Read Te Tusi Tapu I Te Gana Tuvalu Lomiga Lua GALUEGA 2 Bible Online

GALUEGA 2 - Te Tusi Tapu I Te Gana Tuvalu Lomiga Lua bible

GALUEGA 2

¹Ne maopoopo katoa ki te koga e tasi a tino talitonu, i te okoga ki te Aso Penitekoso.

²I mo taimi foki eiloa kona, ne lagona ne latou te 'gulu mai luga i te lagi e pela eiloa mo se afā ko agi, tofu katoa ei te fale i te laumatagi tena.

³Tela, lavea ei ne latou a ulaga afi e foliga mai e pela mo ne alelo e patele mai ki a latou takitokotasi.

⁴Ko 'fonu latou katoa i te Agaga Tapu, kamata eiloa latou o fai'pati ki 'gana valevale, i te mea ko tuku atu ne te Agaga Tapu ki a latou te 'mana o fai'pati ki 'gana valevale.

⁵E isi ne Iutaia e 'nofo i Ielusalema, pela foki mo tino lotu ne o'mai i fenua katoa o te lalolagi.

⁶I te lagonaga ne latou te 'gulu, maopoopo tasi katoa ei latou, kae poko mo te manavase ia latou, i te mea ko lagona ne latou apositolo ko taki faipati eiloa a te tino ki tena 'gana.

⁷Ne ofo kae 'poi, fai ake ei olotou pati penei, “E se ne tino Kalilaia katoa konei e fai'pati?

⁸Kae ne mafai pefea o faipati te tino ki tena 'gana tonu, e pela mo te mea ne lagona ne tatou?

⁹A tatou ne tino mai Patia, Metai, Elama, Mesopotamia, Iutaia, Kapatokia, Pono, Asia,

¹⁰Felukia, Pafulia, Aikupito mo nisi kogā fenua o Lipua e pili ki Kulene, e pela foki mo nisi ne o'mai mai Loma,

¹¹ne Iutaia mo tino ko 'fuli ki te lotu Iutaia, ne Keleta mo Alapi. Ne mafai ne latou o fai'pati ki o'tou 'gana takitokotasi, ki galuega fakaofoofogina a te Atua.”

¹²I te ofo mo te 'segi, ne fakatau fesilisili ei latou ia latou eiloa takitokotasi penei, “Se a te uiga o te mea tenei?”

¹³Ne tali fakatauemu nisi tino, olotou muna, “E ko'na tino konei!”

¹⁴Ne tu ake Petelu fakatasi mo te tinoagafulu mo te tokotasi apositolo, faipati ei a ia mo te leo maluga ki tino, ana muna: “Oku taina Iutaia, pela foki mo tino Iutaia katoa kola e 'nofo i Ielusalema, faka'logo mai ki aku muna ka fai atu.

¹⁵A tino konei e se ko'na e pela mo otou manatu, i te mea e se masani o ko'na a tino i te taeao;

¹⁶ka ko te pogai ne tupu ei te mea nei, e fakamatala mai i te tusi a te Pelofeta ko Ioelu, ana muna:

¹⁷ ‘Muna a te Atua, tenei taku mea ka fai i aso fakaoti; Ka 'ligi atu ne au toku Agaga ki luga i tino katoa; Ka 'valo fakapelofeta otou tama tagata mo tama fafine Ka matea foki ne otou tamatane a fakaasiga, Ka ko otou toeaina ka moe'miti.

¹⁸E oko foki ki aku tavini tagata mo tavini fafine, Ka tuku atu ne au a toku Agaga ki a latou i aso kona, Ko te mea ke mafai ne latou o 'valo fakapelofeta.

¹⁹Ka fai foki ne au a vavega i luga i te lagi, Pela foki mo fakailoga i lalo i te lalolagi: Ko te toto, te afi mo te ausaga matolutolu.

²⁰Ka pouli te la, Ka ko te masina ka kula e pela mo se toto, Ka koi tuai o oko mai a te Aso e oko mai ei te Aliki.

²¹Tela la, so se tino e kalaga atu ki te igoa o te Aliki, Ka fakaolagina eiloa a ia.’

²²“Tino Isalaelu, faka'logo mai ki a au! A Iesu te Nasaleta, se tagata tela ko oti ne matea 'lei ne koutou ana galuega 'mana faka te Atua i ana vavega, mea fakaofoofogina, mo fakailoga kola ne fai ne te Atua e alatu i a ia.

²³Ko leva ne fuafuagina ne te Atua i tona loto mo tona poto, me i a Iesu e tuku atu ki otou lima; kae tamate ne koutou a ia, i te talia ne koutou a tino agasala ke fakasataulo ne latou a ia.

²⁴Ne fakatu a ia ne te Atua mai te mate. Ne fakasaoloto foki a ia ne te Atua mai te puapuaga o te mate, me se mafai lele eiloa ne te mate o pikifao a ia.

