Read Te Tusi Tapu I Te Gana Tuvalu Lomiga Lua GALUEGA 21 Bible Online

GALUEGA 21 - Te Tusi Tapu I Te Gana Tuvalu Lomiga Lua bible

GALUEGA 21

¹Ne fakamāvae matou mo latou, olo ei matou. Tele ei te motou vaka, fano tonu atu eiloa ki te fenua e igoa ki a Ko. Taeao ake, ko oko atu matou ki Lotesi, kae mai Lotesi fano ei matou ki Patala.

²Ne maua atu ne matou i kona a te vaka ka fano ki Foinikia, tela, 'sopo ei matou ki luga, ko te mea eiloa ko fano te vaka.

³I te motou okoatuga ki te kogatai tela ne lavea 'lei ei ne matou a Kupelu, i te feitu fakamaui, fakatafatafa ei te motou vaka i te feitu ki saute o fano ki Sulia. Ne olo ake matou ki uta i Tulo, me laku i kona tena uta.

⁴Ne maua ne matou i kona a nisi tino talitonu, kae ne 'nofo matou i ei e tusa mo se vaiaso e tasi. Ona ko te mana o te Agaga Tapu, tela, fai atu ei latou ki a Paulo ke sa fano ki Ielusalema.

⁵I te palelega omotou aso i kona, tuku ei ne matou te koga tena kae fano te motou malaga. Olo tasi ei matou mo latou, mo olotou avaga pela foki mo tamaliki, ke oko eiloa ki tua o te fa'kai. Ne totuli katoa matou i te tafatai kae 'talo.

⁶Fakamavae ake matou ki a latou, 'sopo ei matou ki luga i te vaka, kae 'foki ei latou ki olotou fale.

⁷I te motou malaga mai Tulo, ne oko atu matou ki Tolumai, fetaui ei matou mo taina talitonu i kona. Ne 'nofo matou i kona i te aso e tasi.

⁸I te taeaoakega, ne tuku ne matou a Tolumai, kae oko atu matou ki Kaisaleia. Ne 'nofo matou i te fale o Filipo te tino talai te tala 'lei; ko ia te sua tino o te tokofitu kola ne filifilia i Ielusalema.

⁹E tokofa ana tama fafine e seki a'vaga, kola e talai foki ne latou te muna a te Atua i kona.

¹⁰Ne 'nofo matou i kona i ne mo aso, kae oko mai te pelofeta mai Iutaia e igoa ki a Akapasi.

¹¹Ne vau ki a matou, puke ei ne ia te fusi o Paulo, kae saisai eiloa ne ia ona lima mo ona vae ki ei; kae muna atu penei: “Tenei te mea ne fai mai ei a te Agaga Tapu; a te tino e o ia te fusi tenei, ka saisai penei ne tino Iutaia i Ielusalema, kae ka tuku atu ki tino o fenua fakaatea.”

¹²I te lagonaga ne matou a pati konei, ne fakamolemole atu matou pela foki mo tino o te fenua ki a Paulo, ke se fano ki Ielusalema.

¹³Kae tali mai Paulo, “Ai a e fai ei koutou pena? O 'tagi mai penei ke fakavaivai ei toku loto? Au ko toka, e se na ko te saisai fua kae ke mate foki i Ielusalema, ona ko te Aliki ko Iesu.”

¹⁴Ne seki mafai ne matou o 'fuli ona manatu. Tela, oti ei te motou taumafai atu, kae muna atu penei: “Ke fai la te loto o te Aliki.”

¹⁵I te otiga ne 'nofo matou i kona i ne mo aso, fakatokatoka ei omotou mea o olo ki Ielusalema.

¹⁶E isi ne soko mai Kaisaleia ne olo tasi matou, o 'kave matou ki te fale o te tagata tela ka 'nofo matou i ei,[31] ko Masoni mai Kupelu; se tino talitonu mai mua eiloa.

¹⁷I te motou okoga ki Ielusalema, ne talia matou ne latou mo te fiafia.

¹⁸Taeao ake, olo ei matou mo Paulo o asi atu ki a Iakopo; kae ne 'nofo mai foki i ei a toeaina katoa o te Ekalesia.

¹⁹Ne fakatalofa Paulo mo latou, kae ne tala atu ne ia a te tala katoatoa, o mea katoa ne fai ne te Atua i fenua fakaatea e alatu i tena galuega.

²⁰I te otiga ne fakalogo'logo latou ki ana tala, 'viki ei ki te Atua. Fai atu ei latou ki a Paulo: “Taina, tena eiloa e lavea ne koe. E tokouke tino Iutaia ko fai mo tino talitonu, ka ko oko eiloa i te lotou tausi fakamaoni ki Tulafono a Mose.

