Read Te Tusi Tapu I Te Gana Tuvalu Lomiga Lua GALUEGA 13 Bible Online

GALUEGA 13 - Te Tusi Tapu I Te Gana Tuvalu Lomiga Lua bible

GALUEGA 13

¹I loto i te Ekalesia i Anitioka e iai ne pelofeta mo faiakoga: ko Panapa, ko Simeona tela e fakaigoa ko te Tino uli, ko Lukio te tino Kulene, ko Manaena tela ko te tama puke a matua o Helota te tino Pule,[16] mo Saulo.

²Ka koi tapuaki atu latou ki te Aliki kae fakaliki'liki mo tapuakiga, ne fai mai ki a latou a te Agaga Tapu, “Tofi ake mo oku a Panapa mo Saulo, ke fai ne laua a te galuega tela ko oti ne kalagagina ei ne au.”

³Ne fakaliki'liki mo tapuakiga kae 'talo latou, kae fakaeke atu foki olotou lima ki luga i a laua, uga atu ei laua ke olo.

⁴I te ugaatuga tenei a Panapa mo Saulo ne te Agaga Tapu, ne olo atu laua ki Selukeia; mai kona ne ma'laga atu ei laua i te vaka ki Kupelu.

⁵I te la okoatuga ki Salamina, ne folafola atu ne laua a te muna a te Atua i loto i te fale tapuaki o tino Iutaia. Ne fesoasoani ki a laua a Ioane Maleko i te galuega.

⁶Ne ma'laga atu laua i luga i te motu katoa tena ke oko atu ki te sua feitu o te fa'kai ko Pafo. Ne fetaui laua i kona mo te tagata fai vailakau e igoa ki a Pa‐Iesu, se tino Iutaia tela e fakaloiloi ne ia tino i a ia se pelofeta.

⁷A ia se taugasoa o Sekio Paulo te Kovana o te motu tena, se tagata poto foki eiloa. Ne kalagagina ne te Kovana tena a Panapa mo Saulo ke o'mai ki ona mua, me fia fakalogo a ia ki te muna a te Atua.

⁸Ka ko laua ne fakalavelavegina ne te tagata fai vailakau ko Elima, ko te igoa faka Eleni tena o Pa‐Iesu, ne taumafai a ia ke fuli keatea te Kovana mai te fakatuanaki.

⁹Ka ko Saulo tela foki e igoa ki a Paulo, ne fonu a ia i te Agaga Tapu, ka ko se kemo eiloa ona mata ki te tino fai vailakau;

¹⁰kae fai atu, “A koe se tama a te Tiapolo! A koe ko te fili o mea 'lei katoa; ko fonu koe i vaega togafiti ma'sei katoa, e taumafai faeloa koe o 'fuli te muna tonu a te Aliki ki te muna loi!

¹¹Ka oko ifo te lima o te Aliki ki a koe i te taimi nei; ka kivi koe, kae se matea foki ne koe a te mainaga o te la i ne aso.” I te taimi eiloa tena, ko se ile a Elima, kae ne taumafai foki o fanofano sale ke maua ne ia se tino o takitaki a ia.

¹²Tena ne talitonu ei te Kovana i te laveaga ne ia a te mea tena ne tupu; ko oko eiloa i tona ofo i te akoakoga e uiga ki te Aliki.

¹³Ne malaga atu i te vaka a Paulo mo tena potukau mai Pafo ki Peleka i Pafulia; ka ko Ioane Maleko ne tuku ne ia a laua i kona, kae toe foki atu ki Ielusalema.

¹⁴Ne olo atu a laua mai Peleka ki Anitioka i Pisitia. I te Sapati, ne olo laua ki loto i te fale tapuaki kae saga'saga ki lalo.

¹⁵I te otiga ne faitau a muna mai te Tulafono a Mose mo tusi a pelofeta, ne uga mai te fekau mai tino pule o te fale tapuaki e penei: “Omotou taina, kafai e isi ne muna a koulua e fia fai atu o fakamalosi ki te kaulotu, na fai nei.”

¹⁶Tela, tu ake ei Paulo ki luga, kae kamata o fakagasue atu ona lima kae fai atu penei: “A koutou e tino Isalaelu, mo tino kola e ma'taku ki te Atua, faka'logo mai!

