Read Te Tusi Tapu I Te Gana Tuvalu Lomiga Lua GALUEGA 8 Bible Online

GALUEGA 8 - Te Tusi Tapu I Te Gana Tuvalu Lomiga Lua bible

GALUEGA 8

¹Ne loto foki a Saulo ke mate a Setefano. I te taimi eiloa tena, kamata eiloa mo te fakasauaga ki te Ekalesia i Ielusalema. Ko mafuta valevale a tino talitonu ki fa'kai katoa o Iutaia mo Samalia, ka ko apositolo fua ne 'nofo eiloa i Ielusalema.

²Ne tanu Setefano ne tino lotu, kae fai olotou pese tagialofa ki a ia.

³Ko fakasaua Saulo ki te Ekalesia. Ko ulu atu ki loto i fale takitasi, kae 'futi mai ne ia tagata mo fafine, kae pei atu ki te fale puipui.

⁴A tino talitonu kola ne salalau valevale, ko olo sale fua ki so se koga o talai atu te Tala 'Lei.

⁵A Filipo ne fano ki te fa'kai ko Samalia o folafola atu te Keliso ki a latou.

⁶Ne loto ma'lie a tino kona o fakalogo'logo ki a ia. Ne fakalogo'logo katoa ki a ia; ne matea foki ne latou a vavega ne fai ne ia.

⁷E tokouke foki o latou ne tino e ma'saki faka'mate mo tino 'pili, kae ne 'lei olotou masaki.

⁸Ko oko eiloa i te fia'fia o tino i Samalia.

⁹E isi se tagata e nofo i kona e igoa ki a Simona, tela ko oti ne fakaofo ne ia a tino ki ana vailakau. Ne fai tena muna i a ia se tino maluga,

¹⁰ka ko tali'tonu katoa a tino malalo mo tino ma'luga ki a ia, olotou muna, “A ia nei ko te Mana Malosi o te Atua.”

¹¹Ne faka'logo latou ki a ia, i te mea ko leva ne fakaofo ne ia a latou ki ana vailakau.

¹²Ka ko Filipo ne folafola fua ne ia a te Tala 'Lei o te Malo o te Atua mo te igoa o Iesu Keliso, kae ne talitonu foki a tino ki a ia. Ne papatiso katoa latou, tagata mo fafine.

¹³Ne talitonu foki a Simona, papatisogina ei a ia, ka ko ia ne nofo fakapilipili faeloa ki a Filipo. Ne ofo tona loto i tena kilokiloga ki fakailoga mo vavega 'lasi kola ne fai.

¹⁴I te lagonaga ne apositolo i Ielusalema i a Samalia ko talia ne latou te muna a te Atua, uga atu ei ne latou a Petelu mo Ioane ke olo ki Samalia.

¹⁵I te la okoatuga, ne 'talo laua mō tino talitonu, ko te mea ke maua ne latou te Agaga Tapu.

¹⁶I te mea e seki iai eiloa se tino o latou kai fanaifo ki a ia te Agaga Tapu; ne papatisogina fua latou i te igoa o te Aliki ko Iesu.

¹⁷Tela, fakaeke atu ei o la lima ki luga i a latou, maua ei ne latou te Agaga Tapu.

¹⁸I te mateaga ne Simona me ne tuku mai te Agaga Tapu i te fakaekega o lima o apositolo ki luga i a latou, tuku atu ei ne ia tupe ki a laua,

¹⁹ana muna, “Tuku mai foki ki a au te 'mana tenei, ko te mea ke maua ne so se tino te Agaga Tapu manafai e fakaeke oku lima ki luga i a ia.”

²⁰Muna a Petelu ki a ia, “Ke malaia fakatasi koe mo au tupe, me i a koe e taofi pela me mafai o 'togi tupe a te meaalofa faivasaga a te Atua!

²¹E seai eiloa sou vaega io me sou tofi i te motou galuega, i tou loto e se tonu i mua o te Atua.

