Read Te Tusi Tapu I Te Gana Tuvalu Lomiga Lua GALUEGA 15 Bible Online

GALUEGA 15 - Te Tusi Tapu I Te Gana Tuvalu Lomiga Lua bible

GALUEGA 15

¹E isi ne tino ne o'mai mai Iutaia ki Anitioka, kamata ei o akoako atu latou ki te kau taina, olotou muna, “E se mafai o maua ne koutou te ola seiloga ke pilitome muamua koutou e pela mo te Tulafono a Mose.”

²Ne fai se fakakinauga malosi a Paulo mo Panapa mo latou kona, e uiga ki te mataupu tena. Tela, ne iku ake ei ke olo atu a Paulo mo Panapa mo nisi tino i Anitioka ki Ielusalema, o fesili atu ki apositolo mo toeaina e uiga ki te mataupu tenei.

³Ko uga atu nei a latou ne te Ekalesia; kae i te lotou oloatuga, ne afe atu a latou ki Foinikia mo Samalia, taku atu ei ne latou ki ei i tino o fenua fakaatea ko oti ne 'fuli atu ki te Atua, ona ko te tala tena. Ne fia'fia lasi a te kau taina i kona.

⁴I te lotou okoatuga ki Ielusalema, ne tali 'lei a latou ne te Ekalesia, mo apositolo, e pela foki mo toeaina. Ne taku atu ne laua ki a latou a mea e uke ne fai ne te Atua ki a laua.

⁵Ka ko nisi tino talitonu kola e 'kau i te kau a Falesaio, ne 'tu ake ki luga kae fai ake, “E 'tau mo latou o pilitome, kae fai atu foki ki ei ke tausi Tulafono a Mose.”

⁶Ne fono fakatasi apositolo mo toeaina o mafaufau kite mataupu tena.

⁷Ne tai leva eiloa te lotou finauga, tu ake ei Petelu kae fai atu, “Oku taina, e iloa ne koutou i aso mua ne filifili au ne te Atua mai i a koutou ke folafola atu ne au a te Tala 'Lei ki tino o fenua fakaatea, ko te mea ke lagona ne latou kae talitonu ki ei.

⁸Ka ko te Atua tela e iloa ne ia loto o tino, ne fakamaoni ne ia latou i te tukumaiga ki a latou a te Agaga Tapu, e pela eiloa mo te tukumaiga ki a tatou.

⁹E seki fakakesekese ne ia a tatou mo latou, kae ne faka'ma ne ia olotou loto i te fakatuanaki.

¹⁰Tela la, se a te mea ko tofotofo ei ne koutou a te Atua, i te fakaekeatuga ne koutou ki tuauma o tino talitonu a te amoga tela e se mafai ne o'tou tupuga mo tatou o amo?

¹¹E talitonu tatou me e fakaolagina tatou i te alofa tauanoa o te Aliki ko Iesu Keliso, e pela foki eiloa mo latou.”

¹²A tino katoa o te Fono ne 'nofo faka'logo, kae fakalogologo mai ki a Panapa mo Paulo e tala atu ki a latou a fakailoga mo vavega, ne fai ne te Atua ki tino o fenua fakaatea e alatu i a laua.

¹³I te otiga ne fai'pati atu laua, ne faipati ake ei a Iakopo penei: “Oku taina, faka'logo mai!

¹⁴Ko oti ne fakamatala mai ne Simona a te fakaasiga muamua o te alofa o te Atua ki tino o fenua fakaatea, i te filifiliga o nisi tino mai i a latou ke fai katoa mo ona tino tonu.

¹⁵Ko fakamaoni ei foki a muna a pelofeta kola ne tusi mai penei:

¹⁶‘Au e foki atu ma oti atu a te mea nei. Kae ka toe ati ake ne au a te fale o Tavita tela ne maofa; Ka toe fai ne au a mea ne ma'sei i ei Kae toe faka'tu ake.

¹⁷Ko te mea ke 'sala atu ki te Aliki a tino kola koi 'toe, E pela foki mo fenua fakaatea katoa kola e fakaigoa ki toku igoa.

¹⁸Tena te mea ne fai mai ei a te Aliki, tela ne fai ne ia a mea katoa konei ke iloa mai aso mua eiloa.”’

¹⁹Ne fano eiloa te faipatiga a Iakopo, ana muna, “A toku manatu e se 'tau mo tatou o fakalavelave atu ki tino o fenua fakaatea kola ko 'fuli mai ki te Atua.