¹⁷A te Atua o te fenua tenei ko Isalaelu, ne filifili ne ia a tupuga o tatou, ne fai foki ne ia latou mo fenua taua i te taimi ne 'nofo ei a latou i te fenua ko Aikupito. Ne ave keatea foki a latou mai Aikupito ne te Atua i te malosi o tena mana.

¹⁸E tusa mo te fa sefulu tausaga ne kufaki ei a ia i olotou amio[17] i te koga lavaki.

¹⁹I te otiga ne fakatakavale ne ia a malo e fitu i te fenua o Kanana, ne tuku atu ei ne ia ki tino Isalaelu ke fai a fenua kona mo tofi o latou.

²⁰E tusa mo te 450 tausaga. “Fakamuli ifo,[18] ne tuku atu ne ia ki a latou a famasino ke oko atu ki a Samuelu te pelofeta.

²¹Mai tua ifo foki, ne fakatagi latou ki te Atua ki se tupu mo latou, tuku atu ei ne te Atua ki a latou a Saulo te tama a Kiso, se tagata mai te matakaiga o Peniamina, ke fai mō tupu o latou i tausaga e fa sefulu.

²²I te otiga ne tapale keatea a Saulo mai te tulaga o te tupu, ne fai ne te Atua a Tavita mo tupu o latou. Ko muna la konei a te Atua e uiga ki a ia: ‘Ko oti ne maua ne au a Tavita, ko te tama a Iese, ko te vaega tagata tena e manako au ki ei, tela ka fai ne ia a mea katoa e loto au ki ei.’

²³E tokotasi foki te tino mai mokopuna o Tavita, ko oti ne aumai ne te Atua ki a Isalaelu ke fai mo Fakaola, ko Iesu tena, e pela mo tena folafolaga.

²⁴Ka koi tuai o oko mai a Iesu, ne lauga atu a Ioane ki tino katoa o Isalaelu, ke sala'mo kae ke papatisogina foki latou.

²⁵I te taimi ko fakaotioti ei a te galuega a Ioane, ne fai atu a ia ki tino, ‘Ko oi au i otou manatu? Au nei e se ko te tino tela e fakatalitali koutou ki ei. Kae kiloke! E isi te tino tela ka vau mai oku tua. E se 'tau mo au o 'tala keatea ona taka mai ona vae.’

²⁶“Oku taina ko fanau a Apelaamo, mo tino kola e ma'taku ki te Atua: ne aumai eiloa ki a tatou a te fekau tenei o te fakaolataga!

²⁷A tino kola ne 'nofo i Ielusalema mo olotou pule, ne seki iloa ne latou me ko Iesu te Fakaola; ne seki malamalama foki latou i muna a pelofeta kola e faitau faeloa i Sapati takitasi. Kae ui la i te mea tena, ko fakamaoni ne latou a muna a pelofeta i te fakasalaga ne latou a Iesu.

²⁸E ui foki eiloa ne seki maua ne latou ne molimau e ala ei o fakasala a ia ki te mate, kae ne fakatagi eiloa a latou ki a Pilato ke tamate a ia.

²⁹I te otiga ne fai ne latou a mea katoa kola ne fai mai ei a Tusitusiga Tapu e uiga ki a ia, ne tuku ifo ne latou a ia mai luga i te sataulo kae tuku ki loto i te tanuga.

³⁰Kae ne fakatu ake a ia ne te Atua mai tino 'mate;

³¹e uke foki aso ne lavea ei a ia ne tino kola ne ma'laga mai fakatasi mo ia mai Kalilaia ki Ielusalema. Ko latou kona ko ana molimau ki tino Isalaelu.

³²Ka ko taku atu ne maua i te taimi nei ki a koutou, a te Tala 'Lei tela ne folafola mai ne te Atua ki tupuga o tatou.

³³Ko oti ne fakataunu ne ia a te folafolaga ki a tatou, ko ana fanau i te fakatuakega o Iesu mai te mate. E pela foki mo muna kola e tusi i te lua o Salamo: ‘A koe ko taku Tama, Ko fai au mo ou Tamana i te aso nei.’

