Read Te Tusi Tapu I Te Gana Tuvalu Lomiga Lua GALUEGA 5 Bible Online

GALUEGA 5 - Te Tusi Tapu I Te Gana Tuvalu Lomiga Lua bible

GALUEGA 5

¹E isi se tagata e igoa ki a Anania, ka ko Safaila te igoa o tena avaga. Ne 'togi atu ne Anania te la potu manafa,

²ne 'funa ne ia te sua vaega o te tupe, kae iloa 'lei eiloa ne tena avaga, kae tuku atu te toega ki apositolo.

³Muna a Petelu, “Anania, ai a ko tuku atu ei tou loto ke pule ne Satani, o fakaloiloi ne koe te Agaga Tapu, kae taofi ne koe te sua vaega o te tupe ne maua i te 'togiatuga o tou manafa?

⁴Ka koi tuai o 'togi atu ne koe a tou manafa, e o koe eiloa te manafa. I te otiga foki ne 'togi atu ne koe, e a koe foki eiloa a tupe ne maua mai i ei. Se a tau fakatau ne fai ei ne koe a te mea nei? E seki loi koe ki tino, ka ko loi koe ki te Atua!”

⁵I te taimi ne lagona ei ne Anania te pati tenei, ne siga ki lalo, mate eiloa. Ko oko eiloa i te ma'taku o latou katoa kola ne 'logo i te tala tenei.

⁶Ne ulu mai a tamatane ki loto i te fale, teu ei ne latou a tona foitino, ave ei ki tua o tanu.

⁷Kāti e tolu itula mai tua ifo i te tupuga o te mea nei, kae oko mai Safaila ki te fale, kae se iloa ne ia a te mea ko oti ne tupu.

⁸Muna a Petelu ki a ia, “Taku mai ki a au me tenei eiloa te aofaki o te tupe katoa ne maua ne koulua mo tau avaga, i te otiga ne 'togi atu te olua manafa?” Muna a Safaila, “E tonu, tena eiloa.”

⁹Muna a Petelu ki a ia, “Ai a ne loto ma'lie ei koulua o tofotofo ki te Agaga o te Aliki? Fakalogo mai, a tamatane kola ne tanu ne latou a tau avaga, konei e 'tu mai i te mataloa, ka ave foki ne latou a koe ki tua.”

¹⁰I kona foki eiloa, siga ki lalo, ko te mea eiloa ko mate. Ne ulu mai a tamatane ki loto, matea ei ne latou a ia ko mate; tela ave ei ne latou a ia ki tua o tanu i tafa o tena avaga.

¹¹Ko oko eiloa i te ma'taku o tino o te Ekalesia, pela foki mo tino katoa ne lagona ne latou a te tala tenei.

¹²E uke a vavega mo mea fakaofoofogina ne fai ne apositolo ki tino. Ne maopoopo katoa a tino talitonu i te Fale fakaoso o Solomona.

¹³E ui eiloa i te tavaegina o latou ne tino, kae e seai eiloa se tino mai tua e fia kau atu ki a latou,

¹⁴ka ko gasolo eiloa o tokouke a tino e fakaopoopo atu ki a latou, ne tagata mo fafine kola ko talitonu ki te Aliki.

¹⁵Ona ko te 'lei o galuega a te kau apositolo, ne aumai ei ne latou a tino ma'saki, kae fakata'kato i luga i moega mo lopa, ko te mea ke pa'tele fua a nisi o latou ki te ata o Petelu, manafai e sasale ake i olotou tafa.

¹⁶Ko ualolo mai a tino mai fa'kai pili ki Ielusalema; ko aumai ne latou a tino ma'saki mo tino ne pukea ne agaga ma'sei, kae ne ma'losi katoa latou.

¹⁷Ka ko te Faitaulaga Pule mo tino katoa kola e 'kau fakatasi mo ia, ko te vaega tena o Satukaio. Ne 'tu ake latou ki luga mo te loto masei ki apositolo,

¹⁸o puke fakapagota ne latou apositolo, kae pei ki loto i te falepuipui.

¹⁹Kae i te po eiloa tena, ne 'tala ne te agelu a te Aliki a te falepuipui, takitaki ei ne ia ki tua apositolo, kae fai atu ki a latou,

²⁰“Olo o 'tu i te Fale Tapu, kae taku atu ki tino e uiga ki te ola fou tenei.”

²¹Ne talia ne apositolo te fakatonuga tena, kae i te vaveao, ulu atu ei latou ki loto i te Fale Tapu, kamata eiloa o akoako atu. Ne fakatonu ne te Faitaulaga Pule mo tena kau pulepule ke maopoopo te Fono Maluga mo te fono a toeaina Isalaelu; avatu ei foki mo te lotou fakatonuga ki te falepuipui ke aumai apositolo ki mua o te Fono Maluga.

