Read Te Tusi Tapu I Te Gana Tuvalu Lomiga Lua GALUEGA 7 Bible Online

GALUEGA 7 - Te Tusi Tapu I Te Gana Tuvalu Lomiga Lua bible

GALUEGA 7

¹Muna a te Faitaulaga Pule ki a Setefano, “E a, e tonu te muna tenei?”

²Muna a Setefano: “Faka'logo mai e taina mo tamana. Ne fakaasi atu te Atua tela e o ia te 'malu ki te tou tupuga ko Apelaamo i tena nofoga i Mesopotamia, ka koi tuai a ia o fano o nofo i Halana.

³Muna a te Atua ki a Apelaamo, ‘Tuku tou kaiga mo tou fenua, kae fano o nofo i te fenua ka fakaasi atu ne au ki a koe.’

⁴Tela, tuku eiloa ne ia te fenua ko Kaletaia, kae fano o nofo i Halana. I te matega o te tamana o Apelaamo, fai ei ne te Atua Apelaamo ke na vau o nofo i te fenua tenei e 'nofo ei koutou.

⁵Ne seki tuku eiloa ne te Atua se vaega io me ne mo laukele o te fenua tenei ke fai mo manafa o Apelaamo; kae ne folafola ne te Atua ki a ia me tuku atu eiloa ne ia ki a ia, ka fai foki mo ona fenua fakatasi mo ana fanau; ka ko Apelaamo e seki iai ne ana tama i te taimi tena.

⁶Tenei te muna a te Atua ne fai, ‘Ka fai ana tama mo fai a tino fakaalofa i se fenua fakaatea, tela ka fakapologagina kae fai maseigina latou ne tino i kona i te fa selau tausaga.

⁷Ka fakamasino ne au a te fenua tena ka tavini ki ei latou; kafai ko teka atu a mea konei, ko olo ei latou keatea mai te fenua tena, kae ka tapuaki mai ki a au i te koga tenei.’

⁸Tela, tuku ei ne te Atua ki a Apelaamo te faifaiga o te pilitome ke fai mo fakailoga o te feagaiga tenei. Tena te mea ne pilitome ei ne Apelaamo a Isaako, e tasi te vaiaso i te otiga ne fanau. Ne pilitome ne Isaako a Iakopo, ka ko Iakopo ne pilitome ne ia o'tou tupuga e tinoagafulu mo te tokolua.

⁹“E loto masei a tupuga konei ki a Iosefa, tela 'togi atu ei ne latou a Iosefa ki Aikupito. Ka ko te Atua e fakatasi faeloa mo ia.

¹⁰Ne fakasao foki a ia ne te Atua mai mea faiga'ta katoa ne fepaki mo ia i te aumaiga o Iosefa ki mua o Falao, te tupu o Aikupito, ne tuku atu ne te Atua ki a ia te poto mo te amio fakafiafia loto i mua o te tupu. Tela, 'tofi ei a ia ne Falao ke fai mo kovana o te fenua katoa, pela foki te kaiga tupu.

¹¹E isi se oge ne poko i Aikupito katoa, pela foki mo Kanana, kae uke foki a mea faiga'ta ne pogai mai ei. Ko se mafai ne o'tou tupuga o maua ne olotou meakai.

¹²Tela la, i te lagonaga ne Iakopo me maua a saito i Aikupito, uga atu ei ne ia o'tou tupuga ke olo ki kona, kae tena foki eiloa te lotou malaga muamua ki Aikupito.

¹³I te lotou oloatuga i te fakalua ki Aikupito, ne fakaasi faka'lei ei a Iosefa ki ona taina, iloa ei foki ne Falao a te tupumaiga o Iosefa.

¹⁴Ne avatu te fekau a Iosefa ki a Iakopo tona tamana, pela foki mo ona kaiga, ke o'mai ki Aikupito. E tusa mo te tino fitu mo te tokolima te aofaki o latou katoa.

¹⁵Tela, fano ei a Iakopo o nofo i Aikupito, i te fenua ne mate ei a ia fakatasi mo o'tou tupuga.

¹⁶Ne ave katoa o tanu i Sekema, i te tānuga tela ne 'togi ki tupe ne Apelaamo mai te matakaiga o Hamola i Sekema.

¹⁷“Ka ko pili ki te taimi e fakataunu ei te folafolaga a te Atua ne fai ki a Apelaamo, ko na gasolo ei o tokouke a te aofaki o'tou tino i Aikupito.

¹⁸Ko sopo te tupu fou ki te nofogaaliki, kae se iloa ne ia Iosefa.

