Read Te Tusi Tapu I Te Gana Tuvalu Lomiga Lua IOANE 6 Bible Online

IOANE 6 - Te Tusi Tapu I Te Gana Tuvalu Lomiga Lua bible

IOANE 6

¹Mai tua ifo o mea konei, fano ei a Iesu ki te isi feitu o te namo o Kalilaia, io me ko te namo o Tipelia.

²Ka ko tau'tali atu i a ia a tino e tokouke, i te mea ne kilo'kilo latou ki galuega fakaofoofogina ne fai ne ia ki tino ma'saki.

³Ne fano a Iesu ki luga i te mauga, ne nofo ki lalo fakatasi mo ona soko.

⁴Ko pili te Paseka ko te 'kaiga faka-Iutaia.

⁵Ne fakapela ake mata o Iesu, lavea ei ne ia a tino e tokouke e o'mai ki a ia, ana muna ki a Filipo, “Tefea te koga ka mafai ei ne tatou o 'togi mai ne falaoa, ke 'kai ei tino konei?”

⁶A te muna tena a Iesu, se muna tofotofo fua, i te mea ko oti ne iloa ne ia tena mea ka fai.

⁷Ne tali atu a Filipo, “Kafai e togi mai ne falaoa ki se lua selau tupe siliva,[10] ko te mea ke tofu te tino mo ne mo mea, e se lava.”

⁸Ko tena soko e tokotasi, ko Anitelea, ko te taina o Simona Petelu ana muna,

⁹“E isi se tamaliki tenei e isi ne ana puta falaoa e lima, mo ika fo'liki e luagamata; kae se a te aoga o mea kona ki tino tokouke konei?”

¹⁰Muna a Iesu, “Fai atu koutou ki tino ke 'nofo ki lalo.” A te koga tena, se koga moukua. Tela, nofo ei ki lalo a tino; kati ko te limaafe te aofaki o tino.

¹¹Ne puke ne Iesu a falaoa, kae ne fai te fakafetai, tela tufa atu ei ki tino kola e 'nofo i lalo. Ne fai foki pena ki ika; ne tufa atu ki te mea e ma'nako ki ei latou.

¹²Ko ma'kona katoa latou, tela, fai atu ei a Iesu ki ona soko, “Fakamaopoopo katoa a mea ne 'toe, ke seai eiloa se mea e fakamaumau.”

¹³Tela, fakamaopoopo ei ne latou e tusa mo te sefulu lua tapola ne 'fonu i mea ne 'toe mai puta falaoa e lima; ko mea kona ne toe mai i te ma'konaga o tino kola ne 'kai.

¹⁴Ko iloa ne tino kona te fakailoga ne fai ne Iesu, fai ake ei olotou pati, “E tonu eiloa, ko te Pelofeta tenei ko vau ki te lalolagi.”

¹⁵Ko iloa foki ne Iesu, me ka o'mai latou o puke fakamalosi a ia mo fai te lotou tupu; tela, toe foki ei a ia tokotasi ki te mauga.

¹⁶Ko oko ki te afiafi, olo ifo ei ona soko ki te namo.

¹⁷Ne sopo ki luga i te poti, kae ne folau ki Kapanaumi i te isi feitu o te namo. Ko pouli, kae ka seki oko atu eiloa a Iesu ki a latou.

¹⁸Ko sou te namo, i te matagi ko agi malosi.

¹⁹Ne pūlu te lotou poti, kati ko te tolu io me ko te fa maila, ka ko lavea atu ne latou a Iesu e sasale i luga i te namo, kae gasolo o fakapilipili mai ki te lotou poti; kae ne ma'taku latou.

²⁰Ne faipati atu a ia ki a latou, “Sa ma'taku, me ko au eiloa tenei.”

²¹Tela, fakasopo eiloa ne latou a ia mo te fiafia ki luga i te poti; kae ne oko fakavave te poti ki te koga ne olo latou ki ei.

²²I te taeaoakega, ne lavea ne tino e tokouke kola ne 'tu i te isi feitu o te namo, me ko seai ake foki se poti i te koga tena, kae na ko te poti tela ne olo ei soko o Iesu; ka ko Iesu ne seki olo fakatasi mo ona soko i te poti, me ko ona soko fua ne olo i ei,

²³kae isi ne poti ne o'mai mai Tipelia, e pili ki te koga ne 'kai ei latou, i te palelega o te fakafetai ne fai ne te Aliki.

²⁴I te iloaga ne tino i a Iesu e galo, pela foki mo ona soko, ne 'sopo ei latou ki poti o olo ki Kapanaumi o 'sala Iesu.