²⁵Ne faipati foki a Tavita e uiga ki a ia, ana muna: ‘Ne matea ne au a te Aliki i oku mua i taimi katoa, Me nofo mai eiloa i toku feitu taua ko te feitu fakaatamai, ko te mea ke se mataku au.

²⁶Tenei te pogai ko fiafia ei toku loto. Aku pati foki ko 'fonu i te fakafiafia loto; E pena foki toku foitino, ka nofo mo te fakamoemoe,

²⁷I te mea e se tuku tiaki ne koe a toku agaga ke fano ki Seoli, Ke sa tuku atu foki ne koe a tau Tama Tapu ke oko ki tena foitino te pala.

²⁸Ko oti ne fakailoa mai ne koe ala o te ola; Ka fakafonu foki ne koe au ki te fiafia i tou fakatasi mai.’

²⁹“Taina, e 'tau mo au o faipati tonu atu e uiga mo te tou tupuga ko Tavita: ne mate, ne tanu, kae tenei eiloa e i a tatou tona tanuga ke oko mai eiloa ki te aso nei.

³⁰A ia foki se pelofeta, kae ne iloa foki ne ia i te Atua ne tauto fakamaoni atu ki a ia, me ka fai ne ia se tokotasi o ona mokopuna ke sui tulaga ki tena nofogaaliki.

³¹Ne matea ne Tavita a te mea ka fai ne te Atua, tela faipati ei a ia e uiga mo te toetu o te Keliso, ana muna: ‘Ne seki tuku tiakina a ia i Seoli, Ne seki oko foki te pala ki tena foitino.’

³²Ko oti ne fakatu ne te Atua a Iesu mai te mate, kae molimau matou katoa ki te mea nei.

³³Tela la, i te otiga ne avake a ia ki te lima fakaatamai o te Atua, maua ei ne ia mai te Atua a te Agaga Tapu tela ne folafola ne tona Tamana. E penei mo te mea ko matea kae lagona ne koutou, ko tena meaalofa tena ko tuku mai ki luga i a tatou katoa.

³⁴Ne seki fano Tavita ki te lagi, ka ko te mea ne fai mai penei ana muna: ‘Ne fai mai te Aliki ki toku Aliki: Nofo i konei i toku feitu taua ko toku fakaatamai,

³⁵Ke oko ki te taimi e fai ei ne au ou fili, Mo mea e tuku ei ou vae.’

³⁶“E 'tau i tino Isalaelu katoa o iloa tonu ne latou me ko Iesu eiloa tenei, tela ko oti ne fakasataulo ne koutou, tela ne fai ne te Atua mo Aliki mo Keliso foki.”

³⁷I te lagonaga ne tino a te mea nei, ko oko foki eiloa i te lagona ki olotou loto, tela fai atu ei latou ki a Petelu mo nisi apositolo, “Taina, se a te motou mea ka fai?”

³⁸Muna a Petelu ki a latou: “Sala'mo katoa koutou ki otou agasala, kae ke papatisogina foki koutou i te igoa o Iesu Keliso, ko te mea ke fakamagalogina otou agasala; ke maua foki ne koutou te meaalofa a te Atua ko te Agaga Tapu.

³⁹A te folafolaga a te Atua ne fai ki a koutou mo otou fanau, pela foki mo latou kola e 'nofo i nisi fenua, ko latou kola ko kalagagina ne te Aliki te tou Atua.”

⁴⁰Ne fakamolemole atu Petelu ki a latou, kae fai atu ana isi pati fakamalosi, ana muna: “Taumafai ke 'sao koutou mai te fakasalaga ka oko mai ki te kautama masei tenei!”

⁴¹A te tokoukega o latou ne talitonu ki tena lauga, tela papatiso ei latou; kaati e tusa mo te tolu afe a tino ne fakaopoopo ki te lotou aofaki i te aso tena.

⁴²Ne fakaaoga ne latou olotou taimi o tauloto mai i apositolo, o fesoasoani foki ki a latou ki feitu ki te lotou tausiga, o kau fakatasi foki i te feitu ki te tofitofiga o falaoa i te kaiga a te Aliki, pela foki mo te fai tinoga.

⁴³Ne ofo kae ma'taku a tino katoa, i te uke o vavega mo fakailoga ne fai ne te kau apositolo.

⁴⁴Ne maopoopo fakatasi a tino talitonu katoa, kae tuku fakatasi olotou mea katoa,

⁴⁵ne fakatau atu katoa olotou mea, vaevae ei olotou tupe i a latou eiloa, e pela eiloa mo te mea e manako ki ei te tino.

⁴⁶E potopoto sāle eiloa i te Fale Tapu, kae 'kai fakatasi eiloa i olotou fale i te loto fiafia mo te loto malalo,

⁴⁷kae fai vikiga foki ki te Atua. Se gata foki i kona kae fakatau fia'fia foki i te a'lofa atu o tino ki a latou. Tela la, e fakaopoopo faeloa ne te Aliki ki te lotou potukau ne tino 'fou kola ko fakaolagina.