¹⁹Ne fakaloiloi ne ia o'tou tino, kae fakasaua foki ki a latou, kae fakatonu malosi ne ia ke tuku tiakina keatea olotou pepe mai olotou fale, ko te mea ke 'mate.

²⁰Ko te vaitaimi tonu eiloa tenei ne fanau ei a Mose, kae se tamaliki tinogali. Ne puti ake eiloa a ia i te fale o tona tamana i te tolu masina.

²¹I te taimi ne ave ei keatea mai te fale, ne puke ne te tama fafine a Falao, kae putiputi ake eiloa ne ia e pela eiloa mo sena tama tonu.

²²Ne tauloto ne ia a poto katoa faka Aikupito, kae se tagata e iloga i ana pati mo ana faiga.

²³“I te katoaga o te fa sefulu tausaga o tona olaga, ne oko ifo ki a ia te lagona o asiasi atu ki ona taina Isalaelu.

²⁴Ne matea ne ia a te tino Isalaelu e tokotasi e fai masei ne te Aikupito, fanatu ei a ia o fakasao te ola o te tino tena, i te tamate ne ia te Aikupito.

²⁵Ne leake eiloa a ia me maina 'lei ona taina, i te Atua ka fakaaoga ne ia a ia o fakasaoloto latou; kae tela la, e se maina foki i a latou.

²⁶I te sua aso, ne maua atu foki ne ia a tino Isalaelu e tokolua e 'fusu, taumafai ei a ia o faka'lei laua, ana muna, ‘Kiloke, a koulua e taina. Ai a e taua ei koulua?’

²⁷Ka ko te tino tela ne fakasaua ki tona tuakoi ne 'tule ne ia keatea a Mose, kae fai atu ki ei, ‘ko oi ne fai ne ia koe ke fai mo pule mo famasino ki a matou?’

²⁸‘E manako foki koe o tamate au e pela mo tau tamatega i te Aikupito anafi?’

²⁹I te pokoga a Mose i te pati tenei, sola eiloa a ia o nofo pela mo se fakaalofa i te fenua ko Mitiana, tela ne fai ei ana tama tagata e tokolua.

³⁰“I te tekaga o te fa sefulu tausaga i te 'tupuga o mea konei, fakaasi atu ei ki a Mose te agelu a te Aliki i te ulaga o te afi i te lakau e ka i te vao e pili ki te Mauga o Sinai.

³¹Ne ofo a Mose i te mea ne matea ne ia, kae i tena piliatuga o kilo faka'lei ki te vao ka tena, ne lagona ne ia te leo o te Aliki e faipati penei,

³²‘Au ko te Atua o otou tupuga, ko te Atua o Apelaamo, Isaako mo Iakopo.’ Ne polepole a Mose i te mataku, ka ko se toe fia kilo eiloa ki te vao 'ka.

³³Muna a te Aliki ki a ia, ‘Tapale ou taka keatea, me i te koga tena e tu ei koe, se laukele tapu.

³⁴Ko oti ne matea tonu ne au te fakaalofa o oku tino i Aikupito. Ko oti foki ne lagona ne au te lotou tagi fi'ta, ka ko vau nei au o fakasao latou. Vau la, ke uga atu ne au koe ki Aikupito.’

³⁵“A Mose tenei ko ia tela ne 'teke ne latou i olotou muna penei, ‘Ko oi ne fai ne ia koe ke fai mo pule mo famasino ki a matou?’ Ko ia eiloa tenei ne fakaasi atu ki ei te agelu a te Atua i te vao ka, tela ne uga mai ne te Atua ke fai mo pule mo fakaola.

³⁶Ne takitaki ne ia tino keatea mai Aikupito. Ne fai foki ne ia a vavega, mo mea fakaofoofogina i Aikupito mo te Tai Kula, pela foki i te koga lavaki i te fa sefulu tausaga.

³⁷Ko ia foki tenei ne fai atu ki tino Isalaelu, ‘Ka uga mai ne te Atua se pelofeta ki a koutou, kae se tino eiloa mai i a koutou, e penei foki mo au ne uga mai ne ia ki a koutou.’

³⁸Ne fakatasi foki a ia mo tino Isalaelu ne potopoto i te koga lavaki; ne fakatasi mo o'tou tupuga; ne iai foki i kona mo te agelu ne faipati atu ki a ia i te Mauga o Sinai. Ne maua foki ne ia a muna o te ola ke tuku mai ki a tatou.

³⁹“Ne ita o'tou tupuga o faka'logo ki a ia; ne 'fuli atu olotou tua ki ei mo te loto fia foki ki Aikupito.