²⁵Kae i te mauaga ne latou a ia i te isi feitu o te namo, olotou muna ki a ia, “Te Faiakoga, ne vau koe anafea ki konei?”

²⁶Ne tali atu a Iesu ki a latou penei: “Au e muna tonu atu ki a koutou, i a koutou ne seki o'mai o 'sala au i te mea ne lavea ne koutou fakailoga, ka ko te mea ne 'kai koutou i falaoa, kae ma'kona i ei.

²⁷Sa ga'lue koutou ke maua a meakai kola e se tumau, kae ga'lue ke maua meakai kola e tumau i te ola se gata mai, kola ka tuku atu ki a koutou ne au ko te Tama a te Tagata; i te mea ko oti eiloa ne fakaasi tonu mai a ia ne te Atua te Tamana.

²⁸Olotou muna ki a ia, “Se a te mea ka fai ne matou, ko te mea ke ga'lue matou i te galuega a te Atua?”

²⁹Ne tali atu a Iesu, “Tenei te galuega e manako ki ei te Atua ke fai ne koutou: ke talitonu koutou ki te tino ne uga mai ne ia au.”

³⁰Olotou muna ki a ia, “Se a te fakailoga ka fai ne koe ke lavea ne matou, kae talitonu ei foki matou ki a koe? Se a tau galuega e fai?

³¹A omotou tamana ne 'kai ki te manai i te vao, e pela mo muna ne tusi, ‘Ne tuku atu ne ia falaoa mai te lagi ke 'kai ei latou.”’

³²Muna a Iesu ki a latou, “Au e muna tonu atu ki a koutou, e se ko Mose ne avatu ne ia te falaoa tena mai te lagi, ka ko toku Tamana ne avatu ne ia te falaoa tonu mai te lagi.

³³Me ko te falaoa mai te Atua, ko ia tela ne fanaifo mai te lagi o aumai te ola ki te lalolagi.”

³⁴Olotou muna ki a ia, “Te Aliki, aumai sale eiloa ki a matou te falaoa tena.”

³⁵Muna a Iesu ki a latou, “Ko au ko te falaoa o te ola; ko te tino e vau ki a au e se toe fia kai, ko te tino foki e talitonu ki a au, e se toe fia inu eiloa.

³⁶“Kae muna atu au ki a koutou, me ko oti foki ne lavea ne koutou au kae ka seki talitonu mai eiloa koutou.

³⁷Ko mea katoa e tuku mai ne te Tamana ki a au, ka aumai ki a au; mo te tino tela e vau ki a au, ka se tuli eiloa ne au keatea.

³⁸Me i a au ne seki fanaifo mai te lagi o fai te mea e loto eiloa au ki ei, kae ne fanaifo au o fai te mea e loto ki ei te tino tela ne uga mai ne ia au.

³⁹Kae tenei te loto o te Tamana tela ne uga mai ne ia au: ke se galo eiloa se tino e tokotasi i tino kola ne tuku mai ne ia ki a au, kae ke toe fakatu ake katoa ne au i te aso fakaoti.

⁴⁰Tenei foki te loto o toku Tamana, tela ne uga mai ne ia au: ko tino katoa kola e 'kilo ki te Tama kae talitonu ki a ia, ka maua ne latou te ola se gata mai, kae ka fakatu ne au i te aso fakaoti.”

⁴¹Ko fatufatu tino Iutaia ki a ia, i te mea i a ia ne fai atu pela, “Au nei ko te falaoa o te ola ne fanaifo mai te lagi.”

⁴²Olotou muna, “E se ko Iesu tenei te Tama a Iosefa? E iloa ne tatou tona tamana mo tona matua! Kae ne pefea eiloa o fai mai a ia penei i a ia ne vau mai te lagi?”

⁴³Ne tali atu a Iesu ki a latou, “Sa fatufatu koutou.

⁴⁴E se mafai ne se tino o vau ki a au, seiloga ne mafua tona vau mai te Tamana tela ne uga mai ne ia au; kae ka toe fakatu ne au a ia ki te ola i te aso fakaoti.

⁴⁵Ko oti ne tusi ne Pelofeta penei: ‘Ka akoako latou katoa ne te Atua.’ Tela la, ko tino katoa e faka'logo ki te Tamana kae tauloto mai i a ia, ka o'mai latou ki a au.

⁴⁶Ka seki lavea eiloa ne se tino te Tamana, ka ko ia fua tela ne vau mai te Atua, ne lavea ne ia te Tamana.

