Read Te Tusi Tapu I Te Gana Tuvalu Lomiga Lua GALUEGA 17 Bible Online

GALUEGA 17 - Te Tusi Tapu I Te Gana Tuvalu Lomiga Lua bible

GALUEGA 17

¹Ne ui atu laua i loto i Amefipoli mo Apolonia, oko atu ei laua ki Tesalonia, i te koga tela e tu i ei a te fale tapuaki o te kau Iutaia.

²Ulu atu a Paulo ki loto i te fale tapuaki, e pela eiloa mo tena masani, e tolu Sapati ne kinau sale ei latou e uiga ki muna o te Tusi,

³e fakamatala kae fakapatonu atu, me e 'tau eiloa o logo'mae te Keliso kae toetu ake mai te mate. Fai atu ei Paulo ki a latou penei: “A Iesu, tela ne folafola atu ne au ki a koutou, ko te Keliso eiloa tena.”

⁴E isi ne tino o latou ko talitonu, kau atu ei latou ki a Paulo mo Sila; e pela foki te tokoukega o tino Eleni kola e tapuaki ki te Atua, e pela foki mo takitaki fafine e tokouke.

⁵Ka ko tino Iutaia ko loto ma'sei, tela ne 'luku mai ei ne latou a tino ma'sei kola e olo sale i auala, ke kau mo latou, ke fakamakosu ne latou a te fa'kai, kae ualolo atu latou ki te fale o Iasona o 'sala laua ke aumai ki te fenua.

⁶Kae ne seki maua ne latou, toso mai ei ne latou a Iasona mo nisi o te kau taina ki tagata pule o te fa'kai, kae ka'laga penei: “Konei tagata fakatupu fakalavelave i koga katoa, ka ko oko mai foki ki a tatou.

⁷Kae ne tausi katoa latou ne Iasona i tona fale, ne 'teke atu foki latou ki tulafono a Kaisala, kae fai ake olotou pati pela, me isi aka foki se isi tupu, ko Iesu tona igoa.”

⁸I te lagonaga ne tino mo tagata pule o te fa'kai a te mea tenei, ko oko eiloa i te ga'sue o olotou loto, kae ua'te valevale.

⁹Ne fakatonu atu ne tino pule o te fa'kai a Iasona mo nisi tino, ke 'togi atu a te katoaga tonu o te tupe tela e mafai o fakasaoloto ei latou ke olo.

¹⁰I te poifoga ne uga atu ne taina konei a Paulo mo Sila ke olo ki Pelea. I te la okoatuga, ne olo laua ki te fale tapuaki o te kau Iutaia.

¹¹E sili atu a tino i kona i te ala olotou mafaufau, kae talia gofie ne latou a te talaiga i lo tino Tesalonia. Ne sukesuke malosi foki latou ki muna mai te Tusi i aso takitasi, e fakatalitonu ei ne latou me tonu a muna a Paulo.

¹²E tokouke latou ne talitonu; e tokouke foki a fafine ma'luga o Eleni ko talitonu e pela foki mo tagata.

¹³I te lagonaga ne tino Iutaia i Tesalonia i a Paulo ko lauga foki i te muna a te Atua i Pelea, ne o'mai foki latou ki kona o fakamakosu a loto o tino o te fa'kai.

¹⁴A te kau taina konei, ne uga fakavave ne latou a Paulo ke fano ki tai o 'sala sena auala ki Atenai, ka ko Sila mo Timoteo ne 'nofo i Pelea.

¹⁵A te kau kola ne olo mo Paulo, ne olo fakatasi foki eiloa mo ia ki Atenai. Kae ne toe 'foki mai latou ki Pelea, mo te fakatonuga a Paulo ki a Sila mo Timoteo ke vave atu ki a ia.

¹⁶Ka koi fakatali Paulo ki a Sila mo Timoteo i Atenai, ko oko eiloa i te 'mae o tena loto i te lavea atu ne ia te fa'kai ko fonu eiloa i tupua.

¹⁷Tela, fakakinau ei latou mo te kau Iutaia mo tino o fenua fakaatea kola ne tapuaki ki te Atua i loto i te fale tapuaki; e masani sale foki a ia o faipati i loto i malae ki tino kola e fetaui mo ia i aso takitasi.