⁴⁰Muna a latou ki a Alona, ‘Fai ake ne atua mo tatou, ke 'taki ne latou tatou. Ko se iloa ne tatou me se a te mea ne tupu ki a Mose, tela ne aumai ne ia tatou mai i Aikupito.’

⁴¹Tela, fai ei ne latou i taimi kona se tupua e fakatusa ki te tamā pulumakau, kae tuku atu a taulaga ki ei; fai ei ne latou se fakafiafiaga lasi ki fua o galuega o olotou lima.

⁴²Ne fulitua atu te Atua ki a latou, kae fai ne ia latou ke tapuaki ki fetu o te lagi, e pela eiloa mo muna a pelofeta ne tusi: ‘Tino Isalaelu! E se ko au Ne ala ei o 'ta otou manu, Kae tuku mai mo fai otou taulaga I te fa sefulu tausaga i te koga lavaki.

⁴³Ne ave sale ne koutou a te fale o Moloka, Mo te fakatusa o te fetu ko Lefana te otou atua, Ko fakatusa kola ne faite ne koutou, o tapuaki atu ki ei. Tela la, ka fakasalalau valevale ne au koutou ke silia atu i tuakoi o Papelonia.’

⁴⁴“Ne 'nofo eiloa otou tupuga mo te fale tapuaki ave sale i malaga i te koga lavaki. Ne faite eiloa ki te ata ne fakaasi atu ne te Atua ki a Mose, e pela eiloa mo te mea ne matea ne ia.

⁴⁵Fakamuli ifo a te fale tela ne maua ne omotou tupuga mai i olotou tamana, ne ave eiloa ne latou i te lotou ologa mo Iosua, kae puke malo ne latou a laukele o nisi malo mai i olotou mua, kola ne afuli ne te Atua. Ne tuku i kona ke oko eiloa ki aso o Tavita.

⁴⁶Ne alofagina a ia ne te Atua, fakatagi atu ei a ia ki te Atua, ke talia mai a ia ke fakatu ne ia se fale e nofo i ei te Atua o Iakopo.[6]

⁴⁷Ka ko Solomona ne fai ne ia te fale mo te Atua.

⁴⁸“A te Atua Tafa Sili i te Maluga, e se nofo i fale e faite ki lima. E pela mo muna a te pelofeta,

⁴⁹“Muna a te Aliki, ‘A toku nofogaaliki ko te lagi, Ka ko te lalolagi ko te mea e tuku ei oku vae. Se a te vaega fale ka fai ne koutou mo oku? Tefea foki te koga mo oku malolo?

⁵⁰E seki fai katoa ne au a mea konei?’

⁵¹“Ko oko eiloa i te otou loto make'ke, mo te loto pouliuli mo te faka'tuli otou taliga o talia te muna a te Atua! E pau eiloa koutou mo otou tupuga; ne 'teke foki ne koutou a te Agaga Tapu!

⁵²Ko oi se tino mai te kau pelofeta e seki fakasaua ne otou tupuga? Ne tamate ne latou a pelofeta kola ne 'valo ne latou te oko mai o te Tavini amiotonu. Kae nei ko oti ne fakalata kae tamate foki ne koutou.

⁵³A koutou ko tino kola ne maua ne koutou a te tulafono a te Atua e alatu i ana agelu, kae se tausi eiloa ne koutou.”

⁵⁴Ka koi fakalogo'logo a tino o te Fono Maluga ki a Setefano, ko u fua olotou nifo i te kaitaua ki a ia.

⁵⁵Ka ko Setefano i mo taimi kona, ko fonu eiloa i te Agaga Tapu. Ne kilo ake ona mata ki te lagi, matea atu ei ne ia te 'malu o te Atua mo Iesu e tu i te feitu taua, ko te fakaatamai o te Atua.

⁵⁶Fai ake ei ana muna penei, “Kiloke, ko matea ne au te lagi e matala, mo te Tama a te Tagata e tu i te feitu fakaatamai o te Atua!”

⁵⁷Ne paka'laga latou ki luga kae 'pono olotou taliga, kae 'tele fakatasi atu katoa ki a ia,

⁵⁸soso malo ei ne latou ki tua o te fa'kai, kae peipei ki fatu. Ne tuku atu foki a gatu o tino molimau ke tausi ne te tamatane e igoa ki a Saulo.

⁵⁹Ka koi peipei ne latou a Setefano, ne kalaga atu a ia ki te Aliki, ana muna, “Te Aliki ko Iesu, ke talia mai ne koe toku agaga.”

⁶⁰Ne totuli kae kalaga malosi ki luga, ana muna, “Te Aliki, ke fakamagalo ne koe te lotou agasala.” I te otiatuga o ana pati konei, ko te mea eiloa ko mate.