Read Te Tusi Tapu I Te Gana Tuvalu Lomiga Lua IOANE 7 Bible Online

IOANE 7 - Te Tusi Tapu I Te Gana Tuvalu Lomiga Lua bible

IOANE 7

¹I te palelega o mea konei, faimalaga sale ei a Iesu i Kalilaia, me ne seki manako a ia o faimalaga sale i Iutaia, i te mea i tagata Iutaia ne salasala ki a ia o tamate.

²I te taimi tenei, ko pili ki te 'Kaiga o Fale Tapuaki Ave Sale i Malaga.

³Tela, muna mai ei ona taina ki a ia, “Tuku te koga nei kae fano ki Iutaia, ko te mea ke lavea foki ne ou soko a galuega e fai ne koe.

⁴Me e seai se tino e fai funa sena mea, manafai e manako a ia ke iloa ne tino. Kafai e fai ne koe a mea konei, fakaasi atu foki koe ki te lalolagi.”

⁵Ke oko foki ki ona taina, e seai se tino e talitonu ki a ia.

⁶Tela, muna atu ei a Iesu ki a latou, “E seki oko mai nei toku taimi; ka ko koutou, e pau faeloa i a koutou so se taimi.

⁷E se mafai a tino o te lalolagi o takalia'lia ki a koutou; kae takalia'lia mai ki a au, i te mea e molimau au i te lalolagi me masei ana amio.

⁸Olo koutou ki te 'kaiga. I a au se fanatu [11] me seki oko ki toku taimi tonu.”

⁹Ne fai atu ne ia muna konei ki a latou, nofo ei a ia i Kalilaia.

¹⁰I te ologa o taina o Iesu ki te 'kaiga, ne fano foki a ia; kae ne seki fano fakaasiasi, kae ne fano 'muni.

¹¹I te taimi tena, a tino Iutaia ne salasala ki a ia i te 'kaiga, kae faipati penei, “A Iesu nei tefea?”

¹²Ko oko eiloa i te musu'musu o tino e tokouke e uiga ki a ia. Muna a isi tino, “A ia se tagata 'lei,” kae muna mai isi tino, “Ikai, e fakavalea ne ia a tino.”

¹³Kae seai eiloa se tino ne faipati fakaasiasi e uiga ki a ia, me mataku i tino Iutaia.

¹⁴I te piliga ki aso fakapalele o te 'Kaiga o Fale Tapuaki Ave Sale i Malaga, ne fano a Iesu ki te Fale Tapu kae ne fai tena akoakoga i ei.

¹⁵Kae ne ofo a tino Iutaia, olotou muna, “Ne poto pefea a ia nei, me seki fano eiloa ki se akoga?”

¹⁶Ne tali atu a Iesu ki a latou, “A akoakoga e fai atu ne au e se e a aku, kae e a ia tela ne uga mai ne ia au.

¹⁷Ko te tino tela e fiafia o fai te loto o te Atua, ka iloa 'lei ne ia me ne aumai aku akoakoga mai te Atua io me mai i a au.

¹⁸A te tino tela e faipati mō ia ake eiloa, e 'sala eiloa ki tona vikiga; ka ko te tino tela e 'sala ki te vikiga o te tino ne uga mai ne ia a ia, e fai mea tonu, kae seai foki se 'se i a ia.

¹⁹Ne seki tuku atu ne Mose a te Tulafono ki a koutou? Kae seai se tino o koutou e tausi te Tulafono. Ai a e salasala ei koutou ki a au o tamate?”

²⁰Ne tali mai a tino, “E isi se temoni i loto i a koe! Ko oi te tino e fia tamate ki a koe?”

²¹Ne tali atu a Iesu ki a latou, “Ko oti ne fai ne au a te galuega e tasi, kae ne ofo katoa koutou i ei.

²²Tena te pogai ne tuku atu ei ne Mose ki a koutou te pilitome; e se fai pela me ne mafua mai i a Mose, kae mai tupuga o koutou, kae ne pilitome ne koutou a tino i te Sapati.

²³Kafai e pilitome se tagata i te Sapati, ko te mea ke se ofa te Tulafono a Mose, kae ai a la e kaitaua mai ei koutou ki a au, i taku faiga ke malosi a te tagata i te Sapati?

²⁴Sa fakamasino ki mea matea, kae fakamasino ki te fakamasinoga tonu.”

²⁵Muna a nisi tino Ielusalema, “E se ko ia tenei e fia tamate ne latou?

²⁶Kae kiloke, ko faipati tonu eiloa a ia, kae seai eiloa se tino o latou ne fai sena pati ki a ia. Ko iloa 'lei nei ne tino pule me ko te Keliso tonu eiloa tena?