¹⁸E isi ne faiakoga o te kau Epikulo mo te kau Setoiko ne fakakinau mo ia. Muna nisi tino, “Se a te mea e taumafai ei a te tagata valea mo te fakamatamata tenei o faipati ki ei?” Kae fai ake nisi tino, “E pela me faipati a ia e uiga ki atua fakaatea.” Ne fai olotou muna konei ona ko te lauga atu ne Paulo a Iesu mo tena toetu.[22]

¹⁹Ne puke ne latou a Paulo o avatu ki mua o te Fono o Aleopako, kae fai atu: “E fia iloa ne matou me se a te akoakoga fou tenei e faipati koe ki ei.

²⁰A nisi o mea kola ne lagona ne matou ne faipati ne koe, ko oko eiloa i te fou i te motou fakalogo, kae fia malamalama i a matou me ne a uiga o mea kona.”

²¹Ko se toe iai ne mea e fai ne tino Atenai mo tino fakaalofa kola e 'nofo i ei, na ko te talatala atu mo te fakalogologo ki nisi mea fou.

²²Ne tu Paulo i mua o te Fono o Aleopako, kae fai atu: “Tino Atenai! E matea ne au koutou ko oko eiloa i te fia'fia ki tapuakiga valevale.

²³Au ne fano sale i loto i te fa'kai, kae matea ne au a koga kola e tapuaki sale koutou i ei, ne matea foki ne au te fata faitaulaga mo te muna tenei e tusi i ei, ‘Mō te Atua e se iloa ne matou tona igoa.’ Ko ia tenei e tapuaki koutou ki ei kae se iloa ne koutou tena igoa, kae tenei e fakailoa atu ne au ki a koutou.

²⁴Ko te Atua tela ne fai ne ia a te lalolagi mo mea katoa i ei, ko te Aliki o te lagi mo te lalolagi, kae se nofo i fale tapu ne faite ne tino.

²⁵E se manako a ia o maua mai se mea mai galuega a tino mō ia, me ko ia fua e tuku mai ne ia te ola mo te manava, mo mea katoa eiloa ki tino katoa.

²⁶Mai te tagata e tokotasi, ne faite ei ne te Atua a itukaiga o tino katoa, kae ne fai foki ne ia ke ola latou i luga i te lalolagi katoa. Ko leva foki ne fakatoka ne ia te taimi tonu mo te fakagataga o koga kola e ola ei latou.

²⁷Ne fai ne ia te mea tenei, ko te mea ke 'sala atu latou ki te Atua, i te fakamoemoe ka maua ne latou a ia i te salasala atu ki a ia; ka ko ia foki e se 'mao mai i a tatou takitokotasi.

²⁸Me ‘Ko ia e ola kae gasue'sue ei tatou.’ E pela mo muna a nisi fatupese o koutou, ‘A tatou foki ko tena fanau.’

²⁹Ona ko tatou ko fanau a te Atua, e se 'tau mo tatou o taofi pela i te uiga o te Atua e tusa mo se aulo, io me se siliva, io me se fatu taua. Tela ne fakafoliga ne se tino ki se mea i tena poto mo tena atamai.

³⁰Ne seki saga te Atua ki te toe taimi tela koi va'lea ei a tino, nei ko fakatonu atu ne ia a tino katoa kola e 'nofo i so se koga ke 'fuli keatea mai i olotou auala ma'sei.

³¹I te mea ko oti ne fakamoe ne ia te aso ka fakamasino ei ne ia te lalolagi katoa ki te amiotonu, e alatu i te tino tela ko oti ne filifili ne ia. Ko oti ne fakamaoni ne ia a te mea tenei ki tino katoa, i te toe fakatumaiga o te tino tenei mai te mate.”

³²I te lagonaga ne latou a Paulo e faipati ki te toetu mai te mate, e isi ne tino ne fakatauemu ki a ia, ka ko nisi tino ne fai ake penei, “A matou e fia faka'logo ke toe faipati mai koe ki te mataupu tenei.”

³³Oti ake, fano ei Paulo keatea mai te fono.

³⁴E isi ne tino ne olo tasi mo ia ko talitonu; a nisi i a latou kona ko Taionusio, se tino o te Fono o Aleopako, mo te fafine e igoa ki a Tamali, mo nisi tino ake foki.