Read Te Tusi Tapu I Te Gana Tuvalu Lomiga Lua GALUEGA 11 Bible Online

GALUEGA 11 - Te Tusi Tapu I Te Gana Tuvalu Lomiga Lua bible

GALUEGA 11

¹Ne lagona ne apositolo mo taina talitonu i Iutaia, i tino o fenua fakaatea ko oti foki ne maua ne latou a te muna a te Atua.

²I te vauga a Petelu ki Ielusalema, ne kinau atu ki a ia te vaega o Iutaia kola e talia ne latou te pilitome o tino o fenua fakaatea.

³Muna a latou ki a Petelu, “Ne 'nofo tasi koutou mo tino e seki pilitome, kae ne 'kai fakatasi foki koutou.”

⁴Tela, fakamatala faka'lei atu ei ne Petelu ki a latou, e kamata mai i te taimi ne tupu ei a te mea nei, ana muna:

⁵“Au ne 'talo i te fa'kai o Iopa, matea ei ne au a te fakaasiga. Ne matea foki ne au te mea ne fanaifo e foliga pela mo se laugatu lasi e saisai ona kapa e fa, kae ne tukutuku ifo mai te lagi i oku luga.

⁶I taku kiloga faka'lei ki ei, ne matea atu ne au a manu vaefa, manu fe'kai, manu 'tolo mo manu lele.

⁷Lagona ei ne au a te leo e faipati mai penei, ‘Petelu, tu ki luga, ta ne koe a manu kona kae kai ki ei!’

⁸Ne tali atu au ki ei, ‘Ikai e te Aliki, e seai eiloa se meakai lailai io me se meakai se 'ma kai to ki toku gutu.’

⁹Ne toe faipati mai foki a te leo mai te lagi penei, ‘Sa taku fakalailai ne koe a te mea ko oti ne faka'ma ne te Atua.’

¹⁰Ne tuku ifo fakatolu a te mea nei, toe avake ei katoa a mea kona ki te lagi.

¹¹I mo taimi foki eiloa kona, ne oko mai a te tokotolu tagata ki te fale e nofo ei au. Ne uga mai latou mai Kaisaleia ke o'mai o sala au.[12]

¹²Ne fai mai te Agaga ki a au ke mo a au e fakailoga tino, ka ke olo eiloa matou. A taina konei e tokoono ne olo tasi matou ki Kaisaleia, kae ne ulu katoa matou ki te fale o Konelio.

¹³Ne tala mai ne Konelio ki a matou, me ne matea ne ia te agelu e tu i loto i tona fale, kae fai atu ki a ia, ‘Uga atu se tino ki Iopa, o aumai ki konei a te tino e igoa ki a Simona Petelu.

¹⁴Me ka fai atu ne ia a pati ki a koe, kola ka fakaolagina ei koe mo tou kaiga.’

¹⁵Kae i taku kamataga o faipati atu ki a latou, ne fanaifo a te Agaga Tapu ki luga i a latou, e pela foki i te fanaifoga ki a tatou i te kamataga.

¹⁶Tela, masaua ei ne au a muna a te Aliki ne fai: ‘A Ioane e papatiso ki te vai, ka ko koutou ka papatisogina ki te Agaga Tapu.’

¹⁷Se mea e iloa tonu i te Atua ne tuku atu ne ia ki tino o fenua fakaatea kona, a te meaalofa eiloa e tasi tela ne tuku mai foki ne ia ki a tatou, i te talitonuga a tatou ki te Aliki ko Iesu Keliso. Ko oi au ke mafai o taofi ne au a faiga a te Atua?”

¹⁸I te lagonaga ne latou a te mea nei, ne fakagata te lotou faifai muna, kae tavae atu ki te Atua penei, “A te Atua ko oti foki ne tuku atu ne ia ki tino o fenua fakaatea a te salamo, e takitaki ei latou ki te ola.”

¹⁹Ko salalau valevale a tino talitonu i te fakasauaga ne fai, tela ne kamata mai i te tamatega ne tino Iutaia se talitonu a Setefano. Ne salalau atu a tino talitonu konei ki Foinikia, Kupelu mo Anitioka; kae ne seki folafola ne latou te Tala 'Lei ki so se tino, kae na ko tino Iutaia eiloa.

²⁰A nisi tino o latou konei, ne tino mai Kupelu mo Kulene; ne olo ki Anitioka, kamata eiloa o folafola atu ne latou ki tino o fenua fakaatea[13] a te Tala 'Lei e uiga ki te Aliki ko Iesu.

²¹Ko maua ne latou te mana o te Aliki, kae e tokouke foki a tino ko talitonu, kae 'fuli atu ki te Aliki.

²²Ko oko atu a te tala tenei ki te Ekalesia i Ielusalema, tela uga atu ei ne latou a Panapa ki Anitioka.

²³I tena okoga ki Anitioka, matea ei ne ia a te alofa tauanoa o te Atua e galue i loto i a latou. Ko oko eiloa i tona fiafia ki ei, tela fakamalosi atu ei ne ia a latou ke 'piki mau ki te Aliki mo te loto fakamaoni.

²⁴A Panapa se tagata 'lei, kae fonu foki i te Agaga Tapu mo te fakatuanaki. E tokouke foki a tino ko talitonu ki te Aliki e alatu i tena galuega.

²⁵Fakamuli ifo, fano ei Panapa ki Taso o 'sala a Saulo.

²⁶I te mauaga ne ia a Saulo, aumai ei ne ia ki Anitioka. Ne maopoopo sale eiloa a laua mo tino o te Ekalesia katoa i te tausaga katoa. E se gata fua i kona, kae ne akoako foki ki fakapotopotoga a tino e tokouke. Ko Anitioka ne kamata i ei o fakaigoa a soko ki Kelisiano.

²⁷I mo taimi eiloa konei, e isi ne pelofeta ne o'mai mai Ielusalema ki Anitioka.

²⁸E tokotasi mai pelofeta kona e igoa ki a Akapasi. Ne maua ne ia te mana o te Agaga, tu ake ei ki luga o valo atu, me ka isi se oge ka poko i te lalolagi katoa. Ne tupu te oge i aso o te Kaisala ko Kalaotia.

²⁹Tela, mafaufau ei soko me ka fesoasoani malosi latou katoa, ki olotou taina talitonu e 'nofo i Iutaia.

³⁰Ne fai eiloa pena ne latou, kae ne tuku atu olotou tupe ke ave ne Panapa mo Saulo ki toeaina o te Ekalesia i Ielusalema.