Read Te Tusi Tapu I Te Gana Tuvalu Lomiga Lua GALUEGA 20 Bible Online

GALUEGA 20 - Te Tusi Tapu I Te Gana Tuvalu Lomiga Lua bible

GALUEGA 20

¹I te 'nogaifoga o te fakalavelave tena, ne 'luku ne Paulo a te kau talitonu katoa, kae fakamalosi atu latou ne ia. Ne fakatofa atu foki ki ei, fano ei ki Maketonia.

²Ne fanatu a ia i loto i fenua kona, kae fakamalosi atu ki tino i te muna tonu, oko atu ei a ia ki Eleni.

³Ne nofo a ia i kona i masina e tolu. Ne fakatokatoka a ia o fano ki Sulia, kae iloa ake ne ia i tino Iutaia ko fonofono ke ta a ia; tela, mafaufau ei a ia o toe foki atu o ui i loto i Maketonia.

⁴A Sopata ko te tama tagata a Pilasi mai Pelea. Ne olo mo ia, pela foki mo Alitako mo Sekuno mai Tesalonia, Kaio mai Teipe, Timoteo, Tukasi mo Tofimo mai Asia.

⁵Ne mua atu latou o faka'tali mai ki a matou i Teloa.

⁶Ne ma'laga mai matou mai Filipi, i te otiga o te 'Kaiga o Falaoa se Faka'fete. I te lima o aso mai tua ifo, oko atu ei matou ki a latou i Teloa, 'nofo ei matou i kona i aso e fitu.

⁷I te Aso Tapu,[28] ne maopoopo matou o fai te motou 'kaiga masani ko te tofitofiga o te falaoa. Ne faipati atu a Paulo ki a latou mo te mafaufau i a ia e faimalaga i te aso a taeao tela, aveaveloa ei tena lauga ke oko ki te valuapo.

⁸E uke foki eiloa a moli i potu o te fale aluga tela e fono ei matou.

⁹E isi se tamataene e igoa ki a Eutikasi, e nofo i te fakamalama. Ona ko te loa o te lauga a Paulo, ne gasolo ei o fia moe, ke oko eiloa ki te to o tena moe. Ne tō ifo ei a ia mai te tolu o fogafale ki lalo i te one. Ne puke ake ne latou a ia ko mate.

¹⁰Ne fanaifo a Paulo ki lalo, kae punou ifo mai luga i a ia o 'sai mai ne ia, kae fai atu ki tino, “Sa fanoa'noa me ola fua a ia.”

¹¹Fakamuli ifo, fanake ei a ia ki luga, tofitofi te falaoa kae kai. Ne fai'pati mo latou ke oko eiloa ki te saega o te la, fano ei Paulo.

¹²Ne ave ne latou a te tamataene ki tena fale me ko ola, ka ko oko eiloa i te fiafia.

¹³Ne mua atu matou i te vaka o olo ki Aso, ko te koga tela e puke ifo ei ne matou a Paulo ki tai, me ne fai mai tena fakatonuga ki a matou ke olo atu ki kona, i a ia e fano i uta.

¹⁴I te fetauiga a matou mo Paulo i Asosi, ne puke ifo ne matou ki tai i te vaka, fano ei matou ki Metulene.

¹⁵Ne malaga mai matou mai kona, oko atu ei ki Kiosa i te sua aso. I te sua aso mai tua ifo, oko atu ei matou ki Samosi, kae toe taeao ake oko atu ei matou ki Mileto.

¹⁶Ko loto Paulo ke fano loa te lotou malaga e fakasili i Efeso, ke mo a mana toe maumau ne taimi i Asia. Ko oko eiloa i tena fakava'vave ke na oko a ia ki Ielusalema, i te Aso Penitekoso.

¹⁷Ne avatu a te fekau a Paulo mai Mileto ki Efeso, o fakamolemole atu ki toeaina katoa o te Ekalesia ke o'mai ki a ia.

¹⁸I te okomaiga a latou, fai atu ei a ia penei: “Ko iloa ne koutou me ne leva te 'tou 'nofoga i taku fatoa okomaiga ki Asia.

¹⁹I te agaga o te loto malalo mo loimata ma'ligi, ne fai eiloa taku galuega, i a au se tavini a te Aliki, i aso o te faigata kola ne oko mai ki a au ona ko pulepulega masei a te kau Iutaia.

