Read Te Tusi Tapu I Te Gana Tuvalu Lomiga Lua GALUEGA 1 Bible Online

GALUEGA 1 - Te Tusi Tapu I Te Gana Tuvalu Lomiga Lua bible

GALUEGA 1

¹Teofilo, ne tusi atu ne au i taku tusi muamua a mea katoa ne fai ne Iesu, fakatasi mo ana akoakoga kola ne fai mai te kamataga o tena galuega,

²ke oko eiloa ki te aso ne avake ei a ia ki te lagi. Ka koi tuai o avake a ia ki te lagi, ne fai atu ana fakatonuga e alatu i te 'mana o te Agaga Tapu ki tagata ne filifili ne ia ke fai mo ana apositolo.

³Mai tua o te fasefulu aso talu i tena matega, ne fakaasi fakauke atu a ia ki a latou, ko te mea ke tali'tonu latou i a ia ko toe ola mai. Ne lavea ne latou a ia, kae ne fai'pati foki mo latou e uiga ki te Malo o te Atua.

⁴ Ka koi fakatasi a ia mo latou,[1] fakatonu atu ei ne ia a latou, “Ke sa olo keatea koutou mai Ielusalema, ka ke faka'tali ki te meaalofa a toku Tamana ne fai feagaiga atu ne au ki a koutou.

⁵A loane ne papatiso ki te vai, kae se leva nei ko papatisogina ei koutou ki te Agaga Tapu.”

⁶I te maopoopoga fakatasi a te kau apositolo mo Iesu, fesili atu ei latou ki a ia penei: “Te Aliki, e mafai ne koe i te taimi nei o toe fakafoki a te Malo ki a Isalaelu?”

⁷Muna a Iesu ki a latou: “A taimi mo tau o aso ne fai eiloa ne toku Tamana i tena pule, kae e se 'tau mo koutou o fia iloa me ko afea e 'tupu ei.

⁸Ka fakafonugina koutou i te 'mana manafai e oko atu ki luga i a koutou a te Agaga Tapu. Ka fai foki koutou mo molimau ki a au i Ielusalema, i Iutaia katoa mo Samalia, ke oko eiloa ki kapakapalagi o te lalolagi.”

⁹I te otiga o ana muna konei ko te mea eiloa ko avake a ia ki te lagi, kae onoono atu eiloa latou ki a ia, ka ko te kaumana ne 'pono ne ia Iesu mai i olotou mata.

¹⁰Ka koi kilo'kilo atu eiloa olotou mata ki tena fanakega ki te lagi, e 'poi fua me ko 'tu mai te tokolua tagata i olotou mua, e 'pei ki gatu 'kena.

¹¹A la muna, “Tagata Kalilaia, ai a e 'tu ei koutou i kona o kilo'kilo ki te lagi? Ko Iesu tena, tela ne avake ki te lagi mai ia koutou, ka pena foki mana foki mai, e pela mo te otou laveaga i tena fanakega ki te lagi.”

¹²Ko toe 'foki a te kau apositolo ki Ielusalema mai te mauga o Olive, kāti e afā maila te 'mao mai te fa'kai.

¹³Ko oko atu latou ki Ielusalema, olo ei ki luga i te potu e 'nofo i ei a latou konei: Petelu, Ioane, Iakopo, Anitelea, Filipo, Toma, Patolomaio, Mataio, Iakopo te tama a Alefaio, Simona te tagata loto fenua, mo Iuta ei te tama a Iakopo.

¹⁴E masani eiloa latou o potopoto fakatasi o 'talo saale mo fafine, e pela foki Malia te matua o Iesu mo nisi taina ake o Iesu.

¹⁵E se leva foki aso i te tekaatuga o te mea nei, ne fai te fono a te kau talitonu, kati e tusa mo te lau mo te tinolua tino. Ne tu ake a Petelu i mua o latou kae fai atu,

¹⁶“Taina, se mea e 'tau ke fakataunu a muna i tusitusiga tapu, kola ne faipatigina ne te Agaga Tapu i aso ko teka e alatu ia Tavita, e uiga ki a Iuta tela ko te takitaki o latou kola ne puke fakapagota ne latou a Iesu.

¹⁷A Iuta ko te sua tino tela ne filifilia ke ga'lue tasi tatou i te galuega tenei.”

¹⁸Ko te tupe ne maua ne Iuta i tena mea masei ne fai, ne 'togi ei te laumanafa. Ne to kae 'sulu tona ulu ki lalo, mapa mo tona tinae kae tatela mo ona gakau ki tua, mate eiloa a ia.

¹⁹Ne 'logo katoa a tino kola ne 'nofo i Ielusalema i te mea tena, tela fakaigoa ei ne latou a te laumanafa tena i te lotou 'gana ki a Akeletama, ko tona uiga ko te “Laumanafa o te Toto.”

²⁰“Me ne tusi i te tusi o Salamo, ‘Ke fakamalepe tona fale, Ka ke seai foki se tino e nofo i ei.”’ Ne tusi mai foki penei, ‘Ke sui ne se tino tona tofi.’

²¹ “Tela la, ko ma'nako tatou ki se tino ke molimau fakatasi tatou ki te toetu o te Aliki ko Iesu, kae e 'tau eiloa ke fili mai a ia mai tino kola si olo tasi mo tatou i malaga a te Aliki, e kamata mai i te aso ne papatiso ei a ia ne Ioane,[2] ke oko eiloa ki te aso ne avake ei a ia mai ia tatou ki te lagi.”

²³Tela, mafaufau ei latou ki te tokolua konei: ko Iosefa tela e taku ko Pasapa kae e igoa foki ki a Tiasitasi, mo Matatia ei.

²⁴Ne 'talo atu latou penei, “Te Aliki, e iloa ne koe a loto o tino katoa. Fakaasi mai me ko oi se tino o te tokolua konei e tonu mo koe,

²⁵ke sui tulaga ki te galuega fakaapositolo tenei, tela ne tiakina ne Iuta o fano o fai tena loto.”

²⁶Ne fai ne latou te vili mō te tokolua konei, kae ne tu ki a Matatia, tela ne filigina ei a Matatia ke fakatasi mo te tinoagafulu mo te tokotasi apositolo.