²²Tela la, na salamo ki tou mafaufauga se tonu tenei, kae 'talo foki ki te Aliki ke fakamagalo ne ia koe i tou mafaufau pena.

²³E matea atu ne au i a koe e fonu i te loto masei, kae se pologa foki a te agasala.”

²⁴Muna a Simona ki a Petelu mo Ioane, “Talo ki te Aliki mō au, ko te mea ke seai se mea o mea kola ne laulau mai ne koulua e 'tupu ki a au.”

²⁵I te otiga ne taku tonu atu ne laua a te muna a te Aliki, 'foki ei Petelu mo Ioane ki Ielusalema. Ne folafola atu ne laua a te Tala 'Lei i te ukega o fa'kai o Samalia, i te la auala ki Ielusalema.

²⁶Ne faipati atu a te agelu a te Aliki ki a Filipo, ana muna: “Fakatoka o fano ki te feitu ki saute,[7] i te auala tela e vau mai Ielusalema kae tau ki Kasa.” Ko se toe fakaaoga te auala tenei.[8]

²⁷Ne tu ake ki luga, fano eiloa. E isi se tagata Aitiope, se tino ko oti ne pilitome, kae se tino maluga foki i te fale o te tupu fafine tenei. Ne fano ki te tapuakiga ne fai Ielusalema,

²⁸ko foki nei i tena auala ki Aitiope, e sopo i tena ka, kae faitau ki te tusi a te pelofeta ko Isaia.

²⁹Muna a te Agaga Tapu ki a Filipo, “Fano o fakapilipili ki te ka tela.”

³⁰Tele atu ei Filipo ki kona, lagona atu ei ne ia me faitau i te tusi a te pelofeta ko Isaia; tela fesili atu ei ki a ia, “E malamalama koe i te tusi e faitau ne koe?”

³¹Ana muna, “Ikai, seiloga ke fesoasoani mai se tino.” Tela, fai atu ei ki a Filipo ke fanake ki luga ke saga'saga laua.

³²A te vaega o te tusi a Isaia e faitau ne ia e penei: “A ia e pela mo se mamoe ko ave o ta, A ia e pela foki mo se tama mamoe e se tagi manafai e kati ona fulu. E seai foki sena pati e fai.

³³Ne fakamalalogina kae fakaseaoga foki tona fai mea tonu. E seai se tino e mafai ne ia o fakamatala ona kautupu, Me ko palele atu tona ola i te lalolagi nei.”

³⁴Muna a te Aitiope ki a Filipo, “Fakamolemole, taku mai ki a au me ko oi te tino tenei e faipati ki ei te pelofeta, ko ia me se tino ake fakaatea?”

³⁵I kona foki eiloa, kamata eiloa Filipo o faipati i te vaega o te tusi a Isaia tenei, lauga atu ei ne ia ki a ia te Tala 'Lei e uiga ki a Iesu.

³⁶Ka koi faimalaga laua i te auala, oko atu ei laua ki te koga e isi ne vai i ei, fai atu ei te Aitiope, “Kiloke, konei a vai. E isi se fakalavelave e se papatiso ei au ne koe?”[9] (37 Muna a Filipo ki a ia, “E mafai koe o papatiso, manafai e talitonu koe mo tou loto katoa.”Ne tali atu a ia ki a Filipo, “Au ko talitonu i a Iesu Keliso ko te Tama a te Atua.”

³⁸Ne fakatonu atu ei a te Aitiope ke taofi a te ka, olo ifo ei a Filipo mo te Aitiope ki te vai, papatiso eiloa a ia ne Filipo.

³⁹I te la oloakega mai te vai, fakagalo fakavave ei a Filipo ne te Agaga o te Aliki, ka ko se matea foki ne te Aitiope a ia, foki atu ei a ia mo te fiafia lasi.

⁴⁰Ne matea a foliga o Filipo i Asota, kae ne fano ki fa'kai katoa o folafola atu a te Tala 'Lei ke oko eiloa ki Kaisaleia.