Read Te Tusi Tapu I Te Gana Tuvalu Lomiga Lua LOMA 1 Bible Online

LOMA 1 - Te Tusi Tapu I Te Gana Tuvalu Lomiga Lua bible

LOMA 1

¹Ko au ko Paulo, te tavini a Iesu Keliso, ne kalagagina ke fai mo apositolo, ne fakamavae mai keatea mō te folafolaga o te Tala 'Lei a te Atua,

²tela ko leva ne fai feagaiga mai ei a ia ki ana pelofeta i Tusitusiga Tapu,

³ki te tala 'lei e uiga ki tena Tama ko Iesu Keliso te tou Aliki, tela ne tupu mai i te kaiga o Tavita i te foitino.

⁴Ne fakaasi tonu mai ei me ko ia ko te Tama a te Atua i te mana o te Agaga Tapu i tena toetuakega mai tino 'mate.

⁵Ne maua foki ne au mai i a ia te alofa tauanoa mo te galuega fakaapositolo, ke aumai ei a fenua katoa ki te fakatuanaki ki tena igoa.

⁶A fenua konei e aofia i ei a koutou kola ne kalagagina ne Iesu Keliso.

⁷Te la, ko tusi atu au kia koutou katoa i Loma, kola ne alofagina ne te Atua kae ne kalagagina ne ia ke fai mo ana tino totino: Ke i a koutou te alofa tauanoa mo te filemu mai te Atua te tou Tamana, mo Iesu Keliso te tou Aliki.

⁸E mua eiloa taku fakafetai ki toku Atua, e alatu i a Iesu Keliso mō koutou katoa, i te mea ko takutakugina te otou fakatuanaki i te lalolagi katoa.

⁹I te Atua tela e tavini ei au ki a ia i toku agaga, i te folafolaga o te Tala 'Lei i tena Tama, ko taku molimau, me e iloa ne ia me se mafai o puli koutou i aku talosaga,

¹⁰e fakatagi atu ei au ki te Atua me e tusa mo tena loto ke oko atu au o asi koutou.

¹¹Ko oko eiloa i toku fia oko atu, ko te mea ke mafai ne au o avatu ki a koutou a nisi meaalofa faka te Agaga, e fakamalosi ei koutou.

¹²Ko tena uiga ke fakatau fesoasoani tatou i te tou fakatuanaki, o faka lotomalosi mai koutou, ka ko au ki a koutou.

¹³Taina, e 'tau o iloa ne koutou, me mafaufau sale au ki toku fanatu ka ko taofia eiloa au ke oko mai ki aso nei, ko te mea ke mafai ne au o maua ne fua mai i a koutou, ke pela mo nisi o fenua fakaatea.

¹⁴Au ne ligina ne taku feagaiga ki tino Eleni, pela foki ki tino o fenua fakaatea, tino 'poto mo tino va'lea:

¹⁵tela la, ko oko eiloa i toku fia folafola atu te tala 'lei ki a koutou kona i Loma.

¹⁶I a au e se ma i te tala 'lei: i te mea ko te mana o te Atua e fakaola i ei a latou katoa kola e fakatuanaki, e muamua te Iutaia, kae tafa atu te Eleni.

¹⁷Ne fakaasi mai ne te tala 'lei te auala ne fai ne te Atua ko tino ke amiotonu. E auala i te fakatuanaki mai te kamataga ki te fakaotiga. E pela mo muna a te Tusi, “E maua ne te tino te ola tonu i te talitonu i te Atua ko oti ne fai ne ia te tino tena ke 'lei te la va.”[1]

¹⁸Ne fakaasi mai ei foki te fakasalaga a te Atua mai te lagi ki te se amio Atua mo te amio ma'sei o tino, i te mea ko tekeia ne te lotou amio masei ke se iloa ne latou te mea tonu.

¹⁹Tenei te pogai e fakasala ei ne te Atua a tino: ne fakaasi faka'lei eiloa ne te Atua tena Munatonu ki tino.

²⁰A te uiga se lavea o te Atua, tela ko tona mana mo tona uiga fakaatua, ko oti eiloa ne fakaasi faka'lei mai e alatu i te faitega o te lalolagi. Tela la, ko se mafai ne tino o fai ne olotou fakasako me ko matea 'lei ne latou te Atua i ana mea ne fai.

²¹E iloa foki eiloa ne latou te Atua, kae se fia āva ki a ia e pela mo se Atua io me 'viki atu ki a ia, kae ne 'fonu olotou manatu i mafaufauga se 'lei, mo olotou mafaufauga 'masa ko 'fonu foki i te pouliga.

²²Ne manatu ifo latou me i a latou e 'poto, kae tela la e va'lea fua.

²³Ne sui foki ne latou te 'malu o te Atua ola tumau ki fakatusa o te tino, manu eva, manu vaefa mo manu 'tolo kola e oko ki ei te mate.

²⁴Ona ko latou ne tino va'lea, tela la, ne fai eiloa ne latou olotou manako ki te lotou faitalia, kae fai foki ne latou amioga fakasotoma.

²⁵Ne sui ne latou te mea tonu e uiga ki te Atua ki te mea loi. Ne tapuaki kae tavini foki ki mea ne faite ne te Atua i lo te tapuaki ki a ia. E 'tau o vikia te Atua ki te se gata mai. Amene.

²⁶Tenei te pogai ne tuku atu ei latou ne te Atua ki amioga fakalumaluma. Ke oko foki ki olotou fafine, ne fakaaoga 'se ne latou faifaiga tonu o te foitino ki faifaiga se tonu;

²⁷kae pena foki tagata, ne tiakina ne latou faifaiga tonu i te va o tagata mo fafine, kae ne 'ka olotou loto i te manako o te sua tagata ki te sua tagata, me ne fai ne tagata kona amioga fakalumaluma mo nisi tagata, kae ka maua ne latou te lotou fakasalaga i olotou mea 'se.

²⁸I te mea e ita latou o puke mau i olotou mafaufau a te poto o te Atua, tela tuku atu ei olotou mafaufau mo fai amioga se 'lei.

²⁹Ne 'fonu i vaega amio masei katoa, te masei, te kaimanako, te mataola, te kaisoa, te tatino, te faitaua, te takolekole, te se alofa, mo te fatufatu.

³⁰Ne tino fai tala loi, e ita ki te Atua, fia iloga, fia sili,[2] fia ma'luga, fakamata'mata, mafaufau ki mea masei, se faka'logo ki olotou matua,

³¹e fakavale'vale, se fakamaoni, seai ne loto, mo te se a'lofa.

³²E iloa foki ne latou te fakatonuga a te Atua, me i tino kola e fai ne latou a uiga kona, ko 'tau i a latou te mate, kae se gata fua i te fai ne latou, kae talia foki ne latou a tino kola e amioga pena, ke fai ne latou.