe ulu ki te tinae o tona matua, ke toe fanau mai?”

⁵Ne tali atu a Iesu penei, “Au e muna tonu atu ki a koe, kafai e se fanau mai se tino i te vai mo te Agaga, e se mafai eiloa o ulu atu ki te Malo o te Atua.

⁶Ko te mea e fanau mai ne te foitino, se foitino eiloa; ka ko te mea e fanau mai ne te Agaga, ko te agaga 'lei eiloa tena.

⁷Sa ofo i taku muna ne fai atu ki a koe, ‘E 'tau mo koutou ke toe fa'nau mai.’ [5]

⁸E agi te matagi ki te koga e loto ki ei, e lagona ne koe tona agi, kae e se iloa ne koe me ne vau mai i fea, kae fano foki ki fea; e pena eiloa latou kola e fa'nau mai i te Agaga.”

⁹Ne tali mai Nikotemo ki a ia penei: “E mafai pefea o tupu se mea penei?”

¹⁰Ne tali atu a Iesu ki a ia, “A koe ko te faiakoga o Isalaelu, kae e seki iloa eiloa ne koe a te mea tenei?

¹¹Au e muna tonu atu ki a koe: a matou e fai'pati ki mea e iloa ne matou, kae molimau foki ki mea e matea ne matou, kae e seai eiloa se tino e talia ne ia te motou molimau.

¹²E se talitonu koutou manafai e taku atu ne au mea faka te lalolagi; ka talitonu la pefea koutou manafai e taku atu ne au a mea faka te lagi?

¹³E seai se tino ko oti ne fanake ki te lagi, kae na ko ia fua e tokotasi tela ne fanaifo mai i ei, ko au tena ko te Tama a te Tagata.”

¹⁴E pela mo te sikiakega ne Mose a te gata i te vao, e 'tau foki eiloa o siki ake pena te Tama a te Tagata;

¹⁵ko te mea ke maua ne so se tino e fakatuanaki ki a ia, a te ola se gata mai.

¹⁶Me ne pena eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.

¹⁷Me ne seki uga mai ne te Atua tena Tama o fakamasino te lalolagi, kae o fakaola te lalolagi.

¹⁸Ko te tino tela e fakatuanaki ki a ia e se fakamasinogina, ka ko te tino tela e se fakatuanaki ko oti ne fakamasinogina, me ne seki fakatuanaki eiloa ki te igoa o te Tama e tokotasi a te Atua.

¹⁹Kae tenei te fakamasinoga, i te mainaga ko oti ne oko mai ki te lalolagi; ka ko tino e sili atu i te manako ki te pouliga i lo te mainaga; i te mea e fai ne latou a galuega ma'sei.

²⁰So se tino e fai ne ia a mea masei, e takalialia i te mainaga, e se fia vau foki ki te mainaga, i te mea ma iloa ei ana galuega masei;

²¹ka ko te tino e fai mea tonu, e vau eiloa ki te mainaga, ko te mea ke fakaasi mai ei ana galuega e mai i te Atua.

²²Mai tua ifo o te mea tenei, ne olo atu a Iesu mo ona soko ki te koga fenua o Iutaia; nofo ei mo latou kae papatiso atu foki.

²³Ka ko Ioane ne papatiso i Ainona e tu pili ki Salima, me uke i ei te vai. Ne olo atu ki ei a tino, papatiso ei ne ia latou.

²⁴Me i a Ioane i aso kona, e seki 'pei ki te fale puipui.

²⁵Tela la, ne kamata ei a soko o Ioane o fakakinau mo te sua tino Iutaia,[6] e uiga ki te feitu ki te faka'maga faka te tapuakiga.

²⁶Ne olo atu latou ki a Ioane, kae fai atu ki a ia, “Te faiakoga, a te tino tela ne 'nofo koulua i te feitu atu o te Iolitana, tela ne molimau foki koe ki ei, kiloke, ko ia tenei e papatiso, ka ko tino ko o'mai katoa ki a ia.”

²⁷Ne tali atu a Ioane penei, “E se mafai ne se tino o maua fua ne ia se mea, seiloga ke maua ne ia mai te Atua.

²⁸A koutou ko aku molimau, i a au ne fai atu, au e se ko te Keliso; kae ne uga mai au ke mua i a ia.

²⁹A te tagata fatoa fakaipoipo, ko ia tena e isi tena avaga ne fatoa fakaipoipo laua; ka tu faeloa te soa o te tagata fatoa fakaipoipo i ona tafa o fakalogologo ki a ia, ka ko oko eiloa i tona fiafia ona ko te fiafia o te tagata fatoa fakaipoipo. Tenei foki la, ko oko eiloa a toku fiafia ki tena okoga.

³⁰E fanake tona taua, ka ko au e gasolo ifo toku aoga.”

³¹A ia tela ne fanaifo mai luga, e sili eiloa a ia i mea katoa; ka ko te tino tela e vau i te lalolagi, se tino o te lalolagi, e faka te lalolagi foki ana pati. A ia tela ne vau mai i te lagi, e sili eiloa i mea katoa.

³²E molimau foki ki mea ne lavea kae lagona ne ia, kae e seai eiloa se tino ne talia ne ia tena molimau.

³³A te tino e talia ne ia tena molimau, ko te fakamaoniga tena i te Atua e tonu eiloa.

³⁴A te tino tela ne uga mai ne te Atua, e taku mai ne ia muna a te Atua, me ko tuku katoatoa ne te Atua tona Agaga ki a ia.

³⁵ A te Tamana e alofa ki te Tama, kae tuku atu ne ia a mea katoa ki ona lima.

³⁶A te tino tela e talitonu ki te Tama, ko i a ia te ola se gata mai; ka ko te tino tela e se fakalogo ki te Tama, ka se lavea ne ia te ola, kae ka tumau eiloa i a ia te fakasalaga a te Atua.