²⁰Ka ko te mea e 'tau o fai ne tatou, ke tusi atu se tusi ki a latou ke se 'kai ki meakai kola e se 'ma, me ne meakai ne fai mo tupua; ke sa sulaitetapu; ke sa 'kai foki ki manu kola ne 'kumi a ua kae ke se 'kai foki ki toto o manu.

²¹Me i te Tulafono a Mose ko leva eiloa ne faitau sale i loto i fale tapuaki i Sapati takitasi; ke oko foki ki ana muna e folafola atu faeloa i fa'kai takitasi.”

²²Fakamuli ifo, ne iku i apositolo mo toeaina fakatasi mo te Ekalesia, ke filifili ne tagata mai te kaulotu, ke uga atu ki Anitioka fakatasi mo Paulo mo Panapa. Ne filifili ne latou a Iuta tela e igoa ki a Pasapa fakatasi mo Sila, ne tagata e lasi te fakaaloalogina ne te kau taina.

²³Ne ave ne laua a te tusi tenei: “Ko 'alofa atu otou taina ko apositolo mo toeaina, ki te kau taina katoa mai fenua fakaatea kola e 'nofo i Anitioka, mo Sulia, e pela foki mo Kilikia.

²⁴Ko oti ne lagona ne matou me isi ne tino o te motou kaulotu ne olo atu o fakalavelave ki a koutou i olotou muna, tela ne se toka ei otou mafaufau, kae ne seki fakatonu atu ne matou ke fai ne latou pena.

²⁵Tela la, ko oti ne fai te fono a matou, ko loto tasi katoa foki matou ke filifili ne avefekau ke olo atu ki a koutou. Ka olo atu laua fakatasi mo Panapa mo Paulo ko omotou taugasoa pele.

²⁶Ko laua kona ne ofo atu o la ola mo te galuega a te tou Aliki ko Iesu Keliso.

²⁷Tena te mea ko uga atu ei ne matou a Iuta mo Sila, ka taku atu ne laua ki a koutou i a la muna eiloa, e pela eiloa mo mea konei i loto i te tusi nei.

²⁸Me ko kau fakatasi matou mo te Agaga Tapu, ke sa toe fakaeke atu ki a koutou se isi amoga e fakaopoopo ki tulafono konei:

²⁹Mo a ma 'kai koutou ki taulaga ne ofo atu mo tupua; mo a ma 'kai ki te toto; mo a ma kai ki manu ne 'kumi a ua kae se fakasali a te toto, mo a foki ma sulaitetapu koutou. Kafai e se fai ne koutou a mea kona, ka 'lei otou olaga. Ke manuia koutou!”

³⁰Ne uga atu a avefekau ke olo ki Anitioka, ne fakapotopoto ei ne laua i kona a te potukau katoa o tino talitonu, kae tuku atu ne laua ki ei a te tusi.

³¹I te faitauga ne latou a te tusi, ne 'fonu latou i te fiafia ona ko muna fakamalosi i ei.

³²A Iuta mo Sila ne pelofeta. Ne tai leva eiloa te la faipatiga kae fakamalosi atu a loto o te kau taina i muna e uke.

³³Ne 'nofo laua i kona i ne mo aso, uga atu ei a laua mo te filemu ne te kau taina i kona, ke toe 'foki atu ki tino kola ne uga mai ne latou a laua.[20]

³⁴Ka ko Sila, ne iku i tena mafaufau ke nofo a ia i kona.

³⁵Ka ko Paulo mo Panapa ne 'nofo i Anitioka i ne mo aso; ne kau fakatasi laua mo nisi tino i te akoako atu, kae lauga atu a te muna a te Aliki.

³⁶Mai tua ifo, ne fai atu a Paulo ki a Panapa, “Ta olo o toe asi atu ki kaulotu i fa'kai katoa kola ne folafola ne taua ki ei a te muna a te Aliki, ke kilo'kilo foki taua me pefea te tulaga o te lotou galuega.”

³⁷Ne manako a Panapa ke olo tasi latou mo Ioane Maleko;

³⁸kae ne manatu ake a Paulo me e sili ke se olo latou mo ia tela ne tele keatea mai i a laua i Pafulia. Ne seki nofo foki a ia ke oko ki te taimi e oti ei te lotou galuega.

³⁹Ne fakakinau malosi laua i te mea nei, taki olo ei laua. Ne ave ne Panapa a Maleko, malaga atu ei laua ki Kupelu;

⁴⁰ka ko Paulo ne filifili ne ia Sila, olo ei laua; tuku atu ei a ia ne te kau taina ki te tausiga o te alofa tauanoa o te Atua.

⁴¹Ne fanatu a ia ki Sulia mo Kilikia, fakamalosi atu ei ne ia Ekalesia i kona.