Read Te Tusi Tapu I Te Gana Tuvalu Lomiga Lua GALUEGA 19 Bible Online

GALUEGA 19 - Te Tusi Tapu I Te Gana Tuvalu Lomiga Lua bible

GALUEGA 19

¹Ka koi nofo Apolo i Kolinito, ka ko Paulo ne malaga i loto i fenua ki uta, oko atu ei ki Efeso, maua ei ne ia i kona nisi soko,

²kae fai atu ki a latou, “Kai maua eiloa ne koutou a te Agaga Tapu, mai i te taimi ne talitonu ei koutou?” Ne tali mai latou, “E seki lagona eiloa ne matou me isi se Agaga Tapu.”

³Muna a Paulo, “Ko 'lei la, se a te vaega papatisoga ne papatiso ei koutou” Ne tali mai latou, “Ko te papatisoga a Ioane.”

⁴Muna a Paulo: “A te papatisoga a Ioane ne fai mo tino kola ko salamo ki olotou agasala, kae ne fai atu foki a ia ki tino Isalaelu ke 'tau mo latou o talitonu ki te tagata tela e vau mai i ona tua, ko Iesu tena.”

⁵I te lagonaga ne latou a te mea tenei, ne papatisogina katoa latou i te igoa o te Aliki ko Iesu.

⁶Ne fakaeke atu ne Paulo ona lima ki luga i a latou, fano ifo ei a te Agaga Tapu ki luga i a latou; fai'pati ei latou ki 'gana kesekese, kae 'valo foki fakapelofeta.

⁷Kāti e tinoagafulu mo te tokolua te aofaki o latou katoa.

⁸Ne fano Paulo ki loto i te fale tapuaki, kae tusa mo te tolu masina ne faipati atu ei a ia mo te loto malosi ki tino. Ne fakakinau mo latou, kae ne taumafai atu foki a ia ke 'fuli mai latou ki te Malo o te Atua.

⁹E isi ne tino o latou ko oko eiloa i te loto make'ke kae se fia talitonu, kae fai muna se 'tau foki i mua o tino e tokouke, e uiga ki te Ala Tonu o te Aliki. Tela, tuku ei latou ne Paulo kae olo mo tena kau soko; kae i aso katoa [24]e mafaufau kae fai'pati ki olotou mataupu, i loto i te fale akoga o Tulano.

¹⁰Ne galue'lue eiloa latou penei e tusa mo te lua tausaga, tela la, a tino Iutaia mo tino o fenua fakaatea kola ne 'nofo i Asia, ne lagona katoa ne latou te muna tonu a te Aliki.

¹¹Ne fai ne te Atua vavega e alatu i a Paulo.

¹²E oko foki eiloa ki solosolo mo laugatu talipefu kola ne fakaaoga ne ia, ne ave ki tino ma'saki, kae ne 'lei ei olotou masaki, mo agaga ma'sei foki ko olo keatea mai i a latou.

¹³E isi ne tino Iutaia e olo sale, o taumafai o afuli agaga ma'sei i te igoa o te Aliki ko Iesu. Ne fai atu ki agaga ma'sei, “Au e fakatonu atu ki a koutou i te igoa o Iesu, tela e talai sale ne Paulo.”

¹⁴A te tokofitu tamaliki tagata a te faitaulaga pule o Iutaia e igoa ki a Sikeva, ne fai ne latou a te mea tena.

¹⁵Ne fai atu te agaga masei ki a latou, “E iloa ne au a Iesu, e iloa foki ne au a Paulo; ka ko oi la koutou na?”

¹⁶A te tagata pukea, ne tafuke atu o taua ki a latou, malo ei a ia i a latou; tela, 'tele fua'fua ei latou ki tua mai te fale, kae pakia'kia valevale.

¹⁷Ko 'logo Iutaia mo tino o fenua fakaatea kola ne 'nofo i Efeso i te tala tenei; ko oko eiloa i te ma'taku, ka ko tavaegina foki a te igoa o te Aliki ko Iesu mo te fakaaloalo lasi.

¹⁸E tokouke foki a tino ko talitonu ne o'mai o takutonu mai, kae fakaasi mai foki olotou mea ma'sei ne fai.

¹⁹E tokouke foki o te kau fai vailakau ne o'mai mo olotou tusi, o 'luku fakatasi kae ne 'sunu i mua o tino katoa. Ne fakaopoopo ake ne latou a 'togi o tusi katoa kona, kae tusa mo te lima sefulu afe tupe siliva.[25]

²⁰Tela la, a te muna a te Aliki[26] ko salalau atu kae ola malosi ake.

²¹I te otiga o mea kona ne 'tupu, ko fatuaki ake te loto o Paulo[27] ke malaga atu au i loto i Maketonia mo Akaia ke oko atu ki Ielusalema. Mai i tua o taku okooga ki kona, ana muna “e tau foki mo au o oko ki Loma.”