²¹Ko oti ne fakailoa atu ki ei me ne akoako ne koe tino Iutaia katoa kola e 'nofo i fenua fakaatea, ke tiakina te Tulafono a Mose, ke se pelitomegina foki olotou tamaliki, io me tau'tali atu i tu faka-Iutaia.

²²Nei, ko lagona tonu ne latou i a koe ko oko mai. Se a la te mea ka fai nei?

²³Kiloke, fai te mea e fai atu ei matou ki a koe. E tokofa tagata i konei, ko oti ne tauto.

²⁴Fano ke olo tasi koutou ki te lotu o te faka'maga, kae 'togi tupe atu a mea ne fakamaumau ki ei, ko te mea ke mafai ne latou o kati faka'kila olotou ulu.[32] E fakamaonia ei me se tonu a tala kola e uiga ki a koe, ko iloa ei ne latou i a koe e tausi eiloa ki Tulafono a Mose.

²⁵Ka ko fenua fakaatea kola ko fakatuanaki, ko oti ne tusi matou ki ei, me ko tonu i a matou, e se 'tau latou o 'kai ki mea e fai mo taulaga ki tupua, mo te toto, mo manu e 'kumi a ua kae se fakasali te toto, se gata i ei ka ke 'mao foki latou mo amioga ma'sei.”

²⁶Tela, ave ei ne Paulo a tagata konei i te taeaoakega, fai ei ne ia te lotu o te faka'maga. Fano ei Paulo ki te Fale Tapu o faka'pula atu a te aso e oti ei te lotu o te faka'maga, ko te taimi foki tena e fai ei olotou taulaga takitokotasi.

²⁷Ko tai palele aso e fitu ne faka'pula atu, ka ko lavea atu ne nisi Iutaia mai Asia a Paulo i te Fale Tapu. Ne fakaoso ne latou te vaitino katoa, kae puke ne latou Paulo.

²⁸Ne paka'laga latou, “Tino Isalaelu, fesoasoani mai! Tenei te tagata e fakaakoako ne ia tino katoa ke 'teke atu ki tino Isalaelu, ki Tulafono a Mose, mo te Fale Tapu foki tenei. E se gata i ei, kae tenei foki ko faulu mai ne ia nisi tino o fenua fakaatea ki te Fale Tapu, o fakamasei a te koga tapu tenei!”

²⁹Ne fai ne latou a pati konei, me ne matea ne latou a Tofimo te Efeso, mo Paulo i te fa'kai. Ne mafaufau ake latou pela, me kati ne ave a ia ne Paulo ki loto i te Fale Tapu.

³⁰A te fa'kai ko ua'te valevale, 'tele tasi atu ei a tino o puke a Paulo o soso mai ki tua mai te Fale Tapu. Ko te taimi tonu foki eiloa tena ne 'pono katoa ei a mataloa o te Fale Tapu.

³¹Ko taumafai latou o tamate a Paulo, i te taimi ne logo ei te pule o te kautau a Loma, i a Ielusalema katoa eiloa ko ua'te valevale.

³²I te taimi eiloa tena, ne 'tele atu a te pule mo nisi ofisa mo sotia ki te mumuga tino. I te mateaga ne tino a te pule mo sotia, taofi ei te tāga o Paulo.

³³Ne fanatu tonu eiloa a te pule ki a Paulo, puke fakapagota kae fakatonu atu ke pikifao ki te ava filifili, ana muna: “Ko oi te tagata tenei, kae ne a foki ana mea ne fai?”

³⁴Ne ka'laga valevale fua mai a nisi mai te mumuga tino ki te mea tenei. Ona ko te 'numi valevale o mea i te taimi tena; ko se iloa ei ne te pule a te mea tonu ne tupu. Fakatonu atu ne te pule ana tagata ke ave Paulo ki loto i te olo.

³⁵I te okoga eiloa ki te kakega, amo ei ne sotia a Paulo, i te mea ko to malosi te ita o tino.

³⁶Ne tau'tali mai i ona tua a te vaitino, kae ka'laga eiloa ki luga, “Tamate!”

³⁷I te taimi tela ka avatu ei ne latou a Paulo ki loto i te olo, ne faipati atu a Paulo ki te pule penei: “Fakamolemole, e mafai o faipati atu au ki a koe?” Kae fesili atu te pule: “E iloa ne koe o faipati faka‐Eleni?

³⁸E se ko koe te Aikupito tela ne fakatupu fakalavelave i aso kola, kae takitaki ne koe a sotia e fa afe ki te vao?”

³⁹Ne tali mai Paulo, “Au se Iutaia, ne fanau i Taso i Kilikia. Se tino o te fa'kai takutakua. Fakamolemole, tuku mai au ke faipati ki tino.”

⁴⁰Ne talia ne te pule, tela tu ake ei Paulo ki luga i te kakega, kae fakatu atu tona lima ki tino. Filemu ei latou, tela faipati atu ei Paulo ki a latou faka‐Epelu, ana muna: