Read Te Tusi Tapu I Te Gana Tuvalu Lomiga Lua GALUEGA 27 Bible Online

GALUEGA 27 - Te Tusi Tapu I Te Gana Tuvalu Lomiga Lua bible

GALUEGA 27

¹I te taimi ne tonu i ei me e 'tau mo matou o olo ki Italia, tuku atu ei ne latou Paulo mo nisi pagota ki lima o Iulio, se ofisa i te kautau a Loma tela e taku “Ko te kautau a te Kaisala.”

²Ne 'sopo matou ki luga i te vaka mai Atamutiu, tela ko toka o malaga atu ki taulaga o Asia, malaga atu ei matou. A Alitako te Maketonia mai Tesalonia, ne olo tasi foki matou.

³Ne oko matou ki Saitonu i te taeaoakega. Ne atafai Paulo ne Iulio, tela talia ei ne ia ke fano o fakatalofa ki ona takaga, ke maua ne ia a mea kola e manako a ia ki ei.

⁴Teka atu ei te motou vaka mai kona, kae ona ko te 'pono o te matagi, tele fakatafatafa atu ei te motou vaka i te feitu o Kupelu tela e u i te matagi.

⁵Ne folau atu te motou vaka i te kogatai o Kilikia mo Pafulia, oko atu ei matou ki Mula i Lukia.

⁶Ne maua ne te ofisa i kona a te vaka Alesania e fano ki Italia, faka'sopo ei ne ia matou ki ei.

⁷Ne teletele malie atu eiloa te motou vaka i ne mo aso. Ona ko te 'pono o te matagi, afe ei matou ki te fa'kai ko Nitoi. Ko se mafai eiloa ne matou o folau tonu ona ko te matagi, folau tonu atu ei te motou vaka ki te feitu o Keleta tela e u i te matagi, i tafa o te mataosoga ko Salamone.

⁸Ne tele fakapilipili eiloa te motou vaka i uta, kae ona ko te faigata o te matagi, oko atu ei matou ki te taulaga e 'lei i te tau, tela e igoa ki te Taulaga Malu, kae se 'mao mai te fa'kai ko Lasea.

⁹Ne leva eiloa te motou 'nofoga i kona, ke oko eiloa ki te taimi ko se mafai eiloa o toe fano te malaga, me ko siliga aso ne fai ei a talosaga fakalikiliki mō tapuakiga ke maua se 'lei,[34] kae tenei e mautakitaki eiloa a te kaumatagi. Tela, fai atu ei a muna fesoasoani a Paulo:

¹⁰“Oku tagata, ko matea atu nei ne au me ka penei eiloa te tou faigamalaga; ka lasi te fakamaseiga o kako, ki te vaka pela foki mo te ola o tino.”

¹¹Ka ko te pule o te kautau, e fakalogo eiloa ki te muna a te kapeni mo te tino e o ia te vaka, kae se fia saga eiloa ki muna a Paulo ne fai atu.

¹²A te koga tela e tau ei a te vaka, e se se koga e 'lei mo aso o te tau 'moko; tela la, a te tokoukega o latou ko loto ke na fano te vaka, ke taumafai ke oko atu latou ki Foinia, manafai e mafai. Se taulaga e tasi i Keleta, tela e tu fakasaga ki saute o fano ki te togala, matu o fano ki te togala, ko te mea ke 'nofo i ei latou i kona i aso o te tau 'moko.[35]

¹³Ko kamata o agiagi malie mai te matagi mai saute, tela mafaufau ake ei latou kona, me ko mafai ne latou o fakataunu te lotou fuafuaga. Ne sisi ake te taula, teletele atu eiloa te vaka i gatai o Keleta.

¹⁴E se leva foki, kae agi mo te afā, tela e fakaigoa ki te “Tokelau,” e agi tonu mai eiloa mai i te fenua.

¹⁵Ne fepaki ki te vaka, ka ko se mafai eiloa o fano tonu te vaka ki luga o te matagi, palele ei te motou taumafai atu, tela fakatapea ei te vaka, ko tuku eiloa ki te ave a te matagi.

¹⁶Ne tai tapu malie matou, i te motou telega i te feitu ki saute o te tama motu e igoa ki a Kauta. Ne mafai eiloa ne matou i konei o ivi ake te poti, e tiga eiloa i te faigata, kae ne to ake eiloa ki luga.

¹⁷Ne 'futi ake ne latou, saisai mau ei ne latou ki lopu ki luga i te vaka. Ne ma'taku latou i a matou ma kasa i kauone e ave sale ne te au i te teatea o Lipua, tela, tuku ifo ei ne latou te la, kae tuku te vaka ke ave ne te matagi.

¹⁸E se matuku eiloa a te agi o te matagi, tela la, i te taeaoakega, laku ei ne latou ki te tai a kako o te vaka.

¹⁹Kae i te sua aso mai tua ifo, ne puke olotou lima ki mea faigaluega o te vaka, kae laku foki ne latou ki te tai.

²⁰Ko se matea ne matou a te la io me se fetu i aso e uke, ka ko te matagi e mautakitaki eiloa tona agi malosi. Ko palele atu foki te motou fakamoemoega ki te ola.