²⁰E iloa ne koutou me ko oti ne taku atu ne au ki a koutou, a mea katoa kola e 'tau o fesoasoani atu au ki a koutou; i aku lauga mo aku akoakoga ne fai atu ki a koutou i otou lukuga, pela foki mo otou fale.

²¹E pena foki eiloa aku polopolokiga ne fai ki tino Iutaia mo tino o fenua fakaatea, ko te mea ke salamo ki olotou agasala, kae 'fuli atu ki te Atua, ka ke talitonu foki latou ki te tou Aliki ko Iesu.

²²Kae nei, ko fakalogo au ki te Agaga Tapu, ke fano au ki Ielusalema, kae e se iloa ne au me ne a mea ka oko mai ki a au i kona.

²³Ko iloa ne au i te Agaga Tapu ko oti ne fai mai i fa'kai katoa ne oko au ki ei, i te fale puipui mo fakalavelave e faka'tali mai eiloa ki a au.

²⁴E iloa ne au i toku ola e se aoga ki a au, me e 'tau eiloa ke fakapalele faka'lei te galuega ne tuku mai ne te Aliki ko Iesu ke fai ne au, ko te fakailoa atu ki tino katoa a te Tala 'Lei o te alofa tauanoa o te Atua.

²⁵“Ko oti au ne oko atu ki a koutou katoa, o folafola atu te Malo o te Atua. Kae iloa ne au ka se toe isi se tino i a koutou e toe matea ne ia a au.

²⁶E taku tonu atu ne au mo te fakamaoni ki a koutou i te aso nei: Au e 'ma i te toto o so se tino o koutou.

²⁷Me e seai eiloa se mea e tasi o fuafuaga a te Atua e seki taku atu ne au ki a koutou.

²⁸Ke tausi koutou ne koutou eiloa, ke tausi foki ne koutou a te lafu tela ne tuku atu ne te Agaga Tapu ke onoono faka'lei koutou ki ei. Ne fakatu ne ia ke fai foki koutou mo tausi mamoe ki te Ekalesia a te Atua,[29] tela ne fai ne ia e alatu i te toto o tena tama tonu.[30]

²⁹I toku iloa, kafai e teka au keatea mo koutou, e uke a luko ka o'mai o fakatasi mo koutou. Kae ka 'fulu faka'ma ne latou a te lafu.

³⁰Ka oko mai foki a te taimi tela ka isi ne tino mai i a koutou ka faipati ki te muna loi, o takitaki a tino talitonu ke tau'tali i a latou.

³¹Tela la, ke matapula'pula koutou, kae masaua foki me ne akoako ne au koutou mo loimata i tausaga e tolu, i te ao mo te po.

³²“Kae nei, ko tuku atu ne au koutou ki te tausiga a te Atua mo te muna o tena alofa tauanoa; ko ia foki e mafai ne ia o putiputi ake koutou, kae avatu foki ne ia ki a koutou a fakamanuiaga kola e tausi ne ia mo ona tino.

³³Au foki e se manako ki ne siliva me ne aulo, me ne gatu mai so se tino.

³⁴E iloa 'lei eiloa ne koutou i oku lima konei, ko oti ne galue o fakatoka a mea katoa kola e manako au ki ei pela foki oku taugasoa.

³⁵Ko oti ne fakaasi atu ne au ki a koutou auala katoa, me ko te ga'lue malosi o tatou ki auala konei, ko 'tau ei mo tatou o fesoasoani ki tino vaivai. Kae ke masaua foki ne koutou a te muna a te Aliki ko Iesu ne fai, ‘E sili atu te manuia o te tino tela e tuku atu fua ana mea i lo o te tino tela e talia ne ia.”’

³⁶I te otiga o pati a Paulo, totuli ifo ei a ia ki lalo mo latou katoa, o 'talo.

³⁷Ne 'sai atu latou ki a Paulo kae 'tagi, kae sogi fakamavae atu ki a ia.

³⁸Ko oko eiloa i te lotou fanoa'noa i pati a Paulo kola ne fai atu ki a latou, me ka se toe matea eiloa ne latou a ia. Tela, olo atu ei latou o tuku atu ki tai i te vaka.