Read Te Tusi Tapu I Te Gana Tuvalu Lomiga Lua GALUEGA 10 Bible Online

GALUEGA 10 - Te Tusi Tapu I Te Gana Tuvalu Lomiga Lua bible

GALUEGA 10

¹E isi se tagata e nofo i Kaisaleia e igoa ki a Konelio, kae se takitaki o te kautau Loma, e fakaigoa ki te kau a Italia.

²A ia mo tona kau kaiga, ne tino 'lotu kae ma'taku ki te Atua. E uke ana galuega alofa ne fai mo tino Iutaia, kae 'talo sale eiloa ki te Atua.

³I te itula e tolu i te sua afiafi, ne oko mai ki a ia se fakaasiga, tela ne matea 'lei ei ne ia te agelu a te Atua e vau ki a ia, kae faipati mai ki a ia penei: “Konelio!”

⁴Ne faka'toka atu a ia ki te agelu mo te mataku, ana muna, “Te Aliki, e a, e isi sau fekau?” Ne tali mai te agelu: “Ko talia ne te Atua au tinoga mo au galuega alofa, tena te pogai e masaua ei koe ne te Atua.

⁵Uga atu ne tino ke olo ki Iopa, o aumai ki konei a te tagata e igoa ki a Simona Petelu.

⁶E 'nofo mo te tagata tela e faite mea mai pa'kili o manu e igoa ki a Simona, kae tu pili ki te tai tona fale.”

⁷I te fanoga a te agelu, kalaga atu ei a ia ki ana tavini e tokolua mo te sotia e tokotasi, se tagata lotu.

⁸Ne fakamatala atu ne ia ki a latou a mea katoa, oti, uga atu ei ne ia ke olo ki Iopa.

⁹I te sua aso, ka koi olo atu eiloa latou i te lotou auala. Ko pili atu latou ki te fa'kai, ka ko pili ki te tutonu ne fanake a Petelu ki luga i te tuafale papa, o 'talo i ei.

¹⁰Ko likiliki Petelu, ka ko manako eiloa a ia o kai. Ka koi fakatoka a meakai, ne oko mai te fakaasiga ki a Petelu.

¹¹Ne matea ne ia te lagi e matala, matea ei ne ia a te mea e fanaifo e pela mo se laugatu lasi, e 'sai ona kapa e fa kae tukutuku ifo ki lalo i te lalolagi.

¹²I loto i te mea tena, e tuku i ei a vaega manu vaefa valevale, manu 'tolo mo manu eva.

¹³Ne oko mai te leo ki a ia penei, “Tu ki luga e Petelu. Ta ne koe a mea kona, kae kai ki ei.”

¹⁴Ne tali atu Petelu, “Ikai e te Aliki, i a au nei e seki kai eiloa ki se mea kai lailai io me se meakai se 'ma.”

¹⁵Ne toe oko mai foki a te leo ki a ia i te fakalua penei, “Sa taku fakalailai ne koe a te mea ko oti ne faka'ma ne te Atua.”

¹⁶Ne tupu fakatolu a te mea nei, oti toe avake ei ki te lagi a mea kona.

¹⁷Ka koi 'numi te mafaufau o Petelu me se a te uiga o te fakaasiga ne matea ne ia, kae oko mai eiloa mo tino kola ne uga mai ne Konelio. Ne fesilisili latou me tu i fea a te fale o Simona, ke oko eiloa ki te 'tu atu o latou i te mataloa o te fale o Simona.

¹⁸Ne ka'laga atu latou ki loto, o fesili tonu me ko Simona tela e igoa foki ki a Petelu e nofo i loto.

¹⁹Ka koi mafaufau 'loto a Petelu ki te uiga o te fakaasiga, ne fai atu a te Agaga ki a ia, “Kiloke, e tokotolu[10] a tagata konei e salasala ki a koe.

²⁰Tu ki luga, kae fanaifo o fakafetaui latou. Sa mataku foki o olo mo latou me ne uga mai ne au latou.”

²¹Ne fanaifo a Petelu ki a latou, fai atu ei a ia, “Ko au tenei e 'sala koutou ki ei. Se a te fekau ne o'mai ei koutou?”

²²Ne tali atu latou, “Ko Konelio te takitaki o te tokoselau ne uga mai ne ia matou. A ia se tagata amiotonu tela e tapuaki ki te Atua, kae fakaaloalogina malosi ne tino Iutaia katoa. Ne fakatonu a ia ne se agelu a te Atua, ke ami mai koe ki tona fale, ko te mea ke fakalogologo a ia ki au muna.”

²³Tela, ami ei ne Petelu tagata kona ke ulu atu ki loto i te fale, moe ei i kona i te po. I te taeaoakega, ne olo tasi ei Petelu mo latou. E isi foki ne taina mai Iopa ne olo tasi mo latou.

²⁴Ne taunu a ia ki Kaisaleia i te sua aso, ki te koga tela e faka'tali mai ei a Konelio mo tona kaiga pela foki mo ona taugasoa ki tona oko atu.

²⁵I te uluatuga a Petelu ki loto, fakafetaui ei a ia ne Konelio, kae fakasiga ki lalo i ona vae o ifo atu ki a ia.