²¹Ko leva foki aso e seki 'kai eiloa a tino, tela tu ake ei Paulo i olotou mua, kae fai atu: “Oku tagata, ne 'tau eiloa i a koutou o faka'logo mai ki a au, ke se teka mai tatou mo Keleta; penei e seai se mea e fakamasei io me maumau.

²²Kae nei, ko fakamolemole atu au ki a koutou, ke loto ma'losi! E seai eiloa se tino o tatou e mate; ko te vakamutu fua ka malepe.

²³I te mea ne oko mai ki a au i te po a te agelu a te Atua, tela e o ia a au, ko ia foki tela e tapuaki au ki ei,

²⁴ana muna, ‘Paulo, sa mataku! E 'tau mo koe o tu i mua o te Kaisala; kae kiloke, ko tuku atu ne te Atua ki ou lima a ola o tino katoa kola e faimalaga koutou.’

²⁵Tela la e oku tagata, ke loto ma'losi koutou! Me i a au e fakatuanaki ki te Atua, me e ola eiloa tatou, e pela eiloa mo te mea ko oti ne taku mai ki a au.

²⁶Ka ko te mea, a tatou nei ka ake ki uta i se fenua.”

²⁷Ko te sefulu fa tenei o po, ka koi kini eiloa matou ne te matagi, tela, tapeapea eiloa matou i te matagi i te Tai Metitilani. Kati ko te valuapo, ne tukutaumate ne te kauvaka me ko pilipili latou ki se fenua.

²⁸Pei ifo ne latou te leti, iloa ake ei ne latou me tusa mo te selau lua sefulu futu a te 'poko o te koga tena. Se leva foki, toe pei ifo te leti, iloa ake me ko fuaiva futu te 'poko.

²⁹Ne ma'taku latou i te mea ma kasa te motou vaka, tela pei ifo ei ne latou i te mulivaka a taula e fa, olioli ei latou ke na ao.

³⁰Ne taumafai te kauvaka ke 'tele keatea latou mai te vaka; tuku ifo ei ne latou te poti, ke fai ake pela i a latou e olo o pei ifo a taula i te taumua.

³¹Ne fai atu Paulo ki te ofisa mo sotia, “Kafai e se 'nofo a kauvaka konei i luga i te vaka, e se mafai o ola koutou.”

³²Tela, kati ei ne sotia a lopu e 'sai ei te poti, ke tapea.

³³Ko pili o ao, fakamolemole atu ei Paulo ki a latou ke tapa ake olotou alo, tela, fai atu ei a ia penei, “Ko oti ne 'nofo fakatalitali koutou i te sefulu fa aso, kae e seki 'kai eiloa koutou.

³⁴Tela la, ko fakamolemole atu au ke 'kai ake koutou, ko te mea ke ma'losi koutou. E seai eiloa se laulu otou ulu e to.”

³⁵I te otiga o ana muna konei, puke ei a Paulo ki mo falaoa, kae siki tena fakafetai ki te Atua i mua o latou katoa. Ne tofitofi ne ia, kamata eiloa o kai ki ei.

³⁶Tela, pela ake eiloa olotou loto, saga atu ei o 'kai.

³⁷E tusa mo te 276 te aofaki katoa o matou i luga i te vaka.[36]

³⁸I te otiga katoa o tino ne 'kai, fakamāmā ei ne latou te vaka, i te lakuga o saito ki te tai.

³⁹I te aoakega, ko se iloa 'lei ne kauvaka me ko oi te fenua tena, kae matea atu fua ne latou a te maofega o te fenua mo tena kauone, tela, tonu ake ei i a latou me kafai e mafai, ko te mea eiloa ko fakakasa ne latou a te vaka i kona.

⁴⁰Kati ei ne latou a taula o tiaki. Se gata fua i kona, ne 'tala foki ne latou a lopu e saisai ei a foe uliuli. Ne sisi ake ne latou a te la i te taumua, ko te mea ke agi ne te matagi a te vaka ki mua, ke tele atu ki uta i te tafatai.

⁴¹Ne tele tonu atu te vakamutu ki te tafua'aga, kasa eiloa i ei. Ko mautakitaki eiloa te taumua, ko se mafai eiloa o to keatea, ka ko te mulivaka ko malepelepe ne tuki ne galu.

⁴²Ko fai a te fuafuaga a sotia ke tamate a pagota, ko te mea ke seai se tino o latou e 'kau ki uta kae tele.

⁴³Ka ko te pule o te kau sotia, ne manako ke fakasao Paulo; tela taofi ei ne ia a latou ke mo a e fai ne latou a te mea nei. Ne fakatonu atu a te pule o te kau sotia ki tino katoa kola e maua ne latou o 'kau, ko latou kona ka muamua o le'le ki te tai o 'kau ki uta.

⁴⁴Ka ko latou kola e 'toe ke tau'tali atu ki uta i lagai, io me ko so se mea o te vaka. E tena eiloa a te faifaiga ne 'sao 'lei ei a matou katoa ki uta.