Read Te Tusi Tapu I Te Gana Tuvalu Lomiga Lua IOANE 9 Bible Online

IOANE 9 - Te Tusi Tapu I Te Gana Tuvalu Lomiga Lua bible

IOANE 9

¹I te sasalega a Iesu, ne lavea ne ia te tagata tela ne fanau mai e kivi.

²Ne fesili mai ki a ia ona soko, “Te Faiakoga, ko oi ne agasala, ko te tagata nei io me ko ona matua, ko ala ei o fanau mai a ia e kivi?”

³Ne tali atu a Iesu, “E se agasala a te tagata nei io me ko ona matua, ka ko tupu te mea nei ke fakaasi ei te 'mana o te Atua i te faiga ke 'lei ona mata.

⁴E 'tau mo tatou o fai a galuega a ia tela ne uga mai ne ia au, ka koi ao; me ka oko mai te po, ko seai ei se tino e mafai o galue i ei.

⁵Au ko te mainaga o te lalolagi, i a au koi nofo i te lalolagi.”

⁶I te palelega ne fai atu a pati a Iesu, puaki ei a ia ki te laukele, kae palu ne ia te pela mo ona suavale, nini ei ne ia a mata o te tagata kivi ki te mea tena.

⁷Oti, muna atu ei a Iesu ki a ia, “Fano o mulumulu i te vai koukou i Siloama,” ko tena uiga “Ugaatu.” Fano ei a ia o mulumulu kae ne foki mai ko kite.

⁸Muna a tino kola ko oti ne iloa muamua ne latou a ia e kivi ona mata, “E se ko ia tenei ne sagasaga sale kae akai mea?”

⁹Muna a isi tino, “Ko ia eiloa tenei.” Kae fai mai nisi, “E se ko ia, kae e tai pela eiloa mo ia.” Muna a te tino kivi ki a latou, “Ko au eiloa tenei.”

¹⁰Ne fai atu ei latou ki a ia, “Ne fai pefea ke 'pula ou mata?”

¹¹Ne tali mai a ia, “Ko te tagata e igoa ki a Iesu ne palu ne ia te pela kae ne nini ki oku mata, kae ne fai mai foki ki a au, ‘Fano ki te vai koukou i Siloama o mulumulu i ei.’ Fano ei au o mulumulu oku mata i kona, 'kite ei au.”

¹²Tela, fai atu ei latou ki a ia, “Tefea la te tagata tena?” Ne tali mai a ia, “E se iloa ne au.”

¹³Ne aumai ne latou ki Falesaio te tino kivi.

¹⁴Ko te Sapati ne palu ei ne Iesu te pela o faka'pula ona mata.

¹⁵Ne toe fesili foki Falesaio ki a ia, me ne 'pula pefea ona mata. Ana muna ki a latou, “Ne nini ne ia oku mata ki pela ko oti ne palupalu, 'mulu ei oku mata, tenei ko kite ei au.”

¹⁶Muna a nisi Falesaio, “E se mai te Atua te tagata nei, i te mea e se tausi ne ia te Sapati.” Muna a nisi tino, “E mafai pefea ne se tagata agasala o fai ne fakailoga pena?” Tela, vaelua ei latou.

¹⁷Ne toe muna atu a Falesaio ki te tino kivi, “Se a tau mau e uiga mo ia, me ne faka'pula ne ia ou mata?” Ana muna, “Se pelofeta eiloa a ia.”

¹⁸Kae ne seki talitonu tino Iutaia ki a ia, me ko ia tela ne kivi, ka ko toe kite ona mata, ke oko eiloa ki te taimi ne ami ei ona matua ne latou.

¹⁹Kae ne fesili latou ki a laua, “Kote lua tama tenei, tela ne fai mai koulua me ne kivi eiloa i te fanaumaiga? Kae ne kite pefea?”

²⁰Ne tali mai ona matua ki a latou, “Ko iloa ne maua me ko te ma tama tenei, kae e iloa tonu foki eiloa ne maua me ne fanau mai e kivi.