²⁶Ka ko Petelu ne fai atu ke tu ki luga, ana muna: “Tu ki luga, i a au se tino ola fua.”

²⁷Ulu tasi atu ei a Petelu mo Konelio ki loto i te fale. E sasale ki loto kae fai'pati. I te la uluga ki loto i te fale, matea ei ne ia me e tokouke a tino e potopoto mai i loto.

²⁸Ne fai atu a Petelu ki a latou, “E iloa katoa ne koutou i te tino Iutaia e fakatapu o fakatasi io me o asiasi ki se tino o fenua fakaatea, ka ko te Atua ko oti ne fakamaina faka'lei ne ia ki a au, me e se 'tau mo au o taku fakase'ma se tino.

²⁹Tela la, i te aumaiga o te otou fekau ke vau au, vau eiloa au mo toku loto fiafia. Tenei la, ko fesili atu au me se a te pogai ne ma'nako ei koutou ke vau au?”

³⁰Muna a Konelio, “Ko tusa mo te tolu o aso ko teka atu nei, ne 'talo au i loto i toku potu i te itula e tolu i te fakaafiafi, [11]kae poi eiloa au i te tagata e malapulapu ona gatu e tu mai i oku mua.

³¹Ana muna ki a au, ‘Konelio, ko oti ne lagona ne te Atua au 'talo, ka ko au galuega alofa e masaua faeloa ne ia.

³²Uga atu se tino ki Iopa, o ami mai ki konei a te tino e igoa ki a Simona Petelu, tela e nofo i te fale o Simona te tino faite mea mai pa'kili o manu, kae e tu pili tona fale ki te tai.’

³³Tena te pogai ne uga atu fakavave ei taku fekau ke vau koe, ka ko oko eiloa i te 'lei, i a koe ko oko mai. Kae nei a matou ko i konei i mua o te Atua, o fakatalitali atu o fakalogologo, ki mea kola ne taku atu ne te Aliki, ke vau koe o taku mai ki a matou.”

³⁴I kona foki eiloa, kamata eiloa o lauga atu a Petelu ki a latou, ana muna: “Se mea tonu i te Atua e se fakailoga tino.

³⁵So se tino o so se fenua e mataku ki te Atua, kae amiotonu foki, e talia faeloa a ia ne te Atua.

³⁶Tena te fekau ne tuku ki tino Isalaelu, ke folafola atu te Tala 'Lei o te filemu e alatu i a Iesu Keliso, tela ko te Aliki o tino katoa.

³⁷E iloa 'lei eiloa ne koutou a mea taua ne 'tupu i Iutaia katoa, kae ne kamata eiloa o folafolagina i Kalilaia, mai tua ifo o te papatisoga ne folafola ne Ioane.

³⁸E iloa foki ne koutou i te tukuatuga ne te Atua ki a Iesu te Nasaleta a te Agaga Tapu mo te mana. Ne fano sale a ia o fai a galuega alofa, kae faka'lei foki a latou kola e pukea ne agaga ma'sei, i te mea ko kau fakatasi a ia mo te Atua.

³⁹A matou ne tino molimau ki mea katoa ne fai ne ia i te fenua ko Iutaia, pela foki i Ielusalema. Ne tamate ne latou a ia i luga i te sataulo.

⁴⁰Ne fakatu ake a ia ne te Atua i te tolu o aso, kae ne fai foki ne ia ke matea.

⁴¹Kae ne seki matea ne tino katoa, ka ko matou fua kola ne filifili ne te Atua ke fai mo tino molimau. Ne 'kai kae inu fakatasi matou, i te otiga ne fakatu ake ne te Atua mai te mate.

⁴²Ne fakatonu foki ne ia a matou ke folafola atu a te tala 'lei ki tino, kae ke molimau tonu foki me i a Iesu ko ia eiloa tena ne tofi ne te Atua, ke fai mo Famasino o tino 'mate mo tino ola.

⁴³Ne fai'pati katoa a pelofeta e uiga ki a ia, me i tino katoa kola e talitonu ki a ia, e maua ne latou te fakamagaloga o olotou agasala, e alatu i te mana o tona igoa.”

⁴⁴Ka koi faipati atu eiloa a Petelu ki a latou, ne fanaifo te Agaga Tapu i luga o tino katoa kola e fakalogologo ki te muna.

⁴⁵Ne ofo a Iutaia talitonu kola ne olo atu mo Petelu ki Iopa, i te Atua ko 'ligi atu foki ne ia tena meaalofa ko te Agaga Tapu ki luga i tino o fenua fakaatea.

⁴⁶I te mea ko lagona atu ne latou me faipati ki 'gana kesekese kae tavae atu foki ki te maluga o te Atua. Ne faipati ake ki luga a Petelu, ana muna:

⁴⁷“A tino konei, ko maua ne latou a te Agaga Tapu, e pela eiloa mo te mauaga ne tatou. E a, e isi se tino e mafai ne ia o taofi latou ke se papatiso?”

⁴⁸Tela, fakatonu atu ei ne ia ke papatiso a tino konei i te igoa o Iesu Keliso. Fakamolemole atu ei a tino kona ke 'nofo ake latou mo ia i ne mo aso.