³⁴Ka konei a muna a te Atua ne fai mai e uiga ki te fakatuakega o Iesu mai tino 'mate; kae ka se toe foki atu ki te foitino pala: ‘Ka tuku atu ne au ki a koutou te fakamanuiaga tapu mo te tonu Tela ne folafola ne au ki a Tavita.’

³⁵E pela foki eiloa mo ana muna i te sua Salamo, ‘Ke se tuku atu ne koe a tau Tama Tapu ke oko ki tena foitino te pala.’

³⁶Ka ko Tavita ne tavini atu eiloa ki te Atua i aso o tona olaga: ne oko foki ki a ia a te mate, tanu ei i tafa o ona tupuga, ne oko atu foki eiloa ki tona foitino te pala.

³⁷Ka ko ia tela ne fakatu ake ne te Atua mai te mate, e seki oko ki tona foitino te pala.

³⁸Kae ke iloa 'lei ne koutou e oku taina, me ko folafola mai ki a koutou a te fakamagaloga o agasala e alatu i a Iesu.

³⁹Ko ia foki tenei e fakasaoloto ei koutou katoa kola e fakatuanaki, mai mea kola ne se mafai ne te Tulafono a Mose o fakasaoloto a koutou.

⁴⁰Tela la, ke fakaeteete eiloa a koutou; ke mo a ma oko atu ki a koutou a te mea tela ne fai mai ei a pelofeta ki a koutou:[19]

⁴¹ ‘Kiloke, a koutou tino se talitonu! Ofo kae 'mate! Me fai eiloa ne au a te galuega i aso o koutou, Kae se talitonu eiloa koutou ki ei, E tusa foki eiloa me fakamatala atu ne se tino ki a koutou!”’

⁴²I te ologa ki tua a Paulo mo Panapa mai te fale tapuaki, ne fakatagi atu ki a laua a te kaulotu ke toe o'mai i te sua Sapati, o toe fakamatala faka'lei mai a mea kona.

⁴³I te otiga o te lukuga ne fai i te fale tapuaki, ne tau'tali atu i a Paulo mo Panapa a tino Iutaia e tokouke, e pela foki mo tino o fenua fakaatea e tokouke ko 'fuli ki te lotu Iutaia. Ne fai'pati atu a apositolo ki a latou, kae fakamalosi atu foki ke tumau i te alofa tauanoa o te Atua.

⁴⁴I te sua Sapati, ne olo atu a te tokoukega o te fenua o fakalogo'logo ki te muna a te Aliki.

⁴⁵I te laveaga ne tino Iutaia te vaitino, ne 'fonu latou i te loto masei, kae 'teke atu ki muna kola ne faipati mai ne Paulo, kae pati masei atu foki ki a ia.

⁴⁶Ka ko Paulo mo Panapa ne fai'pati atu mo te loto 'toa penei: “Se mea 'tau eiloa ke folafola atu muamua te muna a te Atua ki a koutou, kae ona ko koutou e 'teke ki ei, kae se mafaufau 'lei foki ke maua ne koutou a te ola se gata mai; tela ka tuku ei ne maua a koutou kae olo maua ki tino o fenua fakaatea.

⁴⁷Me tenei te fakatonuga a te Aliki ne tuku mai ki a matou: ‘Ko tofi ne au a koe ke fai mo mainaga o fenua fakaatea, Ke fai foki mo auala o te fakaolataga ki te lalolagi katoa.”’

⁴⁸I te lagonaga ne fenua fakaatea a te mea nei, ne fia'fia latou kae 'viki atu ki te muna a te Aliki; ko latou foki kola ko oti ne filifilia mō te ola se gata mai, ne fai latou mo tino talitonu.

⁴⁹Ne salalau atu te muna a te Aliki ki koga katoa o te fenua tena.

⁵⁰Ka ko tino Iutaia ne fakamakosu ne latou a takitaki o te fa'kai, mo fafine ma'luga o fenua fakaatea kola e tapuaki ki te Atua. Ne kamata foki a latou kona o fakasaua ki a Paulo mo Panapa, kae afuli keatea a laua mai te lotou fenua.

⁵¹Ne tuetue atu ne apositolo kona a pefu mai o la vae ki a latou, kae olo atu laua ki Ikonio.

⁵²Ko 'fonu katoa a soko i Anitioka i te Agaga Tapu mo te fiafia.