⁴⁷“Au e muna tonu atu ki a koutou, ko te tino tela e fakatuanaki mai ki a au, e maua ne ia te ola se gata mai.

⁴⁸Ko au ko te falaoa o te ola.

⁴⁹Ne kai ne otou tamana te manai i te vao, kae ne 'mate latou.

⁵⁰Tenei te falaoa ko fanaifo mai te lagi; so se tino e kai ki ei, ka se toe mate.

⁵¹Ko au ko te falaoa o te ola ne fanaifo mai te lagi; kafai so se tino e kai ki te falaoa tenei, ka ola eiloa a ia ki te se gata mai. Ka ko te falaoa ka avatu ne au, ko toku foitino; ka avatu ne au ke maua ne tino te ola se gata mai.”

⁵²Tela, finau ei tino Iutaia i a latou eiloa, olotou muna, “E mafai pefea ne te tagata tenei o aumai tena foitino ki a tatou, ke 'kai tatou i ei?”

⁵³Kae tali atu a Iesu ki a latou, “Au e muna tonu atu ki a koutou, kafai e se 'kai koutou ki te foitino o te Tama a te Tagata tela ko au, kae se inu foki koutou ki toku toto, e se maua ne koutou te ola se gata mai.

⁵⁴Ko te tino e kai ki toku foitino, kae inu ki toku toto, ka maua ne ia te ola se gata mai; kae ka fakatu ne au a ia i te aso fakaoti.

⁵⁵Me i toku foitino se meakai tonu eiloa, ko toku toto foki se mea inu tonu eiloa.

⁵⁶Ko te tino e kai ki toku foitino kae inu ki toku toto, e tumau te tino tena i a au, e pela foki au i a ia.

⁵⁷Au ne uga mai ne te Tamana ola, kae ola foki au i te Tamana; tela la, ko tino e 'kai ki toku foitino, ka ola ona ko au.

⁵⁸Tenei te falaoa ne fanaifo mai te lagi; e se pela mo te falaoa ne 'kai ki ei otou tamana kae 'mate. Ko te tino tela e kai ki te falaoa tenei; ka ola eiloa ki te se gata mai.”

⁵⁹A mea kona, ne faipati atu ne Iesu i te taimi ne akoako ei a ia i te fale tapuaki i Kapanaumi.

⁶⁰E tokouke ona soko ne lagona ne latou a te mea tenei, kae fai atu, “Se muna faigata tena; ko oi te tino e mafai o fakalogo ki ei?”

⁶¹I te lagonaga ne Iesu i tena loto eiloa i ona soko e mui'mui ki te mea tena, fai atu ei ki a latou: “E masei te mea tenei ki a koutou?

⁶²E pefea la manafai e lavea ne koutou au te Tama a te Tagata e fanake ki luga, ki te koga tela ne nofo i ei a ia taumua?

⁶³Ko te Agaga e aumai ne ia te ola; ka ko te foitino e seai eiloa sona aoga ki se mea. A muna ne faipati atu ne au ki a koutou, ko te Agaga mo te ola a mea kona.

⁶⁴Ka ko nisi o koutou e se talitonu eiloa.” Me ne iloa eiloa ne Iesu mai te kamataga a tino kola e se talitonu, mo te tino tela ka fakalata ne ia a ia.

⁶⁵Ne toe fai atu foki a ia ki a latou, “Tena te mea ne fai atu ei au ki a koutou, me e seai se tino e mafai o vau ki a au, seiloga ko tuku atu ki a ia ne te Tamana.”

⁶⁶Ona ko te feitu tenei, e tokouke ona soko ko solomuli ki tua, ko se tau'tali foki i a ia,

⁶⁷tela, muna atu ei a Iesu ki te tinoagafulu mo te tokolua, “Kae pefea koutou, e fia olo foki koutou keatea?”

⁶⁸Ne tali mai Simona Petelu ki a ia, “Te Aliki, ko oi te tino ka olo matou ki ei? A muna o te ola se gata mai, e nofo mo koe.

⁶⁹Ko talitonu matou, ka ko iloa foki ne matou i a koe ko te Tamatapu a te Atua.”

⁷⁰Ne tali atu a Iesu ki a latou, “Ne seki filifili ne au koutou te tinoagafulu mo te tokolua? Ka ko te tokotasi o koutou se tiapolo!”

⁷¹Ne faipati a ia e uiga mo Iuta te tama a Simona te Isikaliota; me tiga eiloa a ia se tokotasi o te tinoagafulu mo te tokolua, kae ka fakalata eiloa ne ia a Iesu.