²¹Kae ne kite pefea, e se iloa ne maua me ko oi ne faka'pula ne ia ona mata. Fesili atu ki a ia me ko matua. E mafai eiloa ne ia o tali mai.”

²²Ne fai atu pena ne ona matua, i te mea ne ma'taku laua i tino Iutaia; me ko iku i te lotou filifiliga, me kafai e taku atu ne se tino i a Iesu ko te Keliso, e tuli keatea mai te fale tapuaki.

²³Tena te mea ne fai atu ei pena ona matua, “A ia ko matua, fesili atu ki ei.”

²⁴Ne toe ka'laga latou i te fakalua ki te tino kivi, kae fai atu ki a ia, “Avatu te vikiga ki te Atua; kae se ko Iesu, me e iloa ne matou i a Iesu se tagata agasala.”

²⁵Ne tali mai a ia, “E se iloa ne au me i a ia se tagata agasala me ikai, kae tasi fua te mea e iloa ne au, au ne kivi muamua, kae nei ko kite.”

²⁶Ne toe muna atu latou ki a ia, “Se a tena mea ne fai ki a koe? Kae ne fai foki pefea ne ia ke 'pula ou mata?”

²⁷Ne tali mai a ia ki a latou, “Ko palele ne taku atu ne au ki a koutou, kae ne seki faka'logo mai eiloa koutou. Kae se a foki te mea ko toe fia faka'logo mai ei koutou? E ma'nako koutou ke fai koutou mo ona soko?”

²⁸Ne muna masei latou ki a ia kae fai atu, “Ko koe tena ko tona soko; ka ko matou ko soko o Mose.

²⁹E iloa ne matou i te Atua ne faipati ki a Mose, kae se iloa ne matou me ne vau mai i fea a te tagata tenei.”

³⁰Ne tali mai a ia, “Ko ofo toku loto i te mea tenei, me se iloa ne koutou me ne vau a ia mai i fea, ka ko faka'pula ne ia oku mata!

³¹E iloa ne tatou i te Atua e se fakalogo ki tino agasala; kae fakalogo ki tino kola e ava ki a ia kae fai foki ne latou tona loto.

³²Talu mai te kamataga o te lalolagi, ne seki lagona eiloa me isi se tagata ne faka'pula ne ia a mata o se tino ne fanau mai e kivi.

³³Moi se vau mai te Atua te tagata tena, e se mafai ne ia o fai se mea e tasi.”

³⁴Ne tali mai latou ki a ia, “Ne fanau mai koe e fonu i te agasala, kae vau koe o akoako mai matou?” Tela, atuli ei ne latou a ia ki tua.

³⁵Ne logo Iesu me ko oti ne atuli a ia ne latou ki tua; kae i te la fetauiga, fai atu ei ki a ia, “E a, e talitonu koe ki te Tama a te Tagata?”

³⁶Ne tali mai a ia, “Te Aliki, ko oi a ia; ko te mea ke talitonu au ki a ia?”

³⁷Ne fai atu Iesu ki a ia, “Ko oti ne matea ne koe a ia, ka ko ia foki eiloa tenei e sau'tala mo koe!”

³⁸Ne fai atu a ia, “Te Aliki, au ko talitonu.” Ifo ei a ia ki a Iesu.

³⁹Muna a Iesu, “Au ne vau ki te lalolagi nei o fakamasino, ko te mea ko tino kivi ke 'kite; ka ko tino 'kite ke kivi.”

⁴⁰E isi ne Falesaio ne i kona kae ne lagona ne latou a muna konei, fai mai ei ki a ia, “A matou foki e 'kivi?”

⁴¹Muna a Iesu ki a latou, “Moi fai ne 'kivi otou mata, kati ko seai ne otou agasala; kae fai mai nei koutou, ‘A matou e se 'kivi omotou mata,’ tela la, e tumau eiloa koutou i te agasala.”