Read Te Tusi Tapu I Te Gana Tuvalu Lomiga Lua GALUEGA 26 Bible Online

GALUEGA 26 - Te Tusi Tapu I Te Gana Tuvalu Lomiga Lua bible

GALUEGA 26

¹Ne fai atu Akelipa ki a Paulo, “Ko saoloto nei koe o fai au fakasako.” Fola atu ei te lima o Paulo kae fai ana fakasako penei:

²“Te Tupu ko Akelipa, au e manuia, me ko tu atu au i ou mua i te aso nei, o fai aku fakasako e tusa mo mau a tino Iutaia,

³i a koe ko masani 'lei eiloa i tu mo fakakinauga faka-Iutaia; tela la, ko fakamolemole atu au ke fakalogologo mai koe mo te kufaki.

⁴“E iloa ne tino Iutaia katoa a toku olaga mai taku folikiga. E iloa foki ne latou mai te kamataga, me i toku olaga katoa, au ne ola ake eiloa i toku fenua tonu, pela foki i Ielusalema.

⁵E iloa faeloa ne latou, manafai e loto latou o fakatalitonu, me mai te kamataga, au ne ola i te olaga saisaitia o te kau Falesaio, i te lotu Iutaia.

⁶Kae nei, ko tu atu nei au ke fakamasino ne koe i ou mua, i te mea i a au e talitonu ki te folafolaga tela ne fai ne te Atua ki o'tou tupuga;

⁷ko te folafolaga tela e fakamoemoe ki ei a matakaiga o Isalaelu e sefulu lua ke maua, i te lotou tapuaki fakamaoni ki te Atua i te ao mo te po. Ona ko te fakamoemoega tenei e tou 'Malu, ko 'moli ei au ne tino Iutaia ke fakasala!

⁸Ai a e faigata ei i a koutou Iutaia o talitonu, i te Atua e fakatu ne ia a tino 'mate?

⁹“Au ne mafaufau o fai so se mea e 'teke ki te igoa o Iesu te Nasaleta.

¹⁰Tena te pogai ne fai ei ne au a mea kona i Ielusalema. Ne maua ne au te fakatonuga mai faitaulaga sili, ke puke fakapagota ne au a tino o te Atua ki loto i fale puipui; kae i te lotou fakasalaga ki te mate, ne sisi foki toku lima ke fakasala pena.

¹¹E uke foki a taimi ne fakasala ei ne au latou i fale tapuaki katoa, kae ne taumafai foki au ke faifai muna ki te lotou talitonuga. Ko oko eiloa i toku saua ki a latou, tela, fano eiloa au ki fa'kai o fenua fakaatea o fakasaua ki a latou.”

¹²“Tenei eiloa a te pogai ne fano ei au ki Tamaseko, i te pule mo te fakatonuga a faitaulaga sili.

¹³Tou 'Malu, ko te tutonu ne matea ei ne au a te mainaga mai te lagi i te auala tenei, e maina fakapukupuku i a au, mo taku kau malaga. A te mainaga tenei, ko sili atu i te 'pula o te la.

¹⁴Ne 'siga katoa matou ki lalo, lagona ei ne au a te leo e faipati mai ki a au i te 'gana Epelu penei, ‘Saulo, Saulo! Ai a e fakasaua mai ei koe ki a au? Se mea faka'mae foitino te aka ki mea makai'kai.’

¹⁵Ne muna atu au, ‘Ko oi koe e te Aliki?’ Ne tali mai te Aliki: ‘Ko au ko Iesu, tela e fakasaua ne koe.

¹⁶Tu nei ki luga, me ko oti ne fakaasi atu au ki a koe, ke tofi koe ke fai mo aku tavini; ke fakaasi atu ne koe ki nisi tino i te mateaaga ne koe au[33] i te aso nei, mo mea ka fakaasi atu ne au i aso konei mai mua.

¹⁷Ka fakasao foki ne au koe mai tino Isalaelu, pela foki mo tino o fenua fakaatea kola ka uga atu ei koe ne au ki a latou.

¹⁸Ke faka'pula ne koe olotou mata, kae 'fuli foki ne koe mai te pouliga ki te mainaga, pela foki mai te malosi o Satani ki te Atua, ko te mea ke fakamagalogina olotou agasala e alatu i te lotou fakatuanaki mai ki a au, ka ke maua foki te lotou nofoaga fakatasi mo tino filifilia a te Atua.”

¹⁹“Tela la e te Tupu ko Akelipa, e seki fakaseaoga ne au a te fakaasiga ne maua ne au mai te lagi.

²⁰Ne kamata eiloa taku talaiga i Tamaseko, soko atu ki ei ko Ielusalema, pela foki i Iutaia katoa mo fenua fakaatea. Ne lauga atu au ki a latou, ko te mea ke salamo ki olotou agasala, kae ke 'fuli atu ki te Atua; ka ke fai foki ne latou a faiga kola e fakaasi mai me ko oti ne salamo latou.

²¹Tenei eiloa a te pogai ne puke mai ei a tino Iutaia ki a au i loto i te Fale Tapu, kae taumafai o tamate au.

²²A te Atua ko oti ne fesoasoani mai ki a au, ke oko mai eiloa ki te aso nei; tenei ko tu atu ei au i konei o fai atu taku molimau ki a koutou katoa, ki tino ma'lalo, pela foki ki tino ma'luga. Ko te mea tenei ne faipati atu ne au, ko te mea eiloa e tasi tela ne fai'pati ki ei a pelofeta mo Mose, me ka oko mai:

²³i te Keliso e 'tau o puapuagatia, ka ko ia foki eiloa a te tino muamua ka tu ake mai te mate, o folafola atu a te mainaga o te fakaolataga ki tino Iutaia, pela foki ki tino o fenua fakaatea.”

²⁴Ka koi fai eiloa fakamatalaga a Paulo, pakalaga malosi atu ei a Feso ki a ia, “Paulo, a koe ko fakavalevale! A tou sukesuke malosi ki tusi, ko fai ne ia ke fakavalevale koe!”

²⁵Ne tali mai Paulo: “Tou 'Malu, au se fakavalevale! A muna konei e faipati ne au, ne muna tonu ki eiloa.

²⁶Te Tupu ko Akelipa! E mafai ne au o faipati atu mo te loto toa ki a koe, i te mea e iloa katoa ne koe a mea konei. E iloa tonu ne au, me iloa katoa ne koe a mea katoa konei, me e seki 'tupu a mea nei ke 'funa ki se tulimanu.

²⁷Te Tupu ko Akelipa, e talitonu koe ki pelofeta? E iloa ne au me i a koe e talitonu ki ei!”

²⁸Muna a Akelipa ki a Paulo, “I tou taofi, e mafai ne koe o fai au mo Kelisiano i se taimi toetoe penei?”

²⁹Ne tali mai Paulo, “E tusa fua me loa me toetoe te taimi, au e 'talo ki te Atua mo koe, pela foki mo koutou katoa konei e fakalogo'logo mai ki a au i te aso nei, ke fai penei mo au, kae e se aofia i ei oku saisaiga konei!”

³⁰Tu ake ei ki luga a te tupu, te Kovana, Pelenike mo tino katoa,

³¹kae i te lotou ologa, fai ake ei olotou pati i a latou eiloa, “E seai eiloa se mea ne fai ne te tagata nei, ko 'tau ei o fakasala a ia ki te mate io me pei ki te fale puipui.”

³²Ne fai atu Akelipa ki a Feso, “Ne 'tau eiloa o fakasaoloto a ia nei, moi fai ne seki tagi ki te Kaisala.”