²²Tela, uga atu ei ne ia a Timoteo mo Elasitasi ki Maketonia, ko ona fesoasoani kona e tokolua; i a ia koi nofo mua ke tai leva ake i Asia.

²³I aso kona, e isi se matuā fakalavelave ne tupu ona ko Ala Tonu o te Aliki.

²⁴E isi se tagata e igoa ki a Temetiu, se tagata faite mea ki siliva, e faite foki ne ia a ata o te fale tapu o te atua fafine ko Atemisi ki siliva, ka ko oko foki eiloa i te aoga o tena pisinisi ki ana tino faigaluega.

²⁵Ne 'luku ne ia latou katoa, fakatasi mo nisi tino kola e ga'lue i te vaega galuega tena, kae fai atu ki a latou: “Oku tagata, e iloa ne koutou i te otou maumea e maua i te galuega tenei.

²⁶E mafai ne koutou o lavea kae lagona foki, a mea konei e fai ne te tagata tenei ko Paulo. Ana muna i atua kola e faite ne tagata, e se ne atua tonu. Ko oko eiloa i te manuia o tena galuega ki te 'fuliga o te tokoukega o tino konei i Efeso, ka ko tai soko foki eiloa Asia.

²⁷Ka isi nei se fakalavelave ka tupu, ka taku maseigina a te igoa o te tou pisinisi. Kae se tena fua, e isi ake foki te sua fakalavelave, ko te fale tapu o te atua fafine sili ko Atemisi, ka iku eiloa ki te seai, mo tena takutakua foki ka se aoga. Me ko ia tena ko te atua fafine tela ne tapuaki ki ei a tino katoa i Asia mo te lalolagi katoa.”

²⁸Ko oko eiloa i te ita o te vaitino i te lagonaga ne latou a pati konei, paka'laga ei latou, “E sili eiloa a Atemisi o Efeso!”

²⁹A te ua'te tenei ne salalau i te fa'kai katoa, tela, 'tele mai ei a tino katoa o puke a Kaio mo Alitako, me ne tagata Maketonia kola ne faimalaga fakatasi mai mo Paulo; ta'fuke atu ei latou o ave a laua ki te fale fai tafaoga.

³⁰A Paulo ne manako ke mua atu a ia i te vaitino, ka ko tino talitonu ko se mafai ne latou o tuku atu ke fano.

³¹E isi ne tino pule ne taugasoa o ia, ne avatu te lotou fekau kae fakatagi atu ki a Paulo ke se fanatu ki te fale fai tafaoga.

³²I mo taimi foki eiloa kona, a te fono tena ko fakatau ka'laga valevale fua, nisi e ka'laga ki te isi mea, ka ko nisi e ka'laga ki te sua mea, me i nisi tino e se iloa ne latou a te mea ne 'luku mai ei latou.

³³A nisi tino ne 'ti ne latou ki a Alesana, me ko ia ne pogai ei te fakalavelave tenei, tela fakatu atu ei a ia ne tino Iutaia ki mua. Ka ko Alesana ne fakatu atu tona lima, i a ia e fia fai atu sena pati ki a latou ke sao a ia.

³⁴Ka ko te iloa-akega ne latou i a ia se Iutaia, ne toe ka'laga katoa ei latou e tusa mo te lua itula e penei: “E sili atu eiloa Atemisi o Efeso!”

³⁵Fakamuli ifo, ne mafai ne te failautusi o te fa'kai o fakafilemu te fakalavelave tela ne tupu. Ne fai atu, “A koutou tino Efeso, e iloa katoa ne koutou takitokotasi, a te fa'kai o Efeso ko te fa'kai e tausi ne ia a te fale tapu o Atemisi takutakua, mo te fatu tapu tela ne to ifo mai te lagi.

³⁶E seai eiloa se tino e mafai ne ia o 'teke atu ki mea konei. Tela la, ko 'tau mo koutou o 'nofo filemu kae mo a ma fakatupu fakalavelave.

³⁷Ko oti ne aumai ne koutou a tino konei, e se ne tino 'fao mea i loto i fale tapu, e se ne tino foki e muna masei ki te tou atua fafine.

³⁸Kafai a Temetiu mo tena kau faigaluega e fakatu se lotou tagi ki se tino, e isi eiloa aso e masani o fai ei a fono, kae isi foki eiloa a tino pule o fono kona; tela la, ko mafai ei o fakatau 'moli te sua tino ne te sua tino ki te fono.

³⁹Kae kafai koi isi foki se mea e ma'nako koutou ki ei, 'kave la ki te fono faka te fenua, ke fakatoka i ei.

⁴⁰A tatou nei, ko maua ne te fakalavelave i te aso nei, ona ko te mea tenei ne tupu; ko seai eiloa se fakamasakoga e 'sao ei tatou mai te fakalavelave tenei.”

⁴¹I te otiga ne faipati atu ne ia a mea konei, fakaoti ei ne ia te fono.