²⁷E iloa ne tatou a te koga ne vau i ei te tagata tenei, ka ko te Keliso manafai ko vau a ia, e seai se tino e iloa ne ia me vau mai fea.”

²⁸Ne faipati ki luga a Iesu i te Fale Tapu i te taimi ne akoako atu ei a ia, ana muna, “Ko iloa katoa ne koutou au? Ko iloa foki ne koutou te koga ne vau au i ei? Ne seki vau au i a au eiloa, ka ko ia tela ne uga mai ne ia au, e tonu eiloa, kae se iloa ne koutou a ia.

²⁹Kae e iloa ne au a ia, i a au ne vau mai i a ia, ne uga mai foki ne ia au.”

³⁰Tela la, ko fia puke latou ki a ia; kae ne seki iai eiloa se lima o se tino ne oko ki a ia, i te mea ka seki oko ki tona taimi.

³¹Kae e tokouke ko talitonu ki a ia mai te vaitino konei, olotou muna, “Kafai ko vau te Keliso, e a, e uke atu fakailoga ka fai ne ia i fakailoga ko oti ne fai ne te tagata tenei?”

³²Ko 'logo Falesaio i tino ko musu'musu e uiga ki a Iesu; uga ei ne latou mo faitaulaga sili a ofisa o puke mai a ia.

³³Muna atu ei a Iesu ki a latou, “Ne mo aso fua koi 'toe e 'nofo ei tatou, ko fano ei au ki a ia tela ne uga mai ne ia au.

³⁴Ka salasala koutou ki a au, kae ka se maua au ne koutou. Ko te koga foki e nofo au i ei, e se mafai ne koutou o oko ki ei.”

³⁵Ko faipati tino Iutaia i a latou eiloa penei, “Tefea te koga ka fano a ia ki ei, tela ka se mafai o iloa ne tatou a ia? Ka fano a ia ki tino Iutaia kola e salalau valevale i Eleni, o fakaakoako atu tino Eleni?

³⁶Se a te uiga o tena pati tela ne fai mai, e salasala koutou ki a au, kae ka se maua au ne koutou; ko te koga foki e nofo au i ei, e se mafai ne koutou o oko ki ei?”

³⁷I te toe aso lasi o te 'kaiga, ne tu ki luga a Iesu kae faipati atu mo te leo maluga, ana muna, “Kafai se tino e fia inu, ke vau ki a au o inu.

³⁸E pela mo muna a te Tusi, ‘Ko te tino e talitonu ki a au, ka tafe mai i tona loto a te vai o te ola.”’[12]

³⁹A te pati tena ne fai atu ne ia, e fakasino ki te Agaga tela ka maua ne tino e talitonu ki a ia; i te mea i aso kona ka seki tuku mai te Agaga Tapu, me ka seki oko Iesu ki tona 'malu.

⁴⁰E tokouke a tino ne lagona ne latou te muna tenei, kae ne fai'pati penei: “E tonu eiloa, tenei te Pelofeta.”

⁴¹Muna a isi tino, “Tenei te Keliso.” Ka ko isi tino ne muna ake penei: “E se tupu mai Kalilaia te Keliso!

⁴²E a, ne seki fai mai te Tusi i te Keliso e tupu mai i te gafa o Tavita, kae fanau mai foki i Petelema, i te fa'kai ne nofo i ei Tavita?”

⁴³Tela, kesekese ei manatu o tino e uiga ki a ia.

⁴⁴Nisi tino o latou ne fia puke ki a ia, kae ne seki patele atu eiloa se lima o se tino ki a ia.

⁴⁵Ko foki mai sotia ki faitaulaga sili mo Falesaio, kae fesili atu latou penei ki sotia, “Ai a ne seki aumai ei ne koutou a Iesu?”

⁴⁶Ne tali mai sotia, “E seki iai eiloa se tagata ne faipati pela mo te tagata tenei!”

⁴⁷Ne tali atu a Falesaio ki a latou, “E a, a koutou foki ko fakasegina?

⁴⁸Kai iloa eiloa ne koutou se tino pule tokotasi o tatou, io me se Falesaio ko talitonu ki a ia?

⁴⁹A tino konei, e se iloa ne latou te Tulafono a Mose; tela la, ka malaia latou.”

⁵⁰Muna a Nikotemo ki a latou, ko ia tela ne fano ki a Iesu i te po, kae se tokotasi o latou,

⁵¹“E mafai o fakasala se tino i te tou Tulafono, kae seki fakamasino muamua a ia, ke iloa ei ana mea ne fai?”

⁵²Ne tali mai latou ki a ia, “A koe foki se Kalilaia? Sukesuke ki Tusi, ka iloa ei ne koe, me e seai eiloa se pelofeta e tupu mai[13] i Kalilaia.”