²²I te okoatuga o leoleo ki te falepuipui, matea ake ei ne latou me 'galo. 'Foki ei o taku atu ki te Fono Maluga,

²³olotou muna, “Ne maua atu ne matou te falepuipui e 'pono mau eiloa, mo leoleo foki e 'tu i mataloa, kae i te motou 'talaga i mataloa, e seai eiloa se tino i loto.”

²⁴I te lagonaga ne te takitaki o leoleo o te Fale Tapu mo faitaulaga sili a te tala tenei, ne ofo latou me se a te mea ne tupu ki apositolo.

²⁵E isi se tino ne ulu mai ki loto i te Fono, kae fai atu ki a latou, “A tino kola ne 'pei ne koutou ki te fale puipui, kola e 'tu i loto i te Fale Tapu, e akoako ki tino!”

²⁶Tela, olo ei a te takitaki mo tena kau sotia o puke mai apositolo ki te Fono. E seki puke malo ne latou apositolo, me ma'taku ma peipei latou ne tino.

²⁷Ne takitaki mai ne latou a te kau apositolo ki loto kae faka'tu i mua o te Fono Maluga; fesili atu ei te Faitaulaga Pule ki a latou,

²⁸ana muna, “Ne fakatonu malosi ne matou a koutou ke se toe akoako atu ne koutou a te igoa o Iesu,” ana muna, kae “kiloke ki te mea ne fai ne koutou! Ko oti ne fakasalalau atu ne koutou te otou talaiga i Ielusalema katoa, kae mana'ko foki koutou o 'ti ki a matou me ne tamate ne matou a ia!”

²⁹Ne tali atu a Petelu mo nisi apositolo, olotou muna, “E 'tau mo matou o faka'logo ki te Atua i lo te fakalogo ki tino.

³⁰A te Atua o'tou tupuga, ko oti ne fakatu ake ne ia a Iesu mai te mate, i te otiga ne fakasataulo ne koutou.

³¹Kae ne avake ne te Atua ke nofo i tena feitu taua ko te feitu fakaatamai, ke fai mo Takitaki mo Fakaola, o tuku atu foki ki tino Isalaelu a te avanoa ke salamo latou ki olotou agasala, ka ke fakamagalo foki olotou agasala.

³²A matou ne tino molimau ki mea konei. E pena foki te Agaga Tapu, tela ko te meaalofa a te Atua ki a latou kola e faka'logo ki a ia, e molimau foki ki mea konei.”

³³I te lagonaga ne tino o te Fono olotou pati konei, ko oko eiloa i te lotou kaitaua, mafaufau ei latou o tamate apositolo.

³⁴E tokotasi o te kau Fono se Falesaio e igoa ki a Kamalielu, se faiakoga o te Tulafono, kae fakaaloalogina ne tino katoa. Ne tu ake i mua o te Fono Maluga, kae fai atu ke tuku atu latou konei ke olo ki tua mai te Fono mo se taimi toetoe.

³⁵Ana muna ki tino o te Fono, “Tagata Isalaelu, ke fakaeteete koutou ki otou mea ka fai ki tagata konei.

³⁶I lua aso ne teka atu nei, ne sae ake te tino e igoa ki a Tiutasi, kae fai mai tena muna i a ia se tino sili. Kāti e tusa mo te fa selau tino ne tau'tali i a ia. Ne tamate a ia, maofa valevale ei tena kau, oti atu foki eiloa i kona mo tena potukau.

³⁷Fakamuli ifo, ne sae ake a Iuta te Kalilaia i vaitaimi tonu eiloa o te lauga o tino; e tokouke foki a tino ne tau'tali i a ia, kae ne tamate foki a ia, mafuta valevale ei katoa ona taugasoa.

³⁸Tela la, au e fai atu ki a koutou, ke faka'mao otou lima mai tagata konei, kae tuku malie eiloa latou, me kafai te lotou fuafuaga mo te lotou galuega ne mea ne fai ne se tino, e fakamalepegina;

³⁹kae kafai ne fai ne te Atua, e se taitai lele eiloa o mafai ne koutou o fakatakavale. Kafai e fai ne koutou, ka iloa fakamuli ake ei ne koutou, ia koutou e fakasaga tau ki te Atua.” Ne talia ne te Fono te manatu o Kamalielu.

⁴⁰Ne toe ami atu ki apositolo ke o'mai ki loto. Ne 'kini ne latou, kae fakatonu atu ke se toe fai'pati eiloa ki te igoa o Iesu. Oti, fakasaoloto atu ei ke olo.

⁴¹Ne olo keatea mai te Fono Maluga mo te fiafia lasi, me ko taku'leia latou ne te Atua ona ko te fakamaseigina mō te igoa o Iesu.

⁴²Kae i aso katoa, e se mafai eiloa o gata te lotou akoako atu kae lauga atu ki tino e uiga ki a Iesu te Keliso, i loto i te Fale Tapu io me i